A Akaazɩya sẽn wa n na n deeg naamã t'a tara yʋʋm pis-naas la a yiibu, la yẽnda zĩnda Zeruzalɛm n dɩ naamã yʋʋmd a ye. Yẽnda ma wã yʋʋr la a Atali n yaa a Omri bi-pugla.
A Akaazɩya maana sẽn yaa wẽng Sẽn-Ka-Saab nifẽ, wa a Akaab buudã sẽn maan bũmb ningã. Bala, a ba wã kũum poore, a rag n tara sagendb tɩ b sagend-a t'a na n sãame.
La yaa bãmb saglsã yĩng n kɩt t'a kẽng n tɩ naag a Akaab biig a Zoram sẽn yaa Israyɛll dĩmã, n na n tɩ zab ne Siiri rĩm a Azayɛll Ramot tẽngã sẽn be Galaadã. La Siiri nebã pogla a Zoram beenẽ.
La yẽnda lebg n waa Zɩɩzreyɛll n na n tɩp a meng ne poglg ning yẽnda sẽn paam a sẽn wa n zabd ne Siiri naab a Azayɛll Ramotã. Woto, a Zoram biig a Akaazɩya sẽn yaa Zʋʋda rĩma kẽnga Zɩɩzreyɛlle, n na n tɩ ges a Akaab biig a Zoram, a sãmpogrã sẽn gãneg-a yĩnga.
Wẽnnaam kɩtame t'a Akaazɩya sẽn wa n na n ges a Zoramã tũ ne a kũum. Sɩdã, yẽnda sẽn ta be wã, a yii be ne a Zoram n na n sega a Nimsi biig a Zehu, la Sẽn-Ka-Saab yaool n dag n kɩtame tɩ b pʋdg a Zehu zugã kaam n yãka t'a menes a Akaab buudã.
A Zehu sẽn wa n pids Wẽnnaam bʋ-kaoorã a Akaab buudã zugã, a sega a Zʋʋda nanambsã ne a Akaazɩya kẽem-dãmbã kamb sẽn da yaa rĩma tʋmtʋmdbã, la yẽnda kʋ-b la zãnga.
A Zehu kɩtame tɩ b baoo a Akaazɩya. La a Akaaziyaas rag n kẽe Samaari tẽmsã n soonde. La b yõk-a lame n wa kɩs a Zehu t'a kʋ-a, la b mum-a lame n yetẽ: «Yaa a Zozafat sẽn da baood Sẽn-Ka-Saabã ne a sũur fãa wã, biiga.» A Akaazɩya roogẽ wã, ned dag n ka leb n be sẽn dag n tõe n dɩ naam ye.
La a Zoseba sẽn yaa rĩma bi-puglã dɩka a Akaazɩya biig a Zoaas n yiis rĩmã kamb sẽn dag n dat n kʋ wã sʋka, la yẽnda tɩ solga biigã ne a yaoondã Sẽn-Ka-Saab roogã ro-gãag pʋgẽ. Woto Rĩm a Zoram bi-pugl a Zoseba sẽn yaa maan-kʋʋd a Zehozada paga, n yaa a Akaazɩya tão-poakã solga a Zoaas tɩ b ka paam-a n kʋ ye.