1
Jehoshẹfatị a nwụnhụn, laburu ndị nẹdi ẹ, wẹ nọ li ẹ ye ebe wẹ liye ndị nẹdi ẹ imẹ Obodo Defidi. Nwa a wụ Jehoram nọ rikin ẹ eze.
2
Mmunẹ Jehoram, ikẹnnyẹ Jehoshẹfatị mụ ya lẹ wẹ, wụ Azaria, Jehiẹlụ, Zẹkaraya, Azarịahu, Maịkẹlụ lẹ Shẹfatịa. Ndịnị ile wụ ikẹnnyẹ Jehoshẹfatị eze Juda mụ.
3
Nẹdi wẹ ye wẹ ihiẹn bụ ọda kẹ ọ rị ndụn: kẹ siliva kẹ goru kẹ ihiẹn ndị ọzọ rị okẹn mkpa; o yesọnmẹzi wẹ obodo ndị rị mma wẹ tụnhunmẹ mgbọn imẹ Juda, kanị o we alị-eze Juda ile ye Jehoram makẹni ịya wụ okẹnnyẹ ibuzọ a.
4
Kanị mgbe Jehoram gi werigụ ọnọdị a ọhụnma-ọhụnma imẹ alị-eze hụ o rikin nẹdi ẹ, ọ nọ gi ọpịa-agha gbuchanrịn umunẹ-ẹ-ikẹnnyẹ ile, gbuzi ndị o gbu imẹ ndị-isi.
5
Jehoram rị nwa ahụa mmẹbụọ kwasị ọgụn k'ọ kịma; imẹ Jerusalẹm k'ọ nọ kị; ahụa ẹsatọ k'ọ kị.
6
O bichanrịn obibi ndị-nze Izrẹlụ Ẹbamịn ugu nọkẹ kẹ ikpụlọ Ehabụ dọn mẹ, makẹni ọ lụrụ nwa Ehabụ. Jehoram mẹ eje-ihiẹn ẹnya Osolobuẹ.
7
Kanị, ọ rịnị Osolobuẹ n'o tikpọ ikpụnọ Defidi, makẹ nkwerigbama rị ẹgbata Osolobuẹ lẹ Defidi. Osolobuẹ e kwegụọ nkwa n'o k'e dọnmẹni Defidi lẹ ẹbozo ẹ ukpẹ jẹnrin ejẹn.
8
Ogẹn Jehoram gi rị a kị kẹ Ẹdọm gi nnupụ-isi okpuru ndị Juda, tumẹrin eze.
9
Ya Jehoram nọ shi ebẹhụ, ya lẹ ndị-agha a ile lẹ ụgbọ-ẹshin ẹ ile. Ndị Ẹdọm nọ kehunmẹ ya lẹ ndị-agha a gi ụgbọ-ẹshin a lụ agha, kanị ọ nọ gi imẹ uhinhin maye wẹ, gbapụ.
10
Ẹdọm ekwerikwọnị nwan rị okpuru Juda d'e ru tannị. Ogẹn hụ kẹ Libna gizikwọ gha okpuru Juda pụ. Ihiẹnni ile mẹ makẹni Jehoram latọ Osolobuẹ wụ Chuku ndị nẹdi ẹ.
11
Ọ tụnsọnmẹzịghọ ụlọ-mmọn ye elu ugu ndị rị Juda, mẹ ndị bi Jerusalẹm gbasọnmẹ mmọn ndị hụ kẹ ịgbaraja, duhuhu ndị Juda.
12
Ẹlaịja Onyẹ-amụma nọ dehẹni Jehoram ẹkụkwọ-ozi, hụn sị, “Lee ihiẹn Osolobuẹ wụ Chuku nẹdi i Defidi ku: Ọ sị, ‘Y'e sọnni nzọmụkụ nẹdi i Jehoshẹfatị mọbụ nẹdi i kanị Asa hụn kị Juda mbụ.
13
Kama, nzọmụkụ ndị-nze Izrẹlụ Ẹbamịn ugu k'ị rị nwan e sọn, nu ndị Juda lẹ ndị Jerusalẹm d'e we enwẹn wẹ kwanị mmọn-lẹ-iyi nọkẹ ịgbaraja nọkẹ kẹ ikpụnọ Ehabụ dọn nu ndị Izrẹlụ Ẹbamịn ugu. Y'e gbugụọzị umunẹ i ikẹnnyẹ, ndị ikpụlọ nẹdi i, ndị hụn te kadẹ ị mma.
14
Lee nwan ẹnya, Osolobuẹ e d'e mẹshi i ikẹn: kẹ ụmụ ị ikẹnnyẹ kẹ inyẹnmẹ i kẹ ihiẹn ile wụ nke i.
15
Eje-emu akụ-ẹfọ ghalẹni a la k'a kụ yụ nwẹn, kụ ị d'e ru nị akụ-ẹfọ ị a yọpụha.’ ”
16
Ya Osolobuẹ nọ nu ndị Filistia, uwẹ lẹ ndị Arabụ bikụnma ndị Ẹtiopịa wụ Kushi, d'a lụsọn Jehoram agha.
17
Wẹ nọ bịa d'a lụsọn Juda agha. A banhan wẹ, kwarịchanrịn ihiẹn ile wẹ hụn imẹ obi-eze Jẹroham, kẹ ụmụ a ikẹnnyẹ kẹ inyẹnmẹ ẹ. Onwọnni kaka akpụ nwa a okẹnnyẹ ohu wẹ latọn'a karị Jeho-ahazị (Ahazia) nwa-mbi rịn'a.
18
Ihiẹnni ile e mẹgụ, Osolobuẹ nọ tụ Jehoram emu akụ-ẹfọ wẹ ghalẹni as'ẹka a zụọ.
19
Ọ kụbe ẹ, o zu ahụa ẹbụọ, akụ-ẹfọ a nọ yọpụha yeni emu hụ; ọ kụ a ọhụnma-ọhụnma o we nwụn. Ndị nke ẹ afiyenin'ẹ ọkụn wẹ gi e ye ndị-nze ọghọ kẹ wẹ dọn mẹni ndị nẹdi ẹ.
20
Jehoram rị nwa ahụa mmẹbụọ kwasị ọgụn k'o họnrin eze, ọ nọ kị ahụa ẹsatọ; imẹ Jerusalẹm k'ọ nọ kị. Onwọnni onyẹ ọnwụn a fụ. Wẹ nọ li ẹ ye imẹ Obodo hụ Defidi tụn, kanị eliyeni wẹ ẹ imẹ ili ndị-nze.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc