Hɛzɛkia yuma daa nyɛla yuun’ pisinaanu saha shɛl’ o ni daa di nam maa. O daa di nam ʒini Jɛrusalɛm la yuun’ pihitayinika. O ma yuli n-daa booni Abija, o daa nyɛla Zakaria bipuɣiŋga.
ka yɛli ba, “Yinim’ Lɛvinima, wummiya, Malimiya yimaŋa m-be kasi, ka maliya Yawɛ ŋun nyɛ yi yaannim’ Naawuni ŋɔ jɛmbu duu ŋɔ ka di be kasi, ka yihiya neen’ daɣiri din bi be kasi luɣ’ kasi shee la.
Dama ti yaannim’ daa bi ʒe yim, ka tum tuumbiɛri Yawɛ ŋun nyɛ ti Naawuni ŋɔ sani. Bɛ daa zaɣis’ o, ka ŋmaligi bɛ nini ka chɛ o biɛhigu shee, ka lɛb’ bɛ nyaaŋa biri ka chɛ Yawɛ jɛmbu duu ŋɔ.
Bɛ daa lan yo Naawuni jɛmbu duu zɔŋ dunoya, ka kpihi di puuni firilanima, ka daa bi lan tuɣindi tulaale zim bee m-maani bɛ ni zaŋdi sara shɛli nyɔri buɣim la luɣ’ kasi shee la tiri Izraɛlnim’ Naawuni.
Dinzuɣu ka Yawɛ suhu daa yiɣisi bahi Judanim’ mini Jɛrusalɛmnim’ zuɣu, ka o daa chɛ ka dabiɛm gbaai sokam ka di niŋ ba alahiziba, ka niriba mali ba ansarisi ka yimaŋmaŋ’ nini nya.
Di saha ka Lɛvinim’ ŋɔ daa yiɣisi ni bɛ tum tuma. Bɛn daa yi Kɔhat daŋ ni na n-daa nyɛ: Amasai bia Mahat mini Azaria bia Joɛl. Ka bɛn daa yi Mɛrari daŋ ni na daa nyɛ: Abidi bia Kish mini Jɛhalɛlɛl bia Azaria. Ka bɛn daa yi Gɛrishɔn daŋ ni na nyɛ: Zimna bia Jɔa mini Jɔa bia Idɛn.
Ka bɛ daa laɣisi bɛ mabihi m-mali bɛmaŋ’ be kasi n-kpe Naawuni jɛmbu duu maa ni nti mal’ li ka di be kasi kaman Yawɛ ni daa wuhi naa ka o zali ba ni bɛ niŋ shɛm.
Ka maligumaaniba daa kpe Naawuni jɛmbu duu maa puuni ha ni bɛ ti mal’ li, ka daa va binyar’ shɛŋa din zaa bi be kasi Naawuni jɛmbu duu maa puuni n-yihi ti zali jɛmbu duu maa dundɔŋ ni, ka Lɛvinim’ daa va li ti bahi Kidirɔn Vinvamli ni.
Bɛ daa piligila Naawuni jɛmbu duu malibu tuma maa gol’ so ŋun daŋ tooni dahin’ yini dali. Goli maa daba anii dali ka bɛ daa mali Yawɛ jɛmbu duu maa puuni zaŋ tabili di zɔŋ la gba. Gol’ tuuli maa biɛɣ’ pinaayɔbu dali ka bɛ daa naai di tuma zaa.
Ka bɛ daa kpe Naa Hɛzɛkia sani ti yɛl’ o, “Ti mali Naawuni jɛmbu duu maa zaa, ka mali bɛ ni zaŋdi sara shɛli nyɔri buɣim la bimbini mini di lahi zaa; ni bɛ ni zaŋdi bɔrɔbɔro kasi tamdi teebuli shɛli zuɣu la mini di lahi zaa.
Ti zaŋ Naa Ahaz ni daa bi lan ʒe Naawuni yim ka kahi neen’ shɛŋa zaa la labisi nti mali di zaa ka di niŋ kasi. Nyama di ʒe Yawɛ sara maligu bimbini la tooni.”
Ka bɛ daa bo naɣila’ pola ayopɔin mini piɛlah’ ayopɔin ni piɛbih’ ayopɔin ni bulah’ ayopɔin m-mali alahichi sanyoo sara bɛ nam maa mini Naawuni jɛmbu duu ni Judanim’ zuɣu. Ka o daa zali maligumaaniba bɛn daa nyɛ Aduna bihi la ni bɛ zaŋ biŋkɔbiri maa mali sara Yawɛ sara maligu bimbini maa zuɣu.
