Hezekia nooro joote ir jo-Israel gi jo-Juda duto, kendo nondiko barupe bende ni jo-Efraim gi jo-Manase koluongogi ni mondo gibi Jerusalem e Od Ruoth Nyasaye mondo gitim Sap Pasaka ni Ruoth Nyasaye ma Nyasach Israel.
Kamano ne ging’ado bura mondo ogo milome e Israel duto, chakre Beer-sheba, yo milambo nyaka Dan, yo nyandwat, mondo ji obi Jerusalem otim Pasaka ni Ruoth Nyasaye ma Nyasach Israel, nikech ji ne pok otime mang’eny kaka chik dwaro.
Omiyo joote nodhi e piny Israel gi Juda duto, kaka ruoth nochiko, ka gitero barupe moa kuom ruoth gi jodonge, mondikie niya, “Un jo-Israel mosetony e lwet ruodhi mag Asuria, koro duoguru ir Ruoth Nyasaye ma Nyasach Ibrahim gi Isaka kod Israel, mondo en bende oduog iru.
Koro kik utim wichteko kaka kwereu notimo, to chiwreuru ni Ruoth Nyasaye, kendo udonj e Hekalu, ma Ruoth Nyasaye oseguedho mondo obed mare nyakachieng’. Tiuru ni Ruoth Nyasaye ma Nyasachu, mondo chunye olend kuom mirima mager ma en go kodu.
Kuduogo kuom Ruoth Nyasaye, eka oweteu gi nyithindu noyud ng’wono kuom joma nomakogi, mi giniduogi e pinyni, nimar Ruoth Nyasaye ma Nyasachu ng’won, kendo jamiwafu, omiyo ka uduogo kuome, to ok noloknu ng’eye.”
Ne ginego nyarombo mar Pasaka chieng’ due apar gang’wen mar due mar ariyo. Jodolo gi jo-Lawi noyudo wichkuot, omiyo ne gipwodhore mi gikelo misengni miwang’o pep e Od Ruoth Nyasaye.
Ne nitie ji mang’eny e chokruok mane pok opwodhore, omiyo jo-Lawi nonego nyarombo mar Pasaka ni ng’ato ka ng’ato mane ok ler, mondo opwodhe ni Ruoth Nyasaye.
Adieri, ji mathoth, ma ng’enygi noa Efraim gi Manase gi Isakar kod Zebulun, ne pok opwodhore, to kata kamano ne gichamo Pasaka, ka ok giluwo chik. To Hezekia nokwayonigi kawacho niya, “Ruoth Nyasaye mang’won, ma Nyasach kwerewa, mondo ong’won ni ng’ato ka ng’ato
Jo-Israel mane ni Jerusalem notimo Sap Makati ma ok ketie Thowi gi mor maduong’ kuom ndalo abiriyo, kendo jo-Lawi gi jodolo ne pako Ruoth Nyasaye odiechieng’ kodiechieng’, ka giwerne gi tekogi duto.
Hezekia ruodh Juda nomiyogi ruedhi alufu achiel gi rombe alufu abiriyo mondo gitimgo misango, to jodongo nochiwo ruedhi alufu achiel gi rombe alufu apar. Mi jodolo mang’eny ahinya nopwodhore.