Bɔt i nɔ kil dɛn pikin dɛm, fɔseka wetin di lɔ se insay Mozis in buk usay PAPA GƆD kɔmand se, “Dɛn nɔ fɔ kil di Papa dɛm fɔseka dɛn pikin dɛm, ɛn dɛn nɔ kil di pikin dɛm fɔseka dɛn papa dɛm; bɔt ɔlman fɔ day fɔ inyon sin.”
Nain Amazaya gɛda di man dɛm na Juda wansay ɛn put dɛm bay dɛn papa dɛn os, ɔnda kɔmanda dɛm fɔ tawzin ɛn fɔ ɔndrɛd ɔndrɛd, fɔ di wanol Juda ɛn Bɛnjamin. I gɛda dɛn wan dɛm we ol frɔm twɛnti ia go ɔp, ɛn fɛnɔt se, dɛn na bin tri ɔndrɛd tawzin man we dɛn pik se, fit fɔ fɛt wa, ɛn dɛn ebul andul spia ɛn shild.
Nain Amazaya ansa di man ɔf Gɔd se, “Bɔt we di tri tawzin fo ɔndrɛd kilogram silva we a dɔn gi di Izrɛl ami? Nain di man ɔf Gɔd ansa am se, “PAPA GƆD ebul gi yu pas dat.”
Bɔt di man dɛm na di ami we Amazaya bin sɛn go bak we i nɔ bin gri lɛ fala am go fɛt, fɔdɔm pan di siti dɛm na Juda, frɔm Sameria to Bɛtɔrɔn ɛn kil bɔt tri tawzin pipul, ɛn tek bɔku bɔku tin dɛm.
We Mazaya kɔmɔt kil di pipul dɛm na Idɔm, i briŋ di gɔd dɛm we di man dɛm na Seir bin de wɔship, ɛn mek dɛm inyon gɔd dɛm ɛn wɔship dɛm ɛn de mek sakrifays to dɛm.
Fɔseka dat, PAPA GƆD bin vɛks pan Amazaya ɛn sɛn wan prɔfɛt to am we tɛl am se, “Wetin mek yu dɔn tɔn to ɔda pipul dɛn gɔd dɛm we nɔ ebul sev dɛn yon pipul kɔmɔt na yu an?
As i bin de tɔk, nain di kiŋ aks am se, “Udat mek yu advaysa fɔ di kiŋ? Tap an de! Wetin mek yu fɔ fɛn day?” So di prɔfɛt tap, bɔt tɔk se, “A no se PAPA GƆD dɔn mek ɔp fɔ nyakanyaka yu traŋa wan bikɔs yu dɔn biev bad, ɛn nɔ lisin to mi advays.”
Amazaya we na kiŋ na Juda aks advays ɛn sɛn go to Joash we na Jɛoeaz in bɔy pikin, ɛn Jiu in granpikin we na kiŋ na Izrɛl se, “Kam lɛ wi mit fes to fes if yu na man.”
Bɔt Kiŋ Jɛoash na Izrɛl sɛn wɔd to Kiŋ Amazaya na Juda se, “Wande, wan smɔl winji winji plant na Libanɔn sɛn mɛsej to wan big sida tik insay di vɛri Libanɔn se, i fɔ gi in gyal pikin to in bɔypikin fɔ mared. Na de wan wayl animal kɔmɔt na bush kam mas, mas di lili plant.
Na tru se yu dɔn dɔnawe wit Idɔm bɔt dat nɔ min se yu fɔ de mek prawd ɛn mek rudnɛs. If yu dɔn win, sidɔm saful, bɔt nɔ fɛn plaba ɛn mek yu ɛn Juda sɔri.”
Ɛn Joash we na kiŋ na Izrɛl, kapchɔ Amazaya we na kiŋ na Juda ɛn we na Joash i bɔy pikin ɛn Aezia in grampikin, na Bɛt Shɛmɛsh ɛn briŋ am kam Jerusɛlɛm, ɛn brok pan di wɔl na Jerusɛlɛm, bɔt sɔm tu ɔndrɛd mita, dat na frɔm Ifrem get to di kɔna get.
Ɛn i siz ɔl di gold ɛn silva ɛn ɔl di tin dɛm we dɛn de yuz na PAPA GƆD in os we i mit de, wit Obɛd Idɔm sɛf; dɛn i siz ɔl di dia dia tin dɛm na di kiŋ in os, ɛn tek sɔm pipul, ɛn tɔn bak go Sameria.