B ba a Zozafat ra kõ-b-la ligd naoor yaka, n kõ-b sãnem, wanzurfu, fan teedo, tãnsoben-tẽns sẽn be Zɩɩda tẽn-peelmẽ; naama la a bas n kõ a Zoram, tɩ yẽ la kãsma.
Baasgo Naaba-Wẽnd ka tʋlg n wãa a Daviid doogo, tɩ b ra yõga zood ne a Daviid, la b ra kãab-a lame tɩ wakat buud fãa fitil na widgi, yẽ yĩnga la a kamb yĩnga.
A Zoram gãndga a Edom toaaga ne a tãnsoaben-dãmba la a bilim-bilm gilli. A yika ne yʋngo, n pãb Edom tãb-biisa sẽn da gũbg-a. A tõoga bilim-bilma tãnsoaben-dãmba.
Dẽ tɛka Edomitsa fʋsg yi-la a Zɩɩda soolmẽ, n ta ne rũnna. Yaa wakat kãng me la Libna fʋsg n yi a soolmẽ. La rẽ yaa a Zoram sẽn da bas Naaba-Wẽnd, a ba-rãmb Wẽnde.
Bãngd a Eli waa n tool-a-la sebr a ye. Sebra ra yetame: «Ad Naaba-Wẽnd, f ba a Daviid Wẽnda koɛɛga: Fo sẽn pa tũ f ba a Zozafat la Zɩɩda dĩm a Asa nao,
Bãaga kaoosa sẽn yɩɩd yʋʋmde. Sẽn maan yʋʋm a yi, a wakat sẽn ta, a wʋba a yãadã, n nams wʋsgo, n ki. B pa yõog tɩdar a yĩng wala b sẽn maan a ba wã kaalmẽ ye.
A Zoram sẽn waa n na n dʋ zaoore t'a yʋʋm yaa pistã la a yiibu; a rɩɩ naam yʋʋm a nii Zerizalɛɛm. A loogame tɩ ned ba a ye ka yãb-a ye. B mum-a-la a Daviid na-tẽngẽ la pa yɩ dĩm dãmba yaadẽ ye.