Ne ok onego nyithindgi, to noluwo chik mondiki e kitap Musa, kama Ruoth Nyasaye owachoe niya, “Kik uneg wuone nikech richo mag nyithindgi, bende kik uneg nyithindo nikech richo mag wuonegi, to ng’ato ka ng’ato noneg mana nikech richone owuon.”
To ng’at Nyasaye moro nobiro ire mowachone niya, “A Ruoth, kik iwe jolweny mag jo-Israel dhi kodi nimar Ruoth Nyasaye ok ni kod jo-Israel ma jo-Efraimgi.
Amazia nopenjo ng’at Nyasaye niya, “To wabiro timo ang’o kuom kilo alufu adek ma asemiyo jolweny ma jo-Israel?” Ng’at Nyasaye nodwoke niya, “Ruoth Nyasaye nigi teko mar miyi moloyo mago.”
To jolweny mane Amazia oriembo ni ok ginyal dhi kode e lweny nomwomore kuom miech Juda chakre Samaria nyaka Beth-horon, mi ne ginego ji alufu adek, kendo gipeyo gik mang’eny.
Bang’e Amazia ruodh Juda noporo wach gi joge mane ng’adone rieko, mi ooro joote ir Jehoash wuod Jehoahaz ma wuod Jehu, ruodh Israel, kowachone niya, “Bi mondo waradi.”
To Jehoash ruodh Israel nodwoko Amazia ruodh Juda gi ngero niya, “Okuro moro man Lebanon nooro wach ni yath maduong’ man Lebanon, kowachone niya, ‘Yie mondo wuoda okend nyari.’ To nopo ka le moro kadho kanyo, monyono okurono, moketho.
In Amazia, iwuorori ni iseloyo jo-Edom, mi koro iwuoyo gi sunga. To ber mondo ibed mana e dala. Ang’o momiyo iero miero ma biro tieki kaachiel gi jo-Juda?”
Jehoash ruodh Israel nomako Amazia wuod Joash ma wuod Ahazia, ruodh Juda, e Beth-Shemesh, modwoko Jerusalem. Nomuko bath ohinga mar Jerusalem ma borne mita mia ariyo, chakre dhoranga Efraim nyaka dhorangach kama ohinga ogomogo.
Nokawo fedha gi dhahabu kod gik moko duto mane onwang’o e Od Ruoth Nyasaye mane Obed-edom rito. Nokawo bende mwandu mag od ruoth, kaachiel gi ji moko, motueyo ka gir singo. Eka nodok Samaria.