modok Jezreel ni mondo ochang kuom hinyruok ma noyudo Rama kokedo gi Hazael ruodh Aram. Ahazia wuod Jehoram ma ruodh Juda nodhi Jezreel mondo one Joram wuod Ahab nikech notuo.
To Nyasaye nosechano ni mondo Ahazia otho kodhi limo Joram, omiyo, kane Ahazia ni kuno, nowuok gi Joram mondo girom gi Jehu wuod Nimshi, mane Ruoth Nyasaye oyiero mondo otiek od Ahab.
Eka nochako dwaro Ahazia, monwang’e Samaria kuma noyudo opondoe. Ne gikele ir Jehu mi ginege. Ne giyike maber, nikech ne giwacho ni en nyakwar Jehoshafat mane oluwo Ruoth Nyasaye gi chunye duto. Ne onge ng’ato e od Ahazia manyalo bedo ruoth.
To Jehosheba, nyar ruodh Jehoram nogolo Joash wuod Ahazia ling’ling’ kuom yawuot ruoth mane idwaro nego, mi opande e od nindo kaachiel gi japite. Jehosheba nyar ruoth Jehoram ma chi Jehoyada jadolo, kendo ma nyamin Ahazia nopando Joash, mi Athalia ne ok onege.