×

Ika Bible 2018

2 Ihiẹn Mẹni 31

1
Ogẹn Mmẹmmẹ-nghafe hụ gi gụ, ndị Izrẹlụ ile zu ebẹhụ nọ wịrị shi imẹ obodo ndị rị Juda, tikpọma ọmụma ndị wẹ kọmasọnmẹ w'e fe, gbutu osisi ndị wẹ zumẹni onyẹnnyẹ mmọn Ashẹra, tikpọsọnmẹ ebe ile jẹn elu wẹ nọ e fe ofufe lẹ ukpo ndị wẹ nọ a chụnyeni mmọn ẹjan imẹ Juda, Bẹnjamini, Ifrem lẹ Manasẹ — d'e ru ni e tikpọgụ wẹ wẹ ile. Ya kẹ onyẹ-onyẹ imẹ ndị Izrẹlụ Ẹbamịn ugu nọ lakin iwe wẹ, imẹ obodo wẹ rị ichẹn-ichẹn.
2
Ya Hezikaya nọ dọnmẹ ndị nchụn-ẹjan lẹ ndị Livaị itu-itu kẹ ọrụn wẹ dọn chọ: kẹ ọrụn ndị nchụn-ẹjan kẹ nke ndị Livaị, kẹni wẹ hụn ụzọ a chụn ẹjan w'a dụn ọkụn lẹ ẹjan-ekele, e jẹnni Osolobuẹ ozi, a kpanmịn Osolobuẹ, a nọdị ọnụmụzọ Ụlọ Osolobuẹ, a bụ ẹbụ ịja-mma.
3
Eze nọ gha imẹ ihiẹn o nwọn ye ihiẹn ndị wẹ gi a chụn ẹjan w'a dụn ọkụn ụtụntụn lẹ ẹnyasị imẹ Ụlọ-nsọ lẹ hụn w'a dụn ọkụn Ụhụọhịn Ezumikẹn ọwụlẹ lẹ Ifọn-Ọhụn lẹ Mmẹmmẹ ndị ọzọ wẹ de imẹ Iwu Osolobuẹ.
4
Ọ sị ndị bi imẹ Jerusalẹm e ye ndị nchụn-ẹjan lẹ ndị Livaị ihiẹn runi wẹ, kẹni wẹ wechanrịn enwẹn wẹ kwanị ihiẹn gbashịarị Iwu Osolobuẹ.
5
Hụn wẹ gihụ nụ ihiẹn eze ku, ya ndị Izrẹlụ nọ wepụha obi yemẹ ihiẹn-ugbo wẹ ibuzọ: kẹ ọka kẹ manya kẹ ofigbọn-olivu kẹ mirin-ẹnwụn kẹ ihiẹn ile gha ugbo wẹ pụha. Ihiẹn wẹ wẹhẹ e hikẹmẹkẹ; e wẹhẹzikwọ wẹ ụzọ-ohu-imẹ-ụzọ iri ihiẹn ndị wẹ nwọnhẹn.
6
Ndị Izrẹlụ lẹ ndị Juda bi obodo ichẹn-ichẹn rị Juda nọ wẹhẹ ụzọ-ohu-imẹ-ụzọ-iri imẹ efin lẹ atụnrụn lẹ ewu wẹ lẹ imẹ ihiẹn ile wẹ gi kwanị Osolobuẹ wụ Chuku wẹ, dọnmẹsọnmẹ wẹ ikpọn-ikpọn.
7
Ifọn nke ẹtọ kẹ wẹ gi yemẹ ihiẹnni, ifọn nke ẹsa kẹ wẹ gi yechanrịn a.
8
Ogẹn Hezikaya lẹ ịhaịmẹ ẹ gi bịa, hụn elumelu ihiẹn ndị hụ wẹ butọsọnmẹ, wẹ nọ ja Osolobuẹ mma, gọzi ndị nke ẹ wụ Izrẹlụ.
9
Hezikaya nọ jụ ndị nchụn-ẹjan lẹ ndị Livaị elebe kẹ elumelu ihiẹn ndị hụ gha bịa?
10
Onyẹ-isi nchụn-ẹjan wụ Azaria, hụn wụ onyẹ ikpụlọ Zadọkụ nọ sị a, “Kete wẹ tụhamalẹ ihiẹn imẹ Ụlọ-nsọ Osolobuẹ, ẹnyi hụ e rijun ẹfọ, a hụn ọda-ọda e dọnmẹ, makẹni Osolobuẹ a gọziọlẹ ndị nke ẹ; hụnnị ile wụ hụn họdụnị.”
11
Hezikaya nọ sị wẹ kwademẹ mmụlọ ndị w'e kpọntọ ihiẹn imẹ Ụlọ-nsọ Osolobuẹ, ya wẹ nọ kwademẹ wẹ.
12
