×

Ika Bible 2018

2 Ihiẹn Mẹni 28

1
Ahazị rị nwa ahụa ọgụn họnrin eze. Ahụa mmisin k'ọ kị; imẹ Jerusalẹm k'ọ nọ kị. O mẹ ihiẹn rịlẹni mma ẹnya Osolobuẹ, o mẹni kẹ nẹdi ẹ kanị wụ Defidi dọn mẹ.
2
Nzọmụkụ ndị-nze azụụn hụn ẹbọ wụ Izrẹlụ Ẹbamịn ugu k'o sọn; ọ kpụrụsọnmẹ mmọn wẹ gi a rụa Baalụ.
3
Ọ chụn ẹjan wẹ dụn ọkụn imẹ Ọdanmgbugbu Bẹn-Hinọm, gi ụmụ a ikẹnnyẹ chụn ẹjan w'a dụn ọkụn. O mẹsọnmẹ ihiẹn rụnị, hụn alị ndị hụ Osolobuẹ chụpụ buche ndị Izrẹlụ e mẹ.
4
Ọ chụnsọnmẹ ẹjan ebe jẹn elu, elu-ugu ichẹn-ichẹn lẹ okpuru osisi ọwụlẹ duni nwọn igungun, a mụye nsẹnsi ọkụn.
5
Osolobuẹ wụ Chuku ẹ nọ bu ẹ che ẹka eze Aram. Ndị Aram nọ mẹri ẹ, kpụnrụn ndị nke ẹ bu ọda lashi Damaskọsụ. Osolobuẹ buzikwọ a che ẹka eze Izrẹlụ Ẹbamịn ugu, Izrẹlụ Ẹbamịn ugu nọ mẹri ẹ ọhụnma-ọhụnma:
6
ebe eze Izrẹlụ Ẹbamịn ugu wụ Pẹka nwa Rẹmalịa nọ, gi akp'ọkịn ohu gbu ndị Juda nnụ-uku ọgụn-isin (120,000) — wẹ ile wụ ndị odogun-agha. Ihiẹnni mẹ makẹni ndị Juda latọ Osolobuẹ, Chuku ndị nẹdi wẹ.
7
Odogun-agha ohu ndị Ifrem Izrẹlụ-Ẹbamịn hụn wụ Zikri gbu Maaseya nwa eze, Az'rikam hụn e lepụ obi-eze ẹnya lẹ Ẹl'kana hụn a hansọn eze.
8
Ndị-agha Izrẹlụ nọ kpọnnarịn umunẹ wẹ wụ ndị Juda inyẹnmẹ lẹ ụmụ-ikẹnnyẹ lẹ ụmụ-ikpoho: mmadụ nnụ-uku ọgụn-iri (200,000), kwarịzị ihiẹn bụ ọda, lakin Sameria.
9
Kanị O nwọnghọ onyẹ-amụma Osolobuẹ rị imẹ Sameria ebẹhụ. Ẹfan a wụ Odẹdi; ọ nọ jẹnburu ndị-agha hụ kẹ wẹ kinla Sameria. Ọ sị wẹ, “Osolobuẹ hụn wụ Chuku ndị nẹdi ụnụ gi olulu ọ rị e buni ndị Juda we wẹ ye ụnụ mẹri. Kanị ụnụ e gigụọ olulu jọgbu enwẹn ẹ ẹnya Osolobuẹ gbu wẹ eje-ogbugbu.
10
Ụnụ chọ nwan nị ụnụ gi ikẹnnyẹ lẹ ikpoho Juda lẹ Jerusalẹm họnrin igbọn. Ụnụ nwẹn emẹni Osolobuẹ njọ bu ọda?
11
Gọn ni m ntịn! Zikin ni nwan umunẹ ụnụ ndị Juda ụnụ nwụnhan, makẹni Osolobuẹ rị e buni ụnụ okẹn olulu.”
12
Ya kẹ ikẹnnyẹ ẹnọ imẹ ndị-isi Ifrem, ndị Izrẹlụ Ẹbamịn ugu, Azaria nwa Jehohananị, Bẹrẹkia nwa Mẹshilẹmọtụ, Jehiz'kịa nwa Shalum lẹ Amasa nwa Had'laị nọ sị ndị hụ gha agha lala,
13
“Ewẹhẹkwọlẹ ni ndị hụ ụnụ nwụnlụa ebeni makẹ ikpe ghakwọ a ma ẹnyi ebe Osolobuẹ rị. Ụnụ chọ nị ụnụ wechezini njọ lẹ ikpe-ọmụma ẹnyi? Ikpe manị ẹnyi e higụọ; Osolobuẹ rị nwan e buni ẹnyi ndị Izrẹlụ Ẹbamịn ugu olulu.”
14
