Upémaramo heta hetãyguakuéra ojatypa opaite yvukuéra, ha pe yakã osyrýva upe tetãpy rupi ha he’i: Mba’érehe piko umi Asíria retã ruvicha ojohúta yeta ou vove.
Upéi kyre’ỹpópe Ezequías omopu’ãukapa jevy pe táva tápia yvate ho’a hague rupi, ha omopu’ãukave umi óga yvatekuéra (tórre) ha ambue táva tápia yvate oka gotyogua; ha omombarete avei Milo, David távape, ha ojapouka avei heta kyse puku ha soldádo retemo’ãha.
Ha omoĩ tetãyguakuéra ári umi ñorãirõhára ruvichakuéra ipy’aguasúva ha ombyatyukapa hetãyguakuérape pe táva rokẽ megua plázape ha oñe’ẽ ipy’apýpe he’ívo:
Ndaha’éi piko Ezequías voi pe oipe’apava’ekue umi yvy yvatekuéra ha ikuave’ẽmby rendakuéra ha he’iva’ekue Juda ha Jerusalenguápe: Ñanderuete kuave’ẽmby renda renondépe añoite pemomba’eguasuva’erã ha hi’árimante pehapyva’erã mba’e ryakuã porã.
Ko’ág̃a aníke penembotavýtei Ezequías, ha aníke ha’e ogueroviauka peẽme péicha, ha ani pegueroviátei ichupe; ndaipóri voi peteĩ jára umi tetãnguéra apytégui osalvava’ekue hetãme che pógui, ha che rukuéra pógui, ha ko’ytevépa ikatúta pende Jára peneguenohẽ che pógui.
Ezequías katu nomba’erechakuaái pe mba’eporã ojejapova’ekue hese, ha ou oñembotuicha ipy’apýpe, upévare Ñanderuete ohavira ichupe, Jerusalengua ha Judayguakuérape avei.
Ha Ezequías oguereko mba’erepyeta ha herakuã porãite; ha oguereko mba’erepy pláta ha óro, ita vera hepýva, mba’e ryakuã porã, soldádo retemo’ãha ha opaichagua jeguaka ojepotaitéva.
Ko Ezequías ombotyva’ekue umi yvu oĩva Gihon yvatévo, ombohape ha ogueru hag̃ua pe y kuarahyreikéguio David távape. Ha osẽ porãmba Ezequíaspe opaite tembiapo ojapóva guive.
Ha Ezequías omano rire oñeñotỹ ichupe David ñemoñarenguéra tyvy ijyvatevehápe, ha opaite Juda ha Jerusalengua omomba’eguasu ichupe imanóme, ha ita’ýra Manases oisãmbyhy hendaguépe.