Nochoko jodolo gi jo-Lawi, mowachonigi niya, “Wuothuru e miech Juda, usol pesa kuom jo-Israel duto mondo ulosgo od Nyasachu higa ka higa. Neuru ni utimo piyo.” To jo-Lawi ne ok otimo kamano.
Omiyo Ruoth noluongo Jehoyada jadolo maduong’, mopenje niya, “Ang’o momiyo ok ijiw jo-Lawi mondo osol osuru kuom jo-Juda gi jo-Jerusalem? En osuru mane Musa jatich Ruoth Nyasaye oketo kuom jo-Israel mondo olosgo Hemb-Romo.
E kinde ka kinde mane jo-Lawi onenoe ka pesa ng’eny e sanduk, ne gitere ni jodong ruoth. Eka jogoro mar ruoth gi jatich jadolo maduong’ ne jobiro mondo okaw sanduk. Kane gisegolo pesa, ne gidwoko sanduk kare. Kamano e kaka ne gitimo pile pile, mi ne gichoko pesa mogundho.
Ruoth kod Jehoyada nomiyo nyipeche mane rito tich loso Od Ruoth Nyasaye pesago. Jogo nondiko jogedo gi jopa bao kod joma olony e tich chuma, gi mula mondo olos Od Ruoth Nyasaye.
Kane gisetieko tich, ne gikelo pesa modong’ ni ruoth gi Jehoyada, mi ne gilosogo tewni mag ubani gi agulini mag dhahabu gi mag fedha mondo okonyruokgo e Od Ruoth Nyasaye kuom misengni miwang’o pep, kod tije moko mag Hekalu. Ne gitimo misengni miwang’o pep e Od Ruoth Nyasaye pile pile ndalo duto mag Jehoyada.
Roho mar Nyasaye nobiro kuom Zekaria wuod Jehoyada jadolo, mi nochung’ kama oting’ore, mowacho ni ji niya, “Nyasaye owacho kama, ‘Ang’o momiyo uketho chikna, momiyo ok unyal yudo hawi? Un useweya, omiyo an bende aseweyou.’ ”
Kamano wi ruoth Joash nowil gi ng’wono mane Jehoyada otimone, konego Zekaria wuod Jehoyada ma notho kaywak niya, “Ruoth Nyasaye mondo one, kendo ochul kuor.”
Bang’ higa achiel jolweny ma jo-Aram nobiro monjo Joash. Ne gibiro Juda gi Jerusalem, mi ne ginego jodongo duto mag pinyno, to mwandu duto mane gikawo kuomgi ne gioro ni ruodh Damaski.
Kane jo-Aram osea, ne giweyo Joash kohinyore malit. Eka jodonge noriwone nikech remb wuod Jehoyada jadolo, mi ne ginege e kitandane. Kamano e kaka notho, mi ne giyike e dala Daudi, to ok kar yiko ruodhi.
Weche mang’eny mane jonabi okoro kuome ka gisiemego, kendo kaka noloso Od Ruoth Nyasaye, kaachiel gi timbe yawuote, ondiki e kitabu monyisie weche mag Kitap Ruodhi. Amazia wuode nodoko ruoth kare.