B waa n togsa a Zozafat woto: «Zãma ka tɛk n yi mogra rʋʋnde la Edom, n wat n na n tak zabre ne foo. Marsã b taa Asasõ-Tamar, dat n yeelame tɩ En-Gedi.»
‹Yell sa n pak do, zabre, sɩbgre, bã-longdem, kom, d na wa y taoore la y rooga taoore, tɩ y zĩndga y meng a pʋgẽ. D yɩɩra pʋga d na tees-y n kelem, y na wʋme la y na fãag-do.›
Soaala, y ka na n kao d bʋʋdo n fãagd-d nin-bãmba sẽn ka be tɛka nugẽ, tɩ b waa n na n zaba ne-do? Tõnd ka mi d sẽn na n maneg ye. Woto wã yãmb bal la d geta.»
A tãsame: «Kelg yã, yãmb fãa Zɩɩda la Zerizalɛɛm dãmba, la yãmba, dĩm a Zozafat, ad Soaala-Wẽnd koɛɛga: ‹Da zoe-y rabeem ye, da yɛɛs-y zãma kãsenga taoor ye. Ka yãmb n so zabra ye, yaa Naaba-Wẽnde.
Ka zabr la y na n zab ye. Yals-y bala, tong-y bala la y na yãend fãagr ning Soaala-Wẽnd sẽn segl Zɩɩda la Zerizalɛɛm yĩnga. Da zoe-y rabeem ye. Da yɛɛs-y ye, yi-y beoogo n seg-ba, tɩ Soaala-Wẽnd na zĩnd ne yã.› »
B sãda beoogo n dɩk Tekoa we-raooga sore. B sẽn waa n looda, a Zozafat yaasa yĩngr n yeele: «Kelg-y-ma, Zɩɩda la Zerizalɛɛm dãmba. Da yi-y Naaba-Wẽnd poorẽ tɩ y na tilge. Tẽ-y bãngdba sẽn togsã tɩ y yɛl na baas neere.»
A reng n yẽsa ne zãma wã, la tãb-biisa taoore, a lʋɩɩsa Naaba-Wẽnd yɩɩn-yɩɩndba sẽn da yeelg b tʋʋmda fu-sõma n tar b pẽgre. B ra yetame: «Pẽg-y Naaba-Wẽnd, tɩ b nonglma ka be sɛɛb ye.»
Amonitsã la Moabitsã yika zabre ne Edomitsa, Seyir tãnga zug rãmbã, la b kʋ-b-la zãnga n pa tol n kees ned ye. Amonitsa la Moabitsa me lɛɛg n kẽe taaba n kʋ taaba.
A Zozafat waa ne a nebã n zɛ-ba. B yãee rũms ka tɛka, lagdo, futu, la sãnem teedo. B waa n wʋkame tɩ yaa n loog b zɩɩbo. Te-zɛɛdma sẽn da labs yĩngã, dasem a tã tõre la b zõond ne b wʋkre. Ne rẽ fãa b pa tõog n sɛ ye.
Daar a naas soaba, b tigma taab Beraka bãg-faagẽ. B pẽga Soaala-Wẽnd be, b pʋʋs-b-la barka la yaa rẽ yĩng la b boond zĩiga tɩ pẽgr la bark puusg zĩiga, n ta ne rũnna.
A Zazafat dɩɩ naam Zɩɩda. A ra tara yʋʋm pis-tã la a nu a sẽn waa n lebg dĩma, la a rɩɩ a naama yʋʋm pisi la a nu Zerizalɛɛm. A ma la a Azuba, a Sili biiga.
Maresa dao a Dodava biig a Eliezɛr, yiisa bãngr goam beed a Zozafat poorẽ. «Fo sẽn tɩ yõg zood ne a Akaziyas yĩngã, Naaba-Wẽnd wurga f tʋʋm sõma wã lalga.» Kogenda fãa wãame, b pa tõog n loog Tarsis ye.