Batho ba bantši ba tla ba thiba didiba ka moka; ba thiba le noka e elago e phatša naga yeo, gore dikgoši tša Asuri ge di tla, di se ke tša hwetša meetse a mantši.
Hiskia a dira ka maatla, a tsoša morako mo o bego o phušogile, a aga dibo mo go wona; a aga le o mongwe morako ka ntle, a tiiša merako ya Milo motseng wa Dafida; a dira dibetša tše ntši le dikotse tše ntši.
Tiang maatla, le eme senna; le se ke la boifa la tšhoga kgoši ya Asuri ka ge a tlile le bontši bjo bokaakaa; gobane ba ba nago le rena ba feta ba gagwe ka go ata.
Letsogo la gagwe ke la nama; gomme rena re na le Morena Modimo wa rena wa go re lwela le go hlabana ditlhabano tša rena. Gomme setšhaba sa ikholofetša ka mantšu a Hiskia kgoši ya Juda.
Ge go fetile lebakanyana, Sanheribe kgoši ya Asuri, a roma bahlanka ba gagwe ba ya Jerusalema, yena a sa le kua Lakisi a na le dira tša gagwe ka moka; a iša lentšu go Hiskia kgoši ya Juda le go Bajuda ka moka ba Jerusalema, a re:
A ga se yena Hiskia e a feditšego meboto ya Modimo, le dialetare tša gagwe, a botša Juda le Jerusalema a re: Le rapele aletareng e tee fela, le thuntšhetše diorelo mo go yona?
Gomme se nna le bontate re se dirilego ditšhaba ka moka a ga le se tsebe? A medimo ya ditšhaba tše dingwe tšeo e kgonne go phološa dinaga tša tšona seatleng sa ka?
Ke ofe modimo mo go medimo ya ditšhaba tšela tše bontate ba di fedišitšego, wo o kgonnego go phološa setšhaba sa wona seatleng sa ka, ge le re Modimo wa lena a ka kgona go le phološa seatleng sa ka?
Bjale gomme, le se ke la forwa ke Hiskia, a se ke a le timetša ka mokgwa wo. Le se ke la mo dumela, gobane ga go modimo wa setšhaba mang le mang, goba mmušo mang le mang, o kilego wa kgona go phološa setšhaba sa wona seatleng sa ka, le ge e le diatleng tša bontate; bjale wa lena Modimo a ka kgona bjang go le phološa seatleng sa ka?
O be a ngwadile le lengwalo la go goboša Morena Modimo wa Isiraele, a mmolela ka go re: Modimo wa Hiskia a ka se ke a kgona go phološa setšhaba sa gagwe seatleng sa ka, bjalo ka ge medimo ya ditšhaba tše dingwe e šitilwe go phološa ditšhaba tša yona diatleng tša ka.
Tše bjalo ba di bolela ka Sejuda, ba hlabošetša mantšu go setšhaba sa Jerusalema se se bego se eme morakong, e le gore ba tšhoge ba nolege moko, bona ba kgone go tla ba thopa motse.
Ke mo Morena a romilego Morongwa wa gagwe, a fediša banna ba bagale ka moka, le balaodi ba madira, le dikgošana tša mo mešašeng ya kgoši ya Asuri. A boela nageng ya gagwe a llwe ke dihlong. Ya re ge a tsene ngwakong wa Modimo wa gagwe, a bolaelwa ntshe ke bana ba gagwe ba a ba tswetšego, ba mmolaya ka lerumo.
Ke wona mokgwa wo Morena a phološitšego Hiskia le ba Jerusalema ka wona seatleng sa Sanheribe kgoši ya Asuri le diatleng tša bohle, a ba khutšiša ka thoko tše go fela.
Gomme batho ba bantši ba tlišetša Morena dineo motseng wa Jerusalema; le Hiskia kgoši ya Juda ba mo ntšhetša dilo tše bohlokwa; a dula e le moretwa ditšhabeng ka moka ka taba tšeo.
Fela Hiskia ga a ka a leboga Morena ka mo go lekanego ditšhegofatšo tše a di neilwego, gobane pelo ya gagwe e ikgogomošitše, a ba a welwa ke kgalefo, le Juda, le Jerusalema.
Hiskia a ikokobetša, a lahla boikgogomošo bja pelo ya gagwe, le ba Jerusalema ba dira bjalo; mme kgalefo ya Morena ya se ke ya ba wela mehleng ya ge Hiskia a sa phela.
Hiskia o be a na le mahumo a mantši ka kudu, a humile gagolo; a itirela nywako ya go bolokela disilifera, le digauta, le magakabje a bohlokwa, le dinoko, le dikotse, le dibjana tše di kganyogegago tša mehutahuta.
Ke yena Hiskia e a thibilego meetse a sediba se se elago se etšwa Gihoni, a iša meetse a sona thoko ya tlase ya bodikela motseng wa Dafida. Hiskia o be a na le mahlatse medirong ya gagwe ka moka.
Fela, mohla wola go tlile batseta ba dikgoši tša Babele, ba ba rometšwego go botšiša mohlolo o diregilego nageng, Modimo o be a mo tlogetše gore a mo leke, a tsebe tšohle tše di lego pelong ya gagwe.
Ge e le ditaba tše dingwe tša Hiskia, tša mediro ya gagwe ya borapedi, šedile di ngwadilwe diponong tša Jesaya morwa wa Amotsi le mo pukung ya dikgoši tša Juda le tša Isiraele.
Hiskia o ithobaletše le botatagwe; ba mmolokile serwaolong mabitleng a barwa ba Dafida; gomme Bajuda ka moka le ba Jerusalema ba mo godišitše lehung la gagwe; legatong la gagwe gwa buša Manase morwa wa gagwe.