Si Joas pito ka tuig sang nagsugud sia sa paghari, kag naghari sia sing kap-atan ka tuig sa Jerusalem; ang ngalan sang iya iloy si Sibia sang Beer-seba.
Kag gintipon niya sing tingub ang mga sacerdote kag ang mga Levinhon, kag nagsiling sa ila, “Kadto kamo sa mga banwa sang Juda, kag tipon kamo sing cuarta gikan sa bug-os nga Israel sa pagkaayo sang balay sang inyo Dios sa tuigtuig; kag tatapa nga padalion ninyo ang butang.” Apang ang mga Levinhon wala magpadali sini.
Gani ginpatawag sang hari si Joiada nga puno, kag ginsilingan sia, “Ngaa bala nga wala mo pagkinahanglana sa mga Levinhon nga dalhon nila gikan sa Juda kag sa Jerusalem ang buhis ni Moises, nga alagad sang Ginoo, sa katilingban sang Israel nga sa layanglayang sang pagpamatuud?”
Kay ang mga lalaking anak ni Atalia, yadto nga malaut nga babayi, nagguba sang balay sang Dios; kag ang tanan man nga nahalad nga butang sang balay sang Ginoo ginhatag nila sa mga Baal.
Kag ginpabantala nila sa Juda kag sa Jerusalem, sa pagdala nga sa Ginoo sang buhis nga ginsukut sa Israel sa kamingawan ni Moises nga alagad sang Dios.
Kag sa bisan anong tion gindala ang kaban sa mga manugdumala sang hari paagi sa kamut sang mga Levinhon, kon makita nila nga may madamu nga cuarta, ang escriba sang hari kag ang manugdumala sang puno nga sacerdote nag-abut kag naghuwad sang kaban kag nagkuha sini kag nag-uli sini sa iya duug. Amo ini ang ginhimo nila adlawadlaw, kag nagtipon sing bugana nga cuarta.
Kag ginhatag ini sang hari kag ni Joiada sa naghimo sang buluhaton sang pag-alagdan sang balay sang Ginoo, kag nagsohol sila sing mga cantero kag mga panday sa pagkaayo sang balay sang Ginoo, kag sa mga nagsalsal man sing salsalon kag saway sa pagkaayo sang balay ang Ginoo.
Gani ang mga manugpangabudlay naghikut, kag ang hilikuton sang pagkaayo nagpadayon sa ila mga kamut, kag ginpahamtang nila ang balay sang Dios sa iya nagakaigo nga kahimtangan kag ginpalig-on ini.
Kag sang nahuman nila, gindala nila ang nabilin sang cuarta sa hari kag kay Joiada, nga sa sini ginhimo ang mga gamit nga sa balay sang Ginoo, sa pag-alagad kag sa pagdolot, kag mga kutsara, kag mga gamit nga bulawan kag pilak. Kag nagdolot sila sing mga halad-nga-sinonog sing dalayon sa balay sang Ginoo sa tanan nga adlaw ni Joiada.
Kag ginbayaan nila ang balay sang Ginoo, ang Dios sang ila mga ginikanan, kag nag-alagad sa mga Asherim kag sa mga diosdios. Kag ang kasingkal nag-abut sa Juda kag sa Jerusalem tungud sini nga ila pagkamalinapason.
Niyan ang Espiritu sang Dios nag-abut kay Zacarias nga lalaking anak ni Joiada nga sacerdote; kag sia nagtindug labaw sa katawohan, kag nagsiling sa ila, “Amo ini ang ginasiling sang Dios, ‘Ngaa bala nga ginalalis ninyo ang mga sogo sang Ginoo, sa bagay nga indi kamo makauswag? Bangud nga ginbayaan ninyo ang Ginoo, sia man nagbiya sa inyo.’”
Sa amo si Joas nga hari wala makadumdum sang kalolo nga ginhimo sa iya ni Joiada nga amay ni Zacarias, kondi ginpatay ang iya anak nga lalaki. Kag sang tagumatayon sia, nagsiling sia, “Magtan-aw sini ang Ginoo kag magtimalus!”
Sa pagsapul sang tuig nagtaklad batok kay Joas ang hangaway sang mga Siriahanon. Nag-abut sila sa Juda kag sa Jerusalem, kag ginlaglag ang tanan nga principe sang katawohan, kag ginpadala ang tanan nga inagaw sa ila sa hari sang Damasco.
Bisan ang hangaway sang mga Sirianhon nag-abut nga may diotay nga kabon sang mga tawo, ang Ginoo nagtugyan sa ila kamut sang labi gid kadaku nga kasoldadosan, bangud nga ginbayaan nila ang Ginoo, ang Dios sang ila mga ginikanan. Sa amo naghikut sila sing paghukom kay Joas.
Sang nakataliwan sila sa iya, nga ginbilin nila sia nga napilasan sing tama, nagpuhon batok sa iya ang iya mga alagad bangud sang dugo sang mga lalaking anak ni Joiada nga sacerdote, kag ginpatay sia sa iya higdaan. Gani napatay sia; kag ginlubung nila sia sa banwa ni David, apang wala nila pag-ilubung sia sa mga lulubngan sang mga hari.
Nahanungud sa iya mga anak nga lalaki, kag sa kadaku sang mga lulan nga ginpahamtang sa iya, kag sa pagkaayo sang balay sang Dios nasulat sila sa Kasaysayan sang Tolon-an sang mga Hari. Kag naghari sa tal-us niya si Amasias nga iya anak nga lalaki.