Ya ndị agha nọ nọ idẹnya ndị isi hụ lẹ ndị ile rị ebẹhụ hapụ ndị wẹ kpụnrụn lẹ ihiẹn wẹ kwarị.
15
Ikẹnnyẹ ndị wẹ kpọ ẹfan họpụha nọ weri ndị ahụn wẹ nwụnlụa, kịrị ẹkwa imẹ ẹkwa wẹ kpọnlụa yimẹgụ ndị ile gba ọtọ. Wẹ nọ ye wẹ ẹkwa lẹ akpụkụ, ye wẹ ihiẹn-oriri lẹ ihiẹn-ọrịra, buche ọgụn ebe wẹ rụsọnmẹ ẹhụ. Wẹ nọ bu ndị ile ndụn gụ che elu anyịnyan-jaki. Ya wẹ nọ bu wẹ lakinni ndị alị wẹ imẹ Jẹriko, Obodo-nkụ. Wẹ nwẹn nọ lụakin Sameria.
16
Ogẹn hụ, Ahazị wụ eze Juda zi wẹ d'a rịọ eze Asiria d'e yen'ẹ ẹka lụsọn ndị-iṅẹnrẹn ẹ ọgụn —
17
makẹni ndị-agha Ẹdọm a bịagụọzị d'a lụsọn ndị Juda agha, kpụnrụn ndị wẹ kpụnrụn.
18
Ndị Filistia nkẹ a lụsọngụọ ndị Juda bisọnmẹ ukun ugu lẹ ibe alị-ọkpọnkụn Nẹgẹvụ rị Juda agha. E werigụọ wẹ obodo Bẹt-Shẹmẹshi, Aịjalọnụ lẹ Gẹdẹrọtụ biri, werizikwọ Sọkọ lẹ Timna lẹ Gimzo lẹ mmụ alị fihunmẹni wẹ biri.
19
Osolobuẹ gi ufiri Ahazị wụ eze wẹ wetu Juda alị, makẹni Ahazị rị a kwadọn njọ imẹ Juda, e mẹchanrịn ihiẹn ile Osolobuẹ sị wẹ emẹlẹ.
20
Tiglatị-Pilesa, eze Asiria a bịaghọ d'a za oku, kanị nsọngbu k'o ye Ahazị, ẹlẹ eyemẹka.
21
Ahazị nọ kpọnrinsọnmẹ ihiẹn imẹ Ụlọ-nsọ Osolobuẹ lẹ obi-eze lẹ iwe ndị-isi, we ye eze Asiria, kanị ọhụn eyenin'ẹ ẹka.
22
Kẹ Ahazị rị imẹ nsọngbu k'ọ kadẹ Osolobuẹ a latọ.
23
Ọ chụnyesọnmẹni mmọn ndị Damaskọsụ hụn mẹrin'ẹ ẹjan, makẹni ọ sị enwẹn ẹ, “Ebe o mẹ ni mmọn ndịnị ndị-nze Aram e fe e yegụọnị wẹ ẹka, m jẹnkọ d'a chụnyeni wẹ ẹjan kẹni wẹ yezikwọnị m ẹka.” Kanị, ọdịdan kẹ oku wẹ buhẹni ya lẹ ndị Izrẹlụ ile.
24
Ahazị nọ kpọnrin arịa ile rị imẹ Ụlọ-nsọ Chuku bekika. Ọ kpọkin ụzọ ndị rịsọnmẹ Ụlọ-nsọ Osolobuẹ makẹ onyẹ ọwụlẹ gha a banye d'e fe Chuku; o tumẹsọnmẹ ukpo wẹ nọ a chụnyeni mmọn ichẹn-ichẹn ẹjan mkpẹnrẹn ụzọ ile rị imẹ Jerusalẹm.
25
Ọ tụnsọnmẹ ebe jẹn elu imẹ obodo ile rị Juda kẹni w'a nọ wẹ a chụnnị mmọn ichẹn-ichẹn ẹjan wẹ gi ọkụn a chụn; ọ nọ gi ẹ kpasu Osolobuẹ wụ Chuku ndị nẹdi ẹ iwe.
26
Ihiẹn ndị ọzọ ile mẹni ogẹn Ahazị gi rị a kị lẹ obibi ile o bi, gha mbidọn d'e ru ọgụgụ, rịsọnmẹ ẹkụkwọ ndị-nze Juda lẹ Izrẹlụ Ẹbamịn ugu.
27
Ahazị a nwụnhụn, wẹ nọ li ẹ ye obodo Jerusalẹm, kanị elini wẹ ẹ ye imẹ ili ndị-nze Izrẹlụ. Nwa a wụ Hezikaya nọ rikin ẹ eze.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes