×

Ika Bible 2018

2 Ihiẹn Mẹni 25

1
Amazia rị nwa ahụa isẹn kwasị ọgụn k'o họnrin eze. Jerusalẹm k'ọ nọ kị; ahụa itenẹi kwasị ọgụn k'ọ kị. Nnẹ ẹ wụ Jehụadini onyẹ Jerusalẹm.
2
Amazia e te mẹghọ ihiẹn rị Osolobuẹ mma ẹnya, kanị o gini obi ẹ ile mẹ ẹ.
3
Ogẹn ọkịkị a gi turugụ ọhụnma, ọ nọ gbu ndị-isi hụ gbu nẹdi ẹ.
4
Kanị o gbuni mmụ wẹ, o mẹ ẹ hụ kẹ Iwu dọn ku, imẹ Ẹhụhụọ Mozizi, ebahụn Osolobuẹ nọ sị, “Egbukọ wẹ nẹdi yeni nwa; egbukọ wẹ nwa yeni nẹdi; njọ onyẹ kẹ wẹ k'e gbun'ẹ.”
5
Amazia a kpọkikomẹ ndị Juda, dọnmẹsọnmẹ wẹ ikp'ụlọ-ikp'ụlọ okpuru ndị ọkị-agha uku lẹ ndị ọkị-agha nta, kẹ ebọn Juda ile kẹ ebọn Bẹnjamini; ọ gụn ikẹnnyẹ rị ahụa ọgụn shi elu, ọ nọ hụn a nị wẹ rị nnụ-uku ọgụn-mmisẹn (300,000) k'a s'ẹka lụ agha, mazị gi obo lẹ akpaịn lụ agha.
6
Ọ nọzị gi ẹkpa siliva uku ọgụn-isẹn we odogun-agha Izrẹlụ Ẹbamịn ugu nnụ-uku ọgụn-isẹn (100,000) ọrụn.
7
Kanị odibo Osolobuẹ nọ bịa d'e kunrun eze, sị a, “Agụ! Anịkwọlẹ ndị-agha Izrẹlụ Ẹbamịn ugu ndịnị sọnjẹn i agha, makẹni Osolobuẹ lẹ wẹ wụ ndị Ifrem arị!
8
Makẹni, i wejẹn wẹ, ọsụọ ị lụ aghanị kẹ odogun-agha, Chuku k'e mẹ ndị-iṅẹnrẹn i mẹri i, makẹni ẹka Osolobuẹ k'ọ rị iyeni ịhịan ẹka lẹ imẹri ịhịan.”
9
Amazia nọ sị odibo Osolobuẹ, “Nanị m'e mẹ nwan ẹkpa siliva uku ọgụn-isẹn m gi we ndị-agha Izrẹlụ ndịnị?” Odibo Osolobuẹ hụ nọ sị a, “Osolobuẹ k'a s'ẹka yekarịdẹ i ọhụn.”
10
Ya Amazia nọ sị ndị-agha Ifrem Izrẹlụ Ẹbamịn ugu hụ bịa d'a za a oku wẹ gharị. Wẹ nọ wemẹni ndị Juda iwe, gi okẹn ọnụma la.
11
Amazia nọ tashimẹ, duru ndị-agha a shi agha imẹ Ọdanmgbugbu-nnu; o gbu ndị Sẹẹ nnụ-uku iri (10,000) imẹ agha hụ.
12
Ndị-agha Juda hụ nọzị gi ẹka nwụn mmadụ nnụ-isẹn kwasị ọgụn, we wẹ shi elu ọmụma jẹn elu, gha ebahụn nutu wẹ, wẹ ile nọ dangungwọn.
13
Ogẹnni, ndị-agha Izrẹlụ Ẹbamịn ugu ahụn Amazia sị wẹ lama ọ nịlẹni sọnjẹn ẹ agha nọ mayesọnmẹ obodo ndị Juda rịsọnmẹ ẹgbata Sameria lẹ Bẹt-Họrọnụ. Ndị wẹ gbu imẹ obodo ndịnị wụ mmadụ nnụ-uku ẹtọ, e kpọnrin wẹ ihiẹn ọda-ọda.
14
Ogẹn Amazia gi mẹrigụ ndị Ẹdọm lụaha, o kpọnlụa mmọn ndị ahụn ndị Sẹẹ a rụa. Ọ nọ kọmarịn wẹ, rụama wẹ, a kụnị wẹ isi-alị, a mụnị wẹ nsẹnsi.
15
