Ahaz yuma daa nyɛla yuun’ pisi saha shɛl’ o ni daa di nam maa. O daa di nam maa ʒini Jɛrusalɛm la yuun’ pinaayɔbu. O daa bi tum din tuhi Yawɛ sani kaman o yab’ Dauda ni daa tum shɛm la.
O daa tuɣindila tulaale zim Hinnom Bidibisi Vinvamli la ni, ka doli Yawɛ ni daa kari ninvuɣ’ shɛb’ tiŋgbɔn maa ni ka chɛ ka Izraɛlnim’ ʒini la ni daa tumdi din chihiri shɛl’ la soli n-zaŋd’ o bidibisi nyɔri buɣim maani buɣa.
Dinzuɣu ka Yawɛ ŋun nyɛ o Naawuni ŋɔ daa zaŋ o niŋ Siria naa nuu ni, ka bɛ daa tuhi nyaŋ o, ka gbah’ o niriba pam n-zaŋ ba kuli Damaskus. Naawuni daa lan zaŋ o niŋ Izraɛl naa nuu ni, ka o gba tuhi nyaŋ o, ka ku o niriba pam.
Rɛmalia bia Pɛka daa kula ninvuɣ’ tuhi’ kɔbiga ni tuhi’ pisi Juda tiŋgbani maa ni dahin yini, ka o ni daa ku shɛb’ maa mi zaa daa nyɛla tɔbutuhiri’ biinsi bɛ ni daa zaɣisi Yawɛ ŋun nyɛ bɛ yaannim’ Naawuni la zuɣu.
Ka Zikiri ŋun daa nyɛ Ifriim zuliya ni tɔbutuhiri’ biiŋa la daa ku nabia Maasɛya mini Azirikam ŋun daa nyɛ nayili sapashin’ kpɛm’ la ni Ɛlikana ŋun daa nyɛ kpambal’ kpɛma m-pa naa zuɣu la.
Ka Izraɛlnim’ maa daa gbahi bɛ mabihi Judanim’ maa niriba tuhi’ kɔbisiyi bɛn daa nyɛ paɣiba mini bidibisi ni bipuɣinsi, ka di nɛma pam n-zaŋ kuli Samaria.
Amaa Yawɛ daanabi so ŋun yuli daa booni Odɛd la daa be nimaani, ka o daa yi n-chaŋ ti tuhi tɔbbi’ shɛb’ bɛn daa labiri kuni Samaria na maa soli ka yɛli ba, “Nyamiya, Yawɛ ŋun nyɛ yi yaannim’ Naawuni ŋɔ ni je suli niŋ Judanim’ ŋɔ zuɣu n-chɛ ka o zaŋ ba niŋ yi nuu ni maa, amaa ka yi ku ba hal ka bɛ kubu maa yɛla ti lu Naawuni tibili ni.
Ka pumpɔŋɔ yi lan lo ni yi zaŋ Juda mini Jɛrusalɛm dɔbba mini paɣiba zaa leei yi daba. Yi bi mi ni yi gba tumla alahichi Yawɛ ŋun nyɛ yi Naawuni ŋɔ sani maa?
Bɛ daa yɛlila tɔbbihi maa, “Miriya ka yi zaŋ yi ni gbahi shɛb’ maa kpe yaŋɔ na, dama yi bɔri ni ti lan tumla taali Yawɛ sani m-pahi ti ni pun tum taal’ shɛli mini alahichi shɛli la zuɣu. Dama ti taali pun nyɛla din galisi, ka Naawuni suhu yiɣisi pam bahi Izraɛlnim’ zuɣu.”
Di saha ka bɛ ni boli ninvuɣ’ shɛb’ yuya ŋɔ daa yiɣisi n-zaŋ bɛ ni gbahi ninvuɣ’ shɛb’ na maa, ka zaŋ bɛ ni daa di neen’ shɛŋa na maa puuni situra ti bɛ ni bɛn zaa daa ka situra. Bɛ daa ti ba situra, ka lan ti ba namdanima mini bindira ni binnyura, ka daa niŋ kpam ʒe bɛ dansi. Bɛ daa lan zaŋ bɛ ni bɛn bi tooi chanila balisi bunsi n-zaŋ ba tahi bɛ mabihi bɛn daa be Jɛriko abie tihi tiŋ’ la ni sani. Di nyaaŋa ka bɛ daa lab’ kuli Samaria.
Ka Filistianim’ gba daa chaŋ ti liri Juda tin’ shɛŋa din be zolɔna ni mini Juda nudirigu polo n-tuhi fa Bɛtishɛmɛshi mini Aijalɔn ni Gɛdɛrɔt ni Soko ni di tiŋkpansi ni Timna mini di tiŋkpansi. Bɛ daa lan tuhi fa Gimzo mini di tiŋkpansi, ka ʒini nimaani.
Dama o daa maanila Damaskusnim’ bɛn daa tuhi nyaŋ o la buɣa, ka yɛli, “Siria buɣa maa n-daa sɔŋ Siria nanim’ maa ka bɛ tuhi nyaŋ ma maa, n gba ni maani ba ka bɛ sɔŋ ma.” Amaa dimbɔŋɔ daa lee tahila mbusim na ti luhi o mini Izraɛlnim’ zaa zuɣu.
Ka Ahaz daa yihi Naawuni jɛmbu duu lahi mini di nɛma zaa na nti ŋmaŋŋma Naawuni duu nɛma maa, ka kpari Yawɛ jɛmbu duu dunoya, ka me maligu bimbina zali Jɛrusalɛm lɔrigi kam ni.
Ka Ahaz daa ti faai siɣ’ o yaannim’ sani, ka bɛ sɔɣ’ o Jɛrusalɛm tiŋ’ puuni, amaa bɛ daa bi sɔɣ’ o Izraɛl nanim’ Silisi la ni. Ka o bia Hɛzɛkia daa di nam zan’ o zaani.