E higa mar abiriyo, Jehoyada notimo chir motimo winjruok gi jotend ogend lweny, ma gin Azaria wuod Jehoram, gi Ishmael wuod Jehohanan, gi Azaria wuod Obed, gi Maaseya wuod Adaya, kod Elishafat wuod Zikri.
Gima onego utim e ma: Un jodolo gi jo-Lawi kod jorit rangeye, pogreuru migepe adek. Migawo mokwongo mondo obi e Hekalu chieng’ Sabato. Migawo mar ariyo nyaka rit od ruoth,
Jodolo gi jo-Lawi makonyogi kende ema nyalo donjo e Hekalu, nimar gin joma owal ni Ruoth Nyasaye, to ji mamoko duto kik donji kata achiel, kaluwore gi chik Ruoth Nyasaye.
Jo-Lawi nyaka lwor ruoth ka girite, ka ng’ato ka ng’ato omako gilwenje e lwete. Ka ng’ato moro amora dwaro donjo e Hekalu, to negeuru. Bende kamoro amora ma ruoth dhiye, to koweuru kurite.”
Jo-Lawi gi jo-Juda duto notimo gik moko duto mana kaka Jehoyada jadolo nochikogi. Ng’ato ka ng’ato kuomgi nokelo joge mane onego a e tich chieng Sabato, kaachiel gi mago mane onego ochak tich chieng’no, nimar Jehoyada jadolo ne ok omiyo migawo moro amora thuolo mara.
Nochano ji duto mondo orit ruoth, ka ng’ato ka ng’ato omako gilweny e lwete, chakre yo milambo nyaka nyandwat mar Hekalu, ka giluwo kendo-mar-misango kaachiel gi Hekalu.
Eka Jehoyada nogolo ruoth oko, mosidhone osimb duong’, kendo omiye kitap chik, mi gikete ruoth. Jehoyada gi yawuote nowire gi mo ka gikok niya, “Ruoth mondo odag aming’a!”
Noneno ruoth kochung’ e bath sich ruoth e dhoot, ka tung’ ywak kendo ji wer. Ji duto ne mor kendo ne goyo tung’, ka jower otelonigi gi thum. Athalia noyiecho lepe ka kok niya, “Ujemo! Ujemo!”
Jehoyada noketo jorit e Od Ruoth Nyasaye e bwo jodolo gi jo-Lawi. Daudi nosechano jodolo gi jo-Lawi mondo orit Od Ruoth Nyasaye, kendo omiye misengni miwang’o pep, kaka ondiki e chik Musa, ka giwero wende mor kaluwore gi chik mane en owuon ogolo.
Eka nodhi gi jotend askeche gi jodongo kod jotend ji kaachiel gi ji duto, kendo ne giwuok gi ruoth e Od Ruoth Nyasaye. Ne gikowe nyaka od ruoth, ka giluwo dhorangach mamalo, mi ne gikete e kom duong’ne.