Uzịa tụnyesọnmẹ ụlọ-nche jẹn elu imẹ Jerusalẹm: hụn ọ tụnye Ọnụ-mgbọn rị Ntugi, hụn ọ tụnye Ọnụ-mgbọn rị Ọdanmgbugbu lẹ hụn ọ tụnye ebe mgbọn nọ gbegi; o mẹ ụlọ-nche ndị hụ ze ọhụnma-ọhụnma.
Uzịa tụnzịkwọ ụlọ-nche jẹn elu ebe bu ọda imẹ atụ, gutọsọnmẹ ọmị bu ọda, makẹni o nwọn anụ bu ọda jun kẹ ukun-ugu wụ Shẹfẹla kẹ alị-aradan. Makẹni ugbo a sụọ a ọda-ọda, o nwọnghọzị ndị a rụnn'a ugbo lẹ alị vaịnị — kẹ elu òke kẹ ebe ọzọ alị nọ e mẹ ihiẹn ọhụnma.
Imẹ Jerusalẹm, ọ hụ a rụn ihiẹn-agha pụ-ichẹn wẹ gi akọ lẹ uche ropụha hụn wẹ gi a gba ụta lẹ ndị wẹ gi a gba mkporo hi-ogbe. O bu wẹ che elu ụlọ-nche lẹ ebe mgbọn obodo nọsọnmẹ gbegi. Ẹfan a hụ a kpọ, a kpọrudẹ ebe teni, makẹni Osolobuẹ e yekẹmẹkẹn'ẹ ẹka d'e ru ni ọkịkị a a gbọrị ọhụnma-ọhụnma.
Kanị, makẹni o turugụọ, obi Uzịa nọ karịma a ẹka, ọ nọ wiwi — o nupụ isi okpuru Iwu Osolobuẹ wụ Chuku ẹ banye Ụlọ-NSỌ Osolobuẹ d'e gi ẹka a mụye nsẹnsi ọkụn elu ukpo-nsẹnsị!
Ogẹn Azaria onyẹ-isi nchụn-ẹjan lẹ ndị nchụn-ẹjan ndị ọzọ ahụn ile gi lee ẹ, hụn a nị oti rị a ihun, wẹ nọ wepụ a ezi ozigbo-ozigbo. O te rịgụọdẹ ya nwẹn ẹnya n'ọ pụ, makẹni Osolobuẹ a tụgụọ a emu.
Uzịa nọ rọn oti o we nwụn. Ya sụọ bi ụlọ ọzọ, ya lẹ oti; w'a ra nị a sọnjẹn ndị-ọzọ Ụlọ-nsọ Osolobuẹ. Nwa a wụ Jọtam hụ e lepụ obi-eze ẹnya, a kị ndị alị Juda.