सबहिं लोग एक संग मिलिके राजा क संग परमेस्सर क मन्दिर मँ एक ठु सन्धि किहन। यहोयादा एन लोगन स कहेस, “राजा क पूत हुकूमत करी। इहइ उ बचन अहइ जउन यहोवा दाऊद क संतानन क सम्बंधित दिहे रहा।
लेवीबंसियन जरूर राजा क नजिक रहइ चाही। हर एक मनई अपनी तरवार अपने संग रखी। जदि कउनो मनई मन्दिर मँ प्रवेस करइ क कोसिस करत ह तउ उ मनई क मार डावा। तू पचन्क राजा क संग रहब बाटइ उ जहाँ।”
लेवीबंसी अउ यहूदा क सबहिं लोग याजक यहोयादा जउन आदेस दिहस, ओकर पालन किहस। याजक यहोयादा याजकन क समूह मँ स कउनो क छूट नाहीं दिहस। इ तरह हरेक सेनापित आपन सबहिं लोगन क जउन सबित क दिन सेवा मँ जात रहेन, अउर जउन सेवा मँ नाहीं जात रहेन लइ लिहेन।
तब यहोयादा लोगन क बताएस कि ओनका कहाँ खड़ा होब अहइ। हर एक मनई अपने हथियार अपने हाथ मँ लिहे रहा। उ पचे मन्दिर क दाई अउ बाई सबइ रासतन मँ खड़ा भएन। उ पचे वेदी, मन्दिर अउर राजा क निचके खड़े रहेन।
उ नजर दउड़ाएस अउर राजा क लखेस। राजा राज स्तम्भ क संग सामनेवाले दुआर पइ खड़ा रहा। अधिकारी अउ लोग जउन तुरही बजावत रहेन, राजा क लगे रहेन। देस क लोग खुस रहेन अउर तुरही बजावत रहेन। गायक संगीत क बाजन क बजावत रहेन। गायक बड़कई क गायन मँ लोगन क अगुवाई करत रहेन। तब अतल्याह अपने ओढ़नन क फारि डाएस, अउर उ कहेस, “सड्यन्त्र, सड्यन्त्र।”