A kô sarina liata, theihthaipa Zehôdâ cha a tha a patlô ta, pheisaih za kha hyutuhpa, Zehôrâ sawchapawpa Azariah, Zehôhanâ sawchapawpa Ismela, Ôbedâ sawchapawpa Azariah, Adiah sawchapawpa Mâsei nata Zikari sawchapawpa Elisaphâ zy hnohta biehrai tao ta.
Zawpi ahmaohpakhypa zydua ta abei hnohta Khazohpa o liata biehrai tao ei ta. Zehôdâ ta ama hnohta, “Abei saw he moh teh u! Abeipa ta Dâvi pathlazy thâtih a vaw rei hapa hawhta, ano he â bei awpa a châ.
Theihthaipazy nata chakaotuhpa Livai pathlazy tah leipa ta cha, ahy hmahta Abeipa o liata amâ ngia awpa châ vei. Âmo deikua cha ama pathaihpa vâta a ngia aw ei ta, zawpi zydua deikua cha Abeipa ta su a raopazy liata ama vaih aw.
Livai pathlazy ta ama chaihrai chabapa ta, abei cha chadô aw ei ta, o liata a vaw ngiapa maih ama thie lymâ aw. Abei puana nata angiana maihta a hnohta nama y lymâ aw,” tah ta.
Livai pathlazy nata Zudâh mo zydua ta theihthaipa Zehôdâ biepiepa zydua hawhta tao ei ta. Ama hyutuhpazy ta Pahânoh ta chakaona rai a hria awpa nata a pahâ awpazy a vaw chhi chyu ei ta. Theihthaipa Zehôdâ ta Pahânoh ta a pahâ awpazy cha pahâsa leipa ta.
Abei sawchapawpa cha vaw puakhei ei ta, beilakho pakho ei ta, biehraina ryuchâ pie ei ta. Chatawhcha bei ta phuah ei ta, Zehôdâ nata a sawchapawzy ta Zôasâ cha sathawthu ei ta, “Abei cha hroh pareih mawh sy,” tah ei ta.
Mohmia pasaih ta, chhikao liata otôh kiapâh liata bei a duahpa cha hmô ta. A kiapâh liata pheisaih za kha hyutuhpazy nata chiahmie tôtuhpazy y ei ta. Râh chyhsa zydua cha thaphapa ta y ei ta, chiahmiezy thata tô ei ta. Hlasathaipazy ta ama pyungiapa chhaichhizy tôpa ta reithaina hlazy chhihtha ei ta. Athaliah cha a pohzy hrie ta, “Râh apaphasaina! Râh apaphasaina!” tahpa ta awh ta.
Theihthaipa Zehôdâ ta pheisaih za kha hyutuhpazy a chhi ta, ama hnohta, “Pheisaihzy likawh liata kaw puakhei u la, ahy rai ano a zipa maih cha zaozi ta thie awpa a châ,” tah ta. Theihthaipa ta, “ Abeipa o liata la thie awpa châ vei,” a tahpa vâta ama kaw puakheipa a châ.
Chatawhcha zawpi zydua cha Bâlâ achhyna o lâ vawh ei ta, achhyna o cha parao ei ta, Bâlâ maisâhzy nata a nothlahpazy pakeichheih ei ta, Bâlâ theihthaipa Mâtâ cha maisâh thaby liata thie ei ta.
Chatawhcha Zehôdâ ta theihthaipazy nata Livai pathlazy chhihthana ry liata Abeipa o vaituhpazy rao ta. Âmo cha Mawsi ryhpa châbu liata ropa hawhta, Abeipa lâta raopa hlânazy hlâ awpa ta, Dâvi ta Abeipa o mohôhtuhpa ta a raopazy châ ei ta, Dâvi biepiepa hawhta, cha rai cha thaphapa nata hlasana chôta a hria awpazy ama châ.
Theihthaipa ta pheisaih za kha hyutuhpazy, nôpawpazy, zawpi a vaotuhpazy nata râh chyhsa zydua a chhi ta, abei cha Abeipa o tawhta a zâ chhi ei ta, machhua chhikao siepahliepa ta abei o lâ pangai ei ta. Abei cha ryureina beidyuchhai liata patyu ei ta.