A Akaaz sẽn wa n na n lebg rĩma, t'a tara yʋʋm pisi. La a rɩɩ naamã yʋʋm piig la a yoob Zeruzalɛm. Yẽnda ka maan sẽn tat Sẽn-Ka-Saab yam wala a yaab a Davɩɩd ye.
La yẽnda mengã yõoga wisd Bɛn-Hinom tãn-longẽ wã, la a yõog a kambã bugum, wa buud a taab nins Sẽn-Ka-Saabã sẽn dag n rig Israyɛll nebã taoorã sẽn dag n maand yel-beed ninsã.
Rẽ kɩtame, tɩ Sẽn-Ka-Saab sẽn yaa yẽnda Wẽnnaamã kɩt tɩ Siiri rĩmã tõog a Akaaz n yõg a neb wʋsg n tall n kẽng Damaase. La Sẽn-Ka-Saab leb n basame tɩ Israyɛll dĩmã tõog a Akaaze, n kʋ a neb wʋsgo.
La Samaari pʋgẽ wã, Sẽn-Ka-Saab no-rɛɛs a yembr n dag n be beenẽ t'a yʋʋr boondẽ t'a Obɛɛde. Yẽnda yiime n seg Israyɛll tãb-biisã sẽn lebg n wat Samaari wã n yeel-b yaa: «Ade, yaa Sẽn-Ka-Saab sũurã sẽn yik ne Zʋʋda nebã yĩng n kɩt tɩ bãmb bas tɩ yãmb tõog-ba, la yãmb kʋ-b-la ne sũ-yikr sẽn zẽk n tat hal saasẽ.
La moasã, yãmb gomdame tɩ y na n dɩka Zʋʋda ne Zeruzalɛm kambã n maan y yembse, la y tʋmtʋmd-pogse! Dẽ yĩnga, yãmb me ka beeg ne Sẽn-Ka-Saab sẽn yaa yãmb Wẽnnaamã sɩda?
Efrayiim nebã nanambs kẽer yika ne sẽn kẽng-b zabrã n lebg n watẽ wã. Yaa a Yohanan biig a Azariya, a Mesilemot biig a Berekɩya, a Salum biig a Ezekɩyaas la a Adlayi biig a Amasa.
Bãmb yeel-b lame: «Da kẽ-y ne y sẽn yõg b rãmba ka ye. Bala, bõn-kãng na n kɩtame tɩ d beeg Sẽn-Ka-Saabo, yãmb sẽn gomdã yaa sẽn paasd tõnd beegrã ne d kongrã, tõnd zoe n tara kongr wʋsgo, la Sẽn-Ka-Saab sũ-puugrã bee Israyɛll zugu.»
La neb nins b sẽn pʋd-b yʋy n boolã yikame n bels yembsã. Bãmb dɩka teed nins tãb-biisã sẽn tall n wa wã, n yeelg b rãmb nins sẽn yaa b bɛɛlã, la b kõ-b futu, neooda, rɩɩbo, la b tɩp b noadã, la b rɩk neb nins fãa sẽn dag n ka tõe n kẽna n zombg bõense, n tall-b n kẽng b saam-biisã nengẽ Zeriko sẽn yaa koms tẽngã. Dẽ, bãmb lebg n leba Samaari.
La Filistẽ-dãmbã me rag n yiime n tɩ zab ne tẽms nins sẽn be londẽ wã, la Negɛɛv sẽn yaa Zʋʋda soolmã: Yaa Bɛt-Semeese, Ayalõ, Gederote, Soko ne a tẽn-bãoonegã, Timna ne a tẽn-bãoonegã, Gimzo ne a tẽn-bãoonegã, n deeg-b n sooge.
A Akaaz maana maoong n kõ Damaas nebã sẽn tõog yẽnda wã wẽn-naands n yeel yaa: «Siiri nebã wẽn-naandsã sẽn sõngd-bã yĩngã, mam me na n maana maoong n kõ-b tɩ b wa sõng-ma.» La yaa wẽn-naands bãmb n wa ne a Akaaz ne Israyɛll nebã sãoongo.
Yẽnda maana maoong kʋʋb zĩis Zʋʋda tẽmsã fãa pʋsẽ, n na n yõog tɩdar n kõt buud a taabã wẽnnaam-dãmbã, yẽnda maana woto n beeg Sẽn-Ka-Saab sẽn yaa yẽnda yaab-rãmbã Wẽnnaamã.
A Akaaz kiime n bʋʋg a saam-dãmba, la b muma yẽnda Zeruzalɛm tẽngã pʋga, la ka yɩ rĩm-dãmbã yaadẽ ye. La a biig a Ezekɩyaas leda yẽnda zĩigẽ n dɩ naamã.