×

BIBULIYA ENTUKUVU

2 Ebyomumirembe 3

1
Solomoni n'atandika okuzimba Ekiggwa ky'Omukama mu Yeruzaalemu ku lusozi Moriya kitaawe Dawudi kwe yali alabikiddwa, mu kifo Dawudi kye yali ategese, ku gguuliro lya Orunani Omuyebusi.
2
Yatandika okuzimba mu mwaka ogwokuna ogw'obwakabaka bwe nga guyiseeko emyezi ebiri.
3
Bino bye bipimo Solomoni bye yassaawo okwabangibwa ekiggwa kya Katonda: emikono nkaaga mu buwanvu, ate mu bugazi emikono amakumi abiri (nga yeeyamba ebipimo ebikadde).
4
Ekisasi mu maaso, ekyagenderanga ddala ng'ennyumba bw'egenda mu bugazi, nga kya mikono amakumi abiri; bwo obusimba nga kya mikono kikumi mu abiri. Munda yamaalamu zaabu omwereere.
5
Ebisenge by'Eddiiro yabibembekako embaawo eza sipulaasi, n'azibikka ne zaabu omulungi okulyetoolooza; yatonako ebifaananyi eby'enkindu n'eby'enjegere ezigenda zeeyunga.
6
Ekiggwa yakitona n'amayinja ag'omuwendo ne zaabu w'e Paruvayimu.
7
Empagi, emyango, ebisenge n'enzigi eby'Ekiggwa yabibikka ne zaabu; ku bisenge n'ayolako bakerubi.
8
Yakola Ekifo ky'Awatukuvu Ennyo: ng'obuwanvu kyenkana n'obugazi bw'Ekiggwa, kwe kugamba, emikono amakumi abiri obuwanvu n'emikono amakumi abiri obukiika. Ebisenge by'akyo n'abimaalako ne zaabu omulungi, nga wa talenta lukaaga.
9
Emisumaali egya zaabu gyazitowa sekeli amakumi ataano. N'ebisenge ebya waggulu yabibikka zaabu.
10
Mu Kifo ky'Awatukuvu Ennyo yakoleramu bakerubi babiri mu bifaananyi ebibajje, n'abisiiga zaabu.
11
Ebiwaawaatiro by'omukerubi omu nga byeyanjuluzza nga biwerako emikono amakumi abiri. Ekiwaawaatiro ky'omukerubi omu nga kiriko emikono etaano, nga kikwata ku kisenge ky'Ekiggwa; ekiwaawaatiro ekirala nga kuliko emikono etaano, nga kikwata ku kiwaawaatiro ky'omukerubi owookubiri.
12
Era n'ekiwaawaatiro ky'omukerubi owookubiri nga kiriko emikono etaano, nga kikwata ku kisenge ekirala eky'Ekiggwa, n'ekiwaawaatiro kye ekirala nga kiriko emikono etaano, nga kikwata ku kiwaawaatiro ky'omukerubi eyasoose.
13
Ebiwaawaatiro by'abakerubi bombi byali byanjuluze, nga kuwerako emikono amakumi abiri; bo baali bayimiridde ku magulu gaabwe, nga batunuulidde Eddiiro.
14
Yakola olutimbe mu wuzi eza langi eya bbululu, kakobe n'emmyufu mu lugoye olw'obufumbo, n'alukiramu bakerubi.
15
Mu maaso g'Ekiggwa yassaayo empagi bbiri nga za mikono asatu mu etaano obuwanvu. Zaaliko enkata ku ntwe zaazo buli emu nga ya bugulumivu bwa mikono etaano.
16
Mu Kisenge eky'Omunda yakoleramu enjegere ezigenda zeeyunga, n'azizingira ku ntwe z'empagi; n'amakomamawanga kikumi ge yagenda atobeka ku njegere.
17
Empagi yazisimba mu maaso g'Ekiggwa, emu ku mukono ogwa ddyo n'endala ku mukono ogwa kkono; ey'oku mukono ogwa ddyo yagituuma Yakini, ate ey'oku mukono ogwa kkono n'agituuma Bowazi.
Luganda Bible
BIBULIYA ENTUKUVU SECOND EDITION The Bible Society of Uganda, 2018.
:
Save Notes