1
پوءِ سليمان يروشلم ۾ مورياہ جبل تي هيڪل جي تعمير شروع ڪرائي، جتي خداوند هن جي پيءُ دائود کي ڏيکاري ڏني هئي. اها جاءِ اُروناہ يبوسيءَ جي ڳاهہ ڳاهڻ جي پِڙ واري جاءِ هئي، جيڪا دائود انهيءَ ڪم لاءِ مقرر ڪري ڇڏي هئي.
2
هن تعمير جو ڪم پنهنجي بادشاهيءَ جي چوٿين سال جي ٻئي مهيني جي ٻي تاريخ کان شروع ڪرايو.
3
هيڪل تعمير ڪرڻ لاءِ بادشاهہ سليمان جيڪي بنياد وجھرايا تن جي ڊيگھہ ستاويهہ ميٽر ۽ ويڪر نوَ ميٽر هئي.
4
جيڪو ورانڊو هيڪل اڳيان تعمير ڪيو ويو تنهن جي ڊيگھہ هيڪل جي ويڪر جيتري يعني نوَ ميٽر هئي ۽ اوچائي چوونجاهہ ميٽر هئس. انهيءَ ورانڊي کي اندران نج سون مڙهايو ويو.
5
هن مقدس جاءِ کي صنوبر جي تختن سان ڍڪرايو ۽ انهن تختن تي نج سون جو پٽ چاڙهايو ۽ مٿان کجين جا وڻ ۽ زنجيريون اُڪرايائين.
6
هن انهيءَ هيڪل کي قيمتي پٿرن ۽ پروائم ملڪ مان گھرايل سون سان سينگاريو.
7
هن هيڪل جي شهتيرن، چانئٺن، ڀتين ۽ دروازن تي سون جو پٽ چاڙهايو ۽ ڀتين تي پردار آسماني مخلوق جا نقش اُڪرايائين.
8
هن مقدس جاءِ جي پٺيان مقدس ترين جاءِ بہ تعمير ڪرائي، جنهن جي ڊيگھہ هيڪل جي ويڪر موجب نوَ ميٽر ۽ ويڪر بہ نوَ ميٽر هئي. هن انهيءَ مقدس ترين جاءِ تي اندران ايڪيهہ هزار ڪلوگرام سون چاڙهايو.
9
سونين ڪلين جي تور ڇهہ سؤ گرام هئي. هن مٿين ڪمرن جي ڀتين تي پڻ سون چاڙهايو.
10
هن مقدس ترين جاءِ جي ڪمري ۾ پردار آسماني مخلوق جا ٻہ مجسما ٺهرايا ۽ انهن تي سون چاڙهايائين.
11
اهي ٻئي مجسما هڪٻئي جي ڀرسان دروازي ڏانهن منهن ڪيو بيٺا هئا. انهن جي پَرن جي ڪل ڊيگھہ ڪمري جي ويڪر جيتري يعني نوَ ميٽر هئي ۽ پَرن جون ٻاهريون چوٽيون هيڪل جي پاسن وارين ڀتين تائين ٿي پهتيون. آسماني مخلوق جي هر هڪ پَر جي ڊيگھہ سوا ٻہ ميٽر هئي ۽ ڪمري جي وچ ۾ هڪ آسماني مخلوق جو پَر ٻي آسماني مخلوق جي پَر تائين ٿي پهتو.
12
13
14
هن مقدس ترين جاءِ جي اڳيان هڻڻ لاءِ سوٽي ڪپڙي ۽ ٻين قسمن جي ڪپڙن مان نيري، واڱڻائي ۽ لال ڳاڙهي رنگ جو پردو ٺهرايو جنهن تي پردار آسماني مخلوق جون تصويرون اُڻيل هيون.
15
سليمان بادشاهہ هيڪل جي لاءِ پتل جا ٻہ ٿنڀا ٺهرايا، جن جي ڪل ڊيگھہ سورهن ميٽر هئي. هر هڪ ٿنڀي جي چوٽيءَ تي جيڪو ڇٽ هو تنهن جي ڊيگھہ سوا ٻہ ميٽر هئي.
16
هن زنجيريون ٺهرائي ٿنڀن جي چوٽين جي چوڌاري ٻڌرايون. هر هڪ ڇٽ لاءِ هن پتل جا هڪ سؤ ڏاڙهون پڻ ٺهرايا جيڪي انهن زنجيرين ۾ هڻائي ڇڏيائين.
17
هن اهي ٿنڀا هيڪل جي اڳيان کڙا ڪرايا، هڪڙو ساڄي پاسي تہ ٻيو کاٻي پاسي. ساڄي پاسي واري ٿنڀي جو ياڪن نالو رکيو ويو ۽ کاٻي پاسي واري جو بوعز نالو رکيو ويو.
Sindhi Muslim Bible 2022
Muslim Sindhi Bible The Pakistan Bible Society, 2022 --- Scripture taken from the Holy Bible in Muslim Sindhi, 2022 The Pakistan Bible Society.