Naaba-Wẽnd, a Wẽnnaam, dɩk-a lame n sagl Aramsa nugẽ. B yõga neb wʋsgo n tall n kẽng yembd Damas tẽnga. Soaala-Wẽnd bas-a-la Israyɛl dĩma me nugẽ. A konga raood zabrẽ.
A Remaliya biig a Peka kʋʋ Zɩɩda rãmb neb tus koabg la pisi raar a ye. Fãa ra yaa zab-mitba la b sẽn pa zabrẽ wã yaa b sẽn lak ne Naaba-Wẽnd, b ba rãmb Wẽnde.
Bãngd a ye n da be n boond t'a Odɛd. A yi n sega tãb-biisa Samari noorẽ n yeel-ba: «Ade, Naaba-Wẽnd, yãmb Wẽnnaam, sagla Zɩɩda rãmb y nugẽ, b sũur sẽn puug ne b yĩnga. Yãmb sẽn kʋ-b kʋʋb ninga, saaga meng reeg n wiisdame.
Efrayim kãsem-dãmba kẽer sɩd yika ne sẽn kẽng-b zabr n lɛɛg n watẽ wã. Yaa a Zoana biig a Azariya, a Mesilemot biig a Berekiya, a Salum biig a Yeyizkiya la a Adlayi biig a Amasa.
B yeelame: «Da wa-y ne y sẽn yõg b rãmba ka ye, ka rẽ d na n beega Naaba-Wẽnde. Y datame n paas d yel-wẽna la d samde sẽn zoe n ya wʋsgo, n takd Naaba-Wẽnd sũ-puur, a Israyɛl zugu.»
B yãka neb tɩ b na n bels b sẽn yõg b rãmbã. B baoo fut n yeelg sẽn da ka tar-b fuugu; b pʋɩ-b-la futu, neooda, dɩɩbo, koom, la roogo. B zombga bõeens zutu sẽn da pogl-bã la b talla b fãa n wa lebs Zeriko, koms tẽnga; b le lɛɛg n dɩka Samari sore.
Filisti rãmba sẽegame n pid tãmsa zut la tãmsa sees tẽnsã, la Zɩɩda Negɛb. B pãbame n deeg Bɛt-Semɛs, Ayalõ, Gederot, Soko, ne a tẽn-kogse, Timna ne a tẽn-kogse, Gimzo ne a tẽn-kogse la b kẽe be n zĩndi.
Damas wẽn-naandsa sẽn da tõog yẽnda wã, a baas n kʋʋ maand b yĩnga. Ad-a sẽn yeel a menga: «Aramsa dĩm dãmb tara wẽn-naands sẽn sõngd-ba, woto wã m na kʋ-b maando tɩ daare b na sõng-ma.» Mik yaa bãmb n na n wa ne a meng wãabo la Israyɛl gill wãabo.