Okẹn olulu nọ bu Osolobuẹ banyeni Amazia; ọ nọ zi onyẹ-amụma d'a jụ a, “K'ị rị e feni mmọn ndị alị Sẹẹ hụn salẹni ẹka zụọpụha ndị nke ẹ ẹka ị?”
16
Kanị eze e gbu oku ye ẹ ọnụ, sị, “Onyẹ tumẹ i onyẹ-ndụnmọdụn eze? Gba nkịtịn! Ra ị chọ nị wẹ gbu i?” Ya onyẹ-amụma nọ kubehi, kanị ọ sị, “Makẹ ihiẹnni i mẹ lẹ ndụnmọdụn m ị jụ, a marịnọlẹ m nị Osolobuẹ chọ n'o gbu i.”
17
Amazia lẹ ndị a dụn a ọdụn nọ ku kẹ wẹ mẹ ndị Izrẹlụ Ẹbamịn ugu mayeni wẹ, ọ nọ zi ozi jẹnni eze Izrẹlụ Ẹbamịn ugu wụ Jehụashị nwa Jeho-ahazị nwa Jehu, kpọ a mgba, sị, “Bịa nị ẹnyi mẹ ẹ elee-m elee i.”
18
Kanị eze Izrẹlụ Ẹbamịn ugu wụ Jehụashị nọ gi iluni shịarị Amazia eze Juda: “Ẹfịfịa-ogun ohu rị Lẹbanọnụ zi ozi jẹnni okẹn-osisi sida rị Lẹbanọnụ, sị, ‘We nwa ị ye nwa m lụrụ.’ O mẹgụ anụ-ọfịa ohu nọ jẹnpụha, zọkpụkpọ ẹfịfịa-ogun nwẹn.
19
Y'a sịgụọ enwẹn i nị y'e mẹrigụọ Ẹdọm, ọ hụ e bu i isi. Ka nọdịkwọ iwe i! K'ị rị a chọnị oku k'e gbun'i, oku hụn k'e mẹ yụ lẹ ndị Juda dan?”
20
Kanị Amazia egọnni ntịn, makẹni Osolobuẹ rịchanrịn e mẹ n'o bu ndị Juda che ẹka Jehụashị mẹri, makẹni wẹ femẹ mmọn ndị Ẹdọm.
21
Ya kẹ Jụashị eze Izrẹlụ Ẹbamịn ugu nọ bịa d'a lụsọn wẹ agha. Ya lẹ Amazia wụ eze Juda nọ nọ Bẹt-Shẹmẹshi rị imẹ Juda lụ agha hụ.
22
Izrẹlụ Ẹbamịn ugu nọ mẹri Juda, onyẹ-onyẹ imẹ ndị-agha Juda nọ gbala iwe ẹ.
23
Jehụashị wụ eze Izrẹlụ nọ nwụndọn eze Juda wụ Amazia nwa Jụashị nwa Ahazia imẹ Bẹt-Shẹmẹshi. Jehụashị nọ wẹhẹ Amazia Jerusalẹm, gha Ọnụ-mgbọn Ifrem kụtu mgbọn Jerusalẹm d'e rukwọrị Ọnụ-mgbọn rị Ntugi hụn wụ ọb'ụkụ ọgụn-iri kwasị nnụ (500).
24
Ọ nọ burukwama goru lẹ siliva lẹ ihiẹn ile wẹ hụn imẹ Ụlọ-nsọ Osolobuẹ, ihiẹn ndị hụ Obẹdi-Ẹdọm e lepụ ẹnya, cheni ihiẹn ndị wẹ dọnmẹ imẹ obi-eze lẹ ndị ile ọ nwụnrụn, lashi Sameria.
25
Amazia eze Juda bizi ahụa mmisẹn kẹ Jehụashị nwa Jeho-ahazị wụ eze Izrẹlụ nwụnhụngụ.
26
Ihiẹn ndị ọzọ mẹni kẹ Amazia rị a kị, gha mbidọn d'e ru ọgụgụ, rị imẹ ẹkụkwọ ndị-nze Juda lẹ Izrẹlụ.
27
Amazia a latọgụ Osolobuẹ, wẹ nọ zun'ẹ eje umẹ imẹ Jerusalẹm, ọ nọ gbashi Lakishi. Kanị wẹ nọ zijẹn wẹ Lakishi, nọ ebẹhụ gbu ẹ.
28
Wẹ nọ gi ẹshin bulụa a, li ẹ ye ebe wẹ liye ndị nẹdi ẹ imẹ Obodo hụ rị Juda.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes