Yanni Akazi ka kɛ masacɛ ye, a sii tun ye saan mugan ye. A ye saan tan ni wɔɔrɔ kɛ masaya la Zeruzalɛmu. A ma koɲuman kɛ Masaba ɲakɔrɔ i n'a fɔ a bɛma Dawuda tun y'a kɛ cogo min na.
A ye fɛɛn kasadimanw jɛni Bɛninɔn kɔkɛnɛ na, ani k'a dencɛw jɛni tasuma na ka kɛɲɛ ni siya wɛrɛw ka landajuguw ye, Masaba tun ye minw gwɛn ka bɔ Isirayɛlidenw ɲa.
Masaba a ka Ala y'a don Siri masacɛ bolo. Sirikaw ser'a kɔrɔ k'a ka mɔgɔ caaman minɛ ka taga n'u ye Damasi. Masaba y'a don Isirayɛli mara masacɛ bolo fana, ale ser'a kɔrɔ k'a ka mɔgɔ caaman faga.
Isirayɛli mara mɔgɔw ye mɔgɔ waa kɛmɛ fila (200 000) minɛ u balima Zuda mara mɔgɔw cɛma, musow fara cɛdenw ani denmusow kan. U ye nafolo caaman ta ka kɔsegi n'a ye Samari.
Masaba ka kira dɔ tun be o yɔrɔ la, min tɔgɔ ko Odɛdi. Kɛlɛdenw kɔsegitɔ Samari, Odɛdi bɔra k'u kunbɛn k'a fɔ u ye ko: «Masaba aw faaw ka Ala dimina Zuda mara mɔgɔw kɔrɔ minkɛ, a y'u don aw bolo. Nga aw y'u halaki ni dimiba ye fɔɔ o mankan mɛnna sankolo kɔnɔ.
Efarayimu kɔmɔgɔ dɔw, Yoyanan dencɛ Azariyawu, ni Mesilemɔti dencɛ Berekiyawu, ani Salumu dencɛ Yeyizikiyawu, ni Adilayi dencɛ Amaza, wilila mɔgɔw kama minw kɔsegitɔ tun lo ka bɔ kɛlɛ kɛyɔrɔ la.
U y'a fɔ u ye ko: «Aw ye mɔgɔ minw minɛ, aw kana don n'o ye yan, o ka kɛ koo ye an kunna Masaba ɲakɔrɔ. Aw b'a fɛ ka dɔ fara an ka hakɛ n'an kunko kan Masaba ɲakɔrɔ wa? K'a sɔrɔ an kunko ka bon. Masaba diminin be Isirayɛlidenw kɔrɔ do.»
U ye mɔgɔ dɔw tɔgɔ wele. Kɛlɛdenw tun ye mɔgɔ minw minɛ ni fani t'u fɛ, nafolo min tun sɔrɔla kɛlɛkɛyɔrɔ la, o mɔgɔ nunu y'o dɔ ta k'olu bɛɛ fɛɛrɛbɔ n'a ye. U ye faniw ni sanbara, ani dumuni ni jii, ani fura mɔnta d'u ma. Minw tun te se ka taama, u ye olu bɛɛ yɛlɛ faliw kan ka taga n'u ye u balimaw fɛ Tamarosundugu la, min ye Zeriko ye. O kɔ, u kɔsegira Samari.
Filisiw tun bɔra ka taga don dugu dɔw la fanga la kulujukɔrɔ, ani Zuda mara worodugu ɲafan fɛ. U ye Bɛtisɛmɛsi ni Ayalɔn, ani Gederɔti minɛ ka fara Soko ni Timuna, ani Gimuzo n'u laminiduguw kan, ka sigi yen.
Masaba tun ye Zuda mara mɔgɔw dɔgɔya Isirayɛlidenw ka masacɛ Akazi kosɔn. Bari a tun ye Zuda mara mɔgɔw jaa gwɛlɛya ka kojugu kɛ, ani a ma tilen Masaba ma fewu fewu.
A ye Damasi joow sɔn, minw tun kɛra sababu ye Damasikaw ser'a kɔrɔ. A ko: «Siri masacɛw ka joow y'u dɛmɛ minkɛ, o la, ne bena u sɔn janko u ka ne fana dɛmɛ.» Nga olu kɛr'a ma sababujugu ye, ani Isirayɛlidenw bɛɛ ma.
A fana ye sɔnnikɛyɔrɔw lɔ Zuda mara dugu kelen kelen bɛɛ kɔnɔ, janko u ka fɛɛn kasadimanw jɛni siya wɛrɛw ka joow ye, k'a kɛ Masaba a faaw ka Ala dimin'a kɔrɔ.