Ya wẹ nọ kpọnbanhan ihiẹn ndị hụ wẹ tụ lẹ ụzọ-ohu-imẹ-ụzọ-iri ndị hụ lẹ ihiẹn ndị hụ wẹ gi kwanị Osolobuẹ, emẹtụnị w'a ẹka. Onyẹ Livaị w'a kpọ Konania kẹ wẹ tumẹ n'ọ hụn ụzọ e lepụ ihiẹn ndị hụ ẹnya, tumẹ nwẹnẹ ẹ wụ Shimei n'o hansọn ẹ.
13
Ndịnị sọnzikwọ wẹ e lepụ ihiẹn ndị hụ ẹnya: Jehiẹlụ, Azazia, Nahatị, Asahẹlụ, Jẹrimọtụ, Jozabadị, Ẹliẹlụ, Ismakia, Mahatị lẹ Bẹnaya. Okpuru Konania lẹ Shimei nwẹnẹ ẹ kẹ wẹ nọ a rụn; eze wụ Hezikaya lẹ Azaria onyẹ-isi nchụn-ẹjan hụn e lepụchanrịn Ụnọ-nsọ Chuku ẹnya, tumẹ wẹ.
14
Kore nwa Imna onyẹ Livaị, hụn e che nche Ọnụ-mgbọn rị Ẹbamịn Ọwụwa ẹnyanwụn, e kwọndọn oyiye ghapụha ịhịan obi ye Chuku, ịya nwọnzi e ke ihiẹn ndị wẹ tụhanị Osolobuẹ lẹ ihiẹn ndị wẹ gi kwanị Osolobuẹ.
15
Idẹni, Miniamini, Jeshụa, Shẹmaya, Amaria lẹ Shẹkania wụ ndị ezioku hụn e yen'ẹ ẹka imẹ obodo ndị wụ nke ndị nchụn-ẹjan. W'e keyesọnmẹ ndị nchụn-ẹjan ibe wẹ ihiẹn ndị hụ itu-itu, kẹ nwata kẹ onyẹ ka ẹhụ,
16
sọnzikwọ wẹ e lepụ ihiẹn ndị hụ ẹnya. W'e keyezikwọ okẹnnyẹ ọwụlẹ rị nwa ahụa iri-kwasị-ọgụn shi elu, cheni ndị wẹ hụn ẹfan wẹ ebe wẹ deye ẹfan ndị ẹbozo wẹ, ndị ile hụn sikọ d'a ban imẹ Ụlọ-nsọ Osolobuẹ d'a rụn ọrụn wẹ rị ichẹn-ichẹn, onyẹ-onyẹ lẹ itu ẹ.
17
Wẹ e keye ndị nchụn-ẹjan wẹ deyesọnmẹ ẹfan wẹ ikp'ụlọ-ikp'ụlọ, e keyezikwọ ndị Livaị rị nwa ahụa ọgụn shi elu, onyẹ-onyẹ lẹ ọrụn a, onyẹ-onyẹ lẹ itu ẹ.
18
Wẹ gha e ke ihiẹn-oriri ndị hụ, wẹ e buchezi ọnụ inyẹnmẹ wẹ lẹ ụmụ-ẹka lẹzi ikorọbịa lẹ ịgbagba rị imẹ alị wẹ ile, hụn ẹfan wẹ rị ebe wẹ deye ẹfan ndị ẹbozo wẹ — makẹni wẹ ile wepụha obi fe ẹhụ.
19
Nke ndị nchụn-ẹjan, ẹbozo Ẹrọnụ, hụn bisọnmẹ ụmụ-alị fihunmẹ obodo ndị rị Juda, o nwọn ikẹnnyẹ wẹ kpọsọnmẹ ẹfan tumẹ hụn e keye wẹ nke wẹ — e keye ikẹnnyẹ ile rị imẹ ndị nchụn-ẹjan lẹ ndị ile wẹ deye ẹfan wẹ ebọn Livaị.
20
Ihiẹnni kẹ Hezikaya mẹsọnmẹ imẹ Juda ile, e mẹ ihiẹn rị mma lẹ ihiẹn furuni, a wụ onyẹ Osolobuẹ wụ Chuku ẹ gi e dọn ẹnya.
21
O wepụhachanrịn obi e mẹ ihiẹn ile o mẹ o gi kwadọn ofufe rị Ụlọ-nsọ Osolobuẹ lẹ Iwu Osolobuẹ lẹ ihiẹn ile Osolobuẹ ku, e gi wẹ ile e fe Osolobuẹ wụ Chuku ẹ, ọ nọ ghachanrịnn'a.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes