राजा हिजकिय्याह फुन याजकन अउ लेवीबंसियन क समूहन मँ बाँटेस अउर हर एक समूह क आपना बिसेस कार्य करब होत रहा। एह बरे राजा हिजकिय्याह ओन समूहन क आपन कार्य फुन स करइ क कहेस। एह बरे याजकन अउ लेवीबंसियन क फुन स होमबलि अउ मेलबलि चढ़ावइ क काम रहा। ओन क काम मन्दिर मँ सेवा करब, गाना अउ यहोवा क भवन क दुआर पइ परमेस्सर क स्तुति करब रहा।
सादोक परिवार क मुख्य याजक अजर्याह हिजकिय्याह स कहेस, “उ समइ स जब स लोग भेंटन क यहोवा क मन्दिर मँ लिआउब सुरू कइ दिहेन ह एह बरे हम लोगन क लगे खाइ बरे बहोत जियादा अहइ। हम लोग भर पेट खाए अउर अबहिं तलक हम लोगन क लगे बहोत बचा ह। यहोवा अपने लोगन क सच मँ आसीस दिहेस ह। एह बरे हम लोगन क लगे इ सब बचा ह।”
एदेन, मिन्यामीन, येसू समायाह, अमर्याह अउ सकन्याह कोरे क मदद करत रहेन। उ सबइ लोग ईमानदारी स ओन नगरन मँ सेवा करत रहेन जहाँ याजक रहेत रहेन। उ पचे बहोत महत्त्वपूर्ण अउर कम महत्त्वपूर्ण दुइनँउ याजकन क समान मात्रा मँ चिजियन दिहेन।
याजकन क संग्रह कीन्ह भवा चिजियन स ओनकर हींसा दीन्ह जात रहेन। परिवारिक आधार पइ, परिवार क इतिहास मँ लिखित सूची अनुसार इ कीन्ह गए रहेन। बीस बरिस या ओहसे अधिक उमिर क लेवीबंसियन क संग्रह क ओनकर हींसा दीन्ह जात रहा। इ ओनकर जिम्मेदारी अउ वर्ग क अनुसार कीन्ह जात रहा।
उ जउन भी कार्य परमेस्सर क मन्दिर क सेवा मँ, नेमन व सबइ आग्या क पालन करइ मँ अउर अपने परमेस्सर क अनुसरण करइ मँ किहेस ओहमाँ ओक कामयाबी मिली। हिजकिय्याह इ सबइ सबहिं कार्य अपने पूरे हिरदइ स किहस।