1
Ndị Jerusalẹm nọ we Ahazia hụn wụ okẹnnyẹ ikpanzụụn Jehoram, kin ẹ eze, o rikin nẹdi ẹ eze, makẹni ndị nẹi e gbu a kwarị, hụn wẹ lẹ ndị Arabụ wị bịa e gbugụọ mmunẹ ẹ ikẹnnyẹ ndị kanị. Ya kẹ Ahazia hụn wụ okẹnnyẹ ikpanzụụn Jehoram nọ kịma Juda.
2
Ahazia rị nwa ahụa ẹbụọ kwasị ọgụn k'o họnrin eze; ahụa ohu k'ọ kị; Jerusalẹm k'ọ nọ kị. Nnẹ ẹ wụ Atalia nwa-nwa Omri.
3
Ahazia sọnzikwọ nzọmụkụ ikpụlọ Ehabụ, makẹni nnẹ ẹ rị a dụnja a.
4
O mẹ eje-ihiẹn ẹnya Osolobuẹ kẹ ikpụlọ Ehabụ dọn mẹ, makẹni ogẹn nẹdi ẹ gi nwụnhụngụ, wẹ nọ wụrụ ndị ndụnmọdụn a hụn mẹ ẹ nwan dan.
5
Uwẹ dụnzị a ọdụn hụn o gi sọnjẹn Joram nwa Ehabụ eze Izrẹlụ Ẹbamịn ugu d'a lụsọn Hazaẹlụ eze Aram agha imẹ Ramọtụ-Gilẹdị. Ndị Aram nọ rụ Joram ẹhụ imẹ agha hụ;
6
ya Joram nọ lakin Jezriẹlụ d'a zụọ isi makẹ ẹhụ hụ wẹ rụ a imẹ Ramọtụ kẹ ya lẹ Hazaẹlụ eze Aram rị a lụ agha. Ya kẹ eze Juda wụ Ahazia nwa Jehoram nọ jẹn Jezriẹlụ d'a hụn Joram nwa Ehabụ makẹni wẹ rụ a ẹhụ.
7
Osolobuẹ gi ijẹn hụ Ahazia jẹn d'a hụn Joram buhẹ ọdịdan Ahazia. Ogẹn Ahazia gi ru ebẹhụ, ya lẹ Joram nọ pụha d'e kunrun Jehu nwa Nimshi hụn lala d'e kunrun wẹ — Jehu hụn Osolobuẹ tumẹ n'o tikpọ ikpụlọ Ehabụ.
8
Ebe Jehu rị e ye ikpụlọ Ehabụ afụnfụn njọ wẹ, ọ nọ hụn ndị-isi Juda lẹ ụmụ umunẹ Ahazia hụn a rụnnị Ahazia ọrụn, ọ nọ gbu wẹ.
9
Ọ nọ jẹn d'a chọma Ahazia, ndị-agha a nọ hụn Ahazia ebe ọ warị imẹ Obodo Sameria. Wẹ nọ wẹhẹni Jehu ya, ọ nọ gbu ẹ. Wẹ li ya nwẹn ọhụnma, makẹni wẹ sị, “Nwa Jehoshẹfatị rọ, Jehoshẹfatị hụn gi obi ẹ ile sọn Osolobuẹ.” Ya ọ nọzilẹni nwọn kaka akpụ onyẹ ohu imẹ ikpụlọ Ahazia kẹnrẹnni hụn k'a saẹka kị alị-eze Juda.
10
Ogẹn Atalia wụ nnẹ Ahazia gi hụn a nị nwa a a nwụnhụn, ọ nọ chọ n'o gbuchanrịn ndị ile wụ ụmụ nze Juda.
11
Kanị Jehoshẹba hụn wụ Ada eze, hụn wụzị nwẹnẹ Ahazia nọ weri Jụashị nwa Ahazia, gi nzuzue wepụ a imẹ igunrun ụmụ-eze ndị hụ Atalia chọ n'o gbu. Ọ chọ mmughẹ zuemẹ ya lẹ onyẹ hụn a pan'a. Ẹrịra kẹ Jehoshẹba hụn wụzị nwunyẹ Jehoyada onyẹ-isi nchụn-ẹjan dọn zuemẹ nwata hụ makẹni nwa nwẹnẹ ẹ Ahazia hụn wụ eze rọ; Atalia ahụnzịn'a gbu.
12
Wẹ nọ zuemẹ ẹ ye ebe wẹ rị imẹ Ụlọ-nsọ Chuku ọrọgbọ ahụa isin hụn Atalia kị alị Juda.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc