Amazia yuma daa nyɛla yuun’ pisinaanu saha shɛl’ o ni daa di nam maa. O daa di nam maa ʒini Jɛrusalɛm la yuun’ pihitayinika. O ma yuli n-daa booni Jɛhɔadan. O ya n-daa nyɛ Jɛrusalɛm.
Amaa o daa bi chɛ ka bɛ ku bɛ bihi bɛna, kaman di ni daa sabi shɛm Musa zaligu kundi ni la. Luɣ’ shɛli Yawɛ ni daa yɛli, “Di kunya bihi banima bɛ bihi taali zuɣu bee n-ku bihi bɛ banim’ taali zuɣu, amaa di simdi ni sokam kpila omaŋmaŋ’ taali zuɣu.”
Ka Amazia daa laɣim Judanim’ na nti piripiri ba kaman bɛ daŋ ni nyɛ shɛm, n-zaŋ ba ti sapashin’ kpamba mini bɛn su tɔbbihi tuhilituhili mini kɔbigakɔbiga fukumsi Juda mini Bɛnjamin tiŋgbana maa ni zaa. Ka o daa laɣim nachimba bɛn paai yuun’ pisi zaŋ chana, n-nya ka bɛn mali yaa ka ni tooi gbibi kpana mini nyɔtaɣirisi chaŋ tɔbu kalinli nyɛla niriba tuhi’ kɔbisita.
Amaa ka Naawuni nira daa chaŋ naa maa sani ti yɛl’ o, “N dan’ naa, di chɛ ka Izraɛl tɔbbihi ŋɔ pahi dol’ a chaŋ, dama Yawɛ ka Izraɛlnim’ bɛn nyɛ Ifriim zuliya ŋɔ zaa so sani.
Amaŋmaŋ’ cham’ ti tuhi, mali kpiɔŋ tɔb’ maa tuhibu ni. Di yi pa lala Naawuni ni ŋme a luh’ a dimnim’ maa tooni. Dama Naawuni mali yiko din ni sɔŋ nira bee n-ŋme o luhi.”
Ka Amazia daa bɔhi Naawuni nira maa, “Ka n ni pun zaŋ anzinfa kilɔgiram tusaata ni kɔbisinahi shɛli da Izraɛl tɔbutuhiriba maa na, wula ka ti lee yɛn niŋ zaŋ chaŋ di polo?” Ka Naawuni nira maa garigi yɛl’ o, “Yawɛ ni tooi ti a anzinfa din gari li.”
Di saha ka Amazia daa chɛ ka tɔbutuhiriba bɛn daa yi Ifriim tiŋgban’ ni na maa lab’ kuli. Ka bɛ suhuri daa yiɣisi pam bahi Judanim’ zuɣu ka bɛ je suli pam lab’ kuli.
Ka Judanim’ maa daa gbahi ninvuɣ’ nɛma mi tuhi’ pia. Ka bɛ daa zaŋ ba du Sɛla Zoli zuɣu nti daai ba Sɛla Zoli maa zuɣu luhi zolɔŋni, ka bɛ zaa chɛrisichɛrisi.
Amaa ka Amazia ni daa zaɣisi ni tɔbutuhiriba shɛb’ di dol’ o chaŋ tɔb’ maa ni ka kari ba ni bɛ kulim’ maa daa kana ti liri Juda tin’ shɛŋa, zaŋ Samaria hal ni Bɛtihɔrɔn n-daa ku niriba tusaata ka di nɛma pam.
Ka Yawɛ daa je suli niŋ’ o, ka daa tim anabi o sani ka o ti yɛl’ o, “Bɔ n-niŋ ka a jɛmdi tinzun’ buɣ’ shɛŋa din daa bi tooi tiligi dimaŋmaŋ’ niriba a nuu ni la?”
Amaa o ni daa yɛri lala maa, ka naa yɛl’ o, “Fom’ a noli, ŋuni n-lee zaŋ a leei naa saawaralana? Bɔ n-niŋ ka a yɛn bo kum ti amaŋa?” Ka anabi maa daa fo, amaa ka lee yɛli, “M mi ni Naawuni n-lo ni o ku a a ni tum shɛm ka zaɣisi n yɛligu wumbu maa zuɣu.”
Di saha ka Naa Amazia ŋun daa nyɛ Juda naa maa daa mali o kpamba saawara, ka tim ti yɛli Naa Jɛhɔash ŋun daa nyɛ Izraɛl naa, ka nyɛ Jɛhɔahaz bia, ka nyɛ Jɛhu yaaŋa la ni o kana ti chɛ ka bɛ nina pali taba.
Ka Izraɛl Naa Jɛhɔash mi daa tim ti yɛli Naa Amazia ŋun daa nyɛ Juda naa maa, “Lɛbanɔn zoya zuɣu goo tutuɣu daa ti tim ti yɛli Lɛbanɔn sida tia, ‘Zaŋm’ a bipuɣiŋga ŋɔ ti ma ka n ti n dapal’ ŋɔ ka o niŋ o paɣa. Ka Lɛbanɔn mɔɣu ni biŋkɔbigu daa garita n-no goo maa sɔŋ tiŋa.’
Ka Izraɛl Naa Jɛhɔash daa gbaai Juda Naa Amazia ŋun daa nyɛ Jɛhɔash bia, ka nyɛ Ahazia yaaŋa la Bɛtishɛmɛshi n-zaŋ o chaŋ Jɛrusalɛm nti daai Jɛrusalɛm goondaa luhi hal ti miri mita kɔbisiyi wɔɣilim tariga. O daa pilila Ifriim dunɔdal’ la shee n-daai li luhi hal ti paai goon’ gɔŋ dunɔdal’ la shee.
O daa va salima mini anzinfa n-tabili Naawuni jɛmbu duu neen’ shɛŋa din daa beni ka Obɛdɛdom bihi gul’ li la zaa, ka va nayili daazichi zaa, ka gbahi ninvuɣ’ shɛb’ daba n-lab kuli Samaria.
Saha shɛli Amazia ni daa chɛ Yawɛ jɛmbu maa, ka bɛ daa lo ni bɛ ku o Jɛrusalɛm, ka o daa zo n-kuli Lakishi. Amaa ka bɛ daa chɛ ka shɛb’ chaŋ Lakishi maa nti ku o nimaani.