Tomea Esekia ngitunga nia Ngisirael kadaang ka Yuda, kigir ngabaruae tani nia ngitunga a Epiraim ka Manase atamar pot kai a Ekapolon Akuj alo Yerusalem tosubakineta esukukuu a Adeparet torimare Ekapolon Akuj na erai Akuj a Ngisirael.
Apot ngitunga lu ameario toloto wadaang anakwap a Isirael ka Yuda etingito ngabaruae a ekapolon ka ngikapolok a arieng keng. Egiritae ngabaruae nguna kona: “Ee Ngisirael, lu ibuchunosi alojie a ngikapolok a Asiria. Tobongutu tokona nia Ekapolon Akuj ana erai Akuj a Aburaam, ka Isaka ta Yakobo, sodi tobongunio ngesi nikus.
Nyiiliworosi lukechanak loger lokolong araakatar kesi, nakaneni kiwapa ngakiro a Ekapolon Akuj. Potu kai keng na eyei Yerusalem. Etaleu Ekapolon Akuj na erai Akuj kus akai ngina jik. Potu kilipa ngesi sodi nyikingoikinea ngesi esi nabo.
Ani kibongut esi nia Ekapolon Akuj, epete ngisien lotunga lu erikorito ngiyenet kus sodi kimiekis kesi tobongut nawi, kainyo ejok Ekapolon Akuj na erai Akuj kus nabo erai na ngisien. Ani kibongut esi nikeng, kichamuni ngesi esi.”
Apot ngitunga lu amearitae toloto lorerea daang anakwap a ngitela a Epiraim ka Manase tananga nakwap a ekitela a Sebulun alokwap, nakaneni apot ngitunga tokianatar kesi toboliatar.
Akolongit na ngatomon ka ngoomwon a elap alo a ngiarei, apot kesi taara ngimesekin luchik lu araakasi ngakipeyos a Adeparet. Apot ngileech kiruma ngimurok ka Ngilawi lusek peetaleuno, sodi kitaleunos kesi ka akipeyore ngakipeyos na inomio alokai a Akuj.
Apot kesi pena lotichisio kech alokai a Akuj, itemem ka etal a Musa alo arai itwaan a Akuj. Apot Ngilawi kikobakis ngimurok ngaakot a ngibaren alu epeyoo. Towatakis ngimurok ngaakot nguna lokeno a ngakipeyos.
Apot ngitunga lu achunakina Yerusalem tanyama esukukuu a ngamugati anapadok a ngirwa a ngikan-kaarei, tanyama a alakara anakaalan. Akolongit daang, apot Ngilawi ka ngimurok kipuro Ekapolon Akuj a ngikilinga kech kadaang.
Abu Esekia kipur Ngilawi kotere etich loajokon loa akisilip ngitunga Ekapolon Akuj. Adaunet a ngirwa alukan-kaarei, alu epeyooto kesi ngakipeyos ipurosi Ekapolon Akuj na erai Akuj kata apaakech,
Talakaros ngitunga daang lu aponito alo Yuda ka ngimurok, ka Ngilawi, ka ngitunga lu aponito alokwap ta ngitunga a ngakwapea anache lu alomito nakwap a Isirael ka Yuda.
Min alakara natiapolon lore a Yerusalem, kainyo peasubakina ngakiro na ekote nguna a ache nakolong adangaror ngirwa lua Solomon alo arai lokookeng a Daudi.