Eze lẹ Jehoyada nọ we egho hụ ye ndị hụn ọrụn idọnzi Ụlọ-nsọ Osolobuẹ rị ẹka. Ịya kẹ wẹ gi we ndị e dọn ụlọ lẹ ndị a ma ụlọ nị wẹ dọnzi Ụlọ-nsọ Osolobuẹ; e wezikwọ we ndị gi igwe-mmaka lẹ igwe-bronzu a rụn ọrụn nị wẹ dọnzi Ụlọ-nsọ Osolobuẹ.
Ya Mmọn Chuku nọ ban imẹ Zẹkaraya nwa Jehoyada hụn wụ onyẹ nchụn-ẹjan. Ọ nọ wuzo idẹnya wẹ, sị, “Lee ni ihiẹn Chuku ku: ‘Kị haịn ụnụ gi a pa oku Osolobuẹ? Ọ rịkọnị ụnụ mma. Ebe ụnụ gbakitọ Osolobuẹ azụụn, Osolobuẹ a gbakitọgụọ ụnụ nwẹn azụụn!’ ”
Eze wụ Jụashị anyanhandẹni ọhụnma Jehoyada nẹdi Zẹkaraya mẹn'ẹ. O gbu nwa a. Ihiẹn Zẹkaraya ku ebẹhụ ọ rị alị a lụ ọnwụn wụ: “Osolobuẹ ya lee ihiẹnni, jụ ụnụ ukwere ẹ.”
Ọsụọn'a nị ndị-agha alị Aram bịanị ebuni ọda, Osolobuẹ e bukwọ ndị agha Juda ka wẹ ọda che wẹ ẹka mẹri. Makẹni Juda gbakitọ Osolobuẹ wụ Chuku ndị nẹdi wẹ azụụn, ya kẹ Osolobuẹ gi nwan ye Jụashị afụnfụn.
Ndị Aram rụ Jụashị eje-ẹhụ nị wẹ d'a lama. Ndị ọ rị a kị nọ zun'ẹ eje umẹ makẹni o gbu nwa Jehoyada onyẹ nchụn-ẹjan, wẹ nọ gbu ya nwẹn tọ elu bẹdi. Ọ nọ nwụnhụn; ya wẹ nọ li ẹ ye imẹ Obodo hụ Defidi tụn, kanị elini w'ẹ ye ebe w'e liye ndị-nze.