A a ri ni vamakwavo va xinuna, vana va Yoxafati: a ri Azariya, na Yehiele, na Zakariya, na Azariya, na Mikaele, na Xefatiya, hinkwavo lava a va ri vana va Yoxafati, hosi ya Israele.
Tata wa vona u va nyikile xuma lexikulu xa silivhere, ni xa nsuku, ni xa mitirho leyi pfumalekaka, swin'we ni miti ya makhokholo etikweni ra Yuda, kambe a a nyikile Yehoramu vuhosi, hikuva a a ri mativula.
Yehoramu, kuteloko a kumile vuhosi bya tata wa yena, ni loko a titiyisile, a dlaya hi tlhari vamakwavo hinkwavo, hambi ti ri tihosana tin'wana ta Israele.
A famba endleleni ya tihosi ta Israele, hilaha yindlu ya Akabu yi endleke hakona, hikuva nsati wa yena a a ri n'wana wa Akabu; a endla leswo biha emahlweni ka Yehovha.
Kambe Yehovha a nga rhandzanga ku heta yindlu ya Davhida, hikwalaho ka ntwanano lowu a wu endleke na Davhida, ni hikwalaho ka leswi a swi vuleke leswaku a ta n'wi nyika, ni vana va yena, rivoni hi masiku.
Kavaloko Yehoramu a huma ni tindhuna ta yena, ni tigolonyi ta yena hinkwato; kutani a pfuka nivusiku a hlula Vaedomu lava n'wi rhendzeleke, ni tindhuna ta tigolonyi.
Va Edomu va sala va ntshuxekile eka Yuda ku fika namuntlha. Enkarhini wolowo, Libina a n'wi xandzukela, hikuva a fularhele Yehovha, Xikwembu xa vatata wa yena.
Na yena, a aka tindhawu leti tlakukeke etintshaveni ta Yuda; kutani a kucetela vaaki va Yerusalema, leswaku va tinyiketa vuoswi, a kanganyisa ni Vayuda.
Ku fikile eka yena papila leri tsariweke i Eliya, muprofeta, ri te: “Yehovha, Xikwembu xa Davhida, tata wa wena u vurisa sweswo, a ku: ‘Leswi u nga fambangiki etindleleni ta Yoxafati, tata wa wena, ni le tindleleni ta Asa, hosi ya Yuda,
kambe u fambile etindleleni ta tihosi ta Israele, u kuceterile va Yuda ni vaaki va Yerusalema, evuoswini, hilaha yindlu ya Akabu yi endleke hakona, kambe u dlayile ni vamakwenu va yindlu ya tata wa wena, lava ku tluleke hi vunene,
loko u ri wena u ta biwa hi khombo lerikulu, byi nga vuvabyi bya marhumbu lebyi nga ta engeteleka, marhumbu ya wena ma ko ma huma hi matimba ya vuvabyi.’ ”
kutani va tlhandlukela etikweni ra Yuda, va nghena eka rona, va phanga xuma hinkwaxo lexi ngi xi ri endlwini ya hosi; va teka ni vana va yena, ni vasati va yena; ku nga sali na n'wana wa wanuna loko a nga ri Yowahazi, ndzisana ya vana va yena.
vuvabyi byi engeteleka siku rin'wana ni rin'wana, kutani eku heleni ka lembe ra vumbirhi, marhumbu ya yena ma huma hi matimba ya vuvabyi, a fa, eku vavisekeni lokukulu. Tiko ra yena a ri n'wi hiselanga mirhi ya risuna hilaha va endleleke vatata wa yena hakona.
A a ri wa malembe ya 32 loko a sungula ku fuma, kutani a fuma malembe ya ntlhanu na manharhu eYerusalema. A fa, va nga twi ku vaviseka, kutani va n'wi lahla emutini wa Davhida, kambe ku nga ri emasirheni ya tihosi.