Di saha ka bɛ daa kɔri naɣilahi maa, ka maligumaaniba maa daa taɣi ʒim n-zaŋ li kpaai vie sara maligu bimbini maa. Ka bɛ daa kɔri piɛlahi la gba n-kpaai bɛ ʒim vie sara maligu bimbini maa. Ka bɛ daa lan kɔri piɛbihi la gba n-kpaai bɛ ʒim vie sara maligu bimbini maa.
Ka maligumaaniba maa daa kɔri ba n-kpaai bɛ ʒim pa sara maligu bimbini maa zuɣu m-mali alahichi sanyoo sara maligu Izraɛlnim’ zaa zuɣu. Dama naa n-daa zali ni bɛ mali bɛ ni zaŋdi sara shɛli nyɔri buɣim la mini alahichi sanyoo sara maligu Izraɛlnim’ zaa zuɣu.
Ka o daa chɛ ka Lɛvinim’ bɛn gbibi guŋgombihi din mali chaɣisa mini mɔɣilɔnim’ ni goonjɛnima kpe Yawɛ jɛmbu duu maa ni ti zani kaman Dauda mini Gaad ŋun daa nyɛ naa daanabi la ni anabi Neetan ni daa zali shɛm. Dama Yawɛ n-daa chɛ ka o daanabinim’ maa zali ba zaligu maa.
Di saha ka Naa Hɛzɛkia daa bahi noli ni bɛ malimi bɛ ni zaŋdi sara shɛli nyɔri buɣim la sara maligu bimbini maa zuɣu. Bɛ ni daa piligi sara maa malibu saha shɛli ka bɛ daa piligi yiini Yawɛ paɣibu yila, ka ŋmɛri Izraɛl naa Dauda biŋkumda la, ka piɛbiri kikahi.
Ka Naa Hɛzɛkia mini kpamba maa daa zali Lɛvinim’ maa ni bɛ zaŋm’ Dauda mini anabi Asaf yɛtɔɣa la yili yila paɣi Yawɛ. Ka bɛ daa yili wumpaɣibo yila maa ni suhupiɛlli, ka bɛ gbani n-jɛm Naawuni.
Di saha ka Hɛzɛkia daa yɛli, “Pumpɔŋɔ yi mali yimaŋa m-be kasi Yawɛ sani, zaŋmiya yi sara maligu mini yi wumpaɣibo pina ka Yawɛ duu na.” Ka niriba maa daa zaŋ bɛ sara maligu mini bɛ wumpaɣibo pina na. Ka bɛnkam suhuri daa yu lala daa zaŋ bɛ ni zaŋdi sara shɛli nyɔri buɣim la na.
Bɛ ni daa zaŋ biŋkɔb’ shɛb na ni bɛ ti nyo buɣim mali sara maa daa nyɛla naɣilahi pisopɔin mini piɛlahi kɔbiga ni piɛbihi kɔbisiyi. Bɛ zaa daa nyɛla bɛ ni yɛn zaŋ shɛb’ nyo buɣim mali sara ti Yawɛ.
Amaa ka maligumaaniba maa daa bi galisi din ni tooi shi bɛ ni zaŋdi sara shɛli nyɔri buɣim maa biŋkɔbiri maa zaa, dinzuɣu maligumaaniba bɛn kpalim ni daa na maani bɛmaŋa ni bɛ be kasi la zuɣu ka bɛ mabihi Lɛvinim’ daa sɔŋ ba ka bɛ tum tuma maa zaa naai. Dama Lɛvinim’ maa daa gbibi kasitali biɛhigu bɛ suhuri ni n-gari maligumaaniba maa.
Bɛ ni daa zaŋ biŋkɔb’ gbaliŋ shɛb’ mali bɛ ni zaŋdi sara shɛli nyɔri buɣim la nyaaŋa suhudoo sara maligu biŋkɔbiri kpam mini binnyuri shɛli bɛ ni boori pahiri sara shɛli bɛ ni zaŋdi nyɔri buɣim zuɣu la daa beni. Lala ka bɛ daa niŋ n-lan jɛmdi Yawɛ o jɛmbu duu maa ni yaha.