×

Ika Bible 2018

2 Ihiẹn Mẹni 33

1
Manasẹ rị nwa ahụa mmẹbụọ k'o họnrin eze; Jerusalẹm k'ọ nọ kị; ahụa mmisẹn kwasị ọgụnnaị k'ọ kị.
2
O mẹ ihiẹn rịlẹni mma ẹnya Osolobuẹ, mẹsọnmẹ arụ ndị ahụn alị ndị Osolobuẹ chụpụ webanhan ndị Izrẹlụ mẹ.
3
Ọ tụnkinsọnmẹ ebe ile jẹn elu wẹ nọ e fe ofufe hụn nẹdi ẹ wụ Hezikaya tikpọ; o tumẹsọnmẹ ukpo wẹ nọ a chụnyeni Baalụ ichẹn-ichẹn ẹjan, zumẹsọnmẹ osisi onyẹnnyẹ-mmọn wụ Ashẹra. Ọ kụsọnmẹni kokisẹ lẹ ihiẹn ndị rị igwere isi alị, e fe wẹ.
4
Ọ rụnsọnmẹ ukpo nchụn-ẹjan ye Ụlọ-nsọ Osolobuẹ, Ụlọ-nsọ nwẹn Osolobuẹ ku oku ẹ, sị, “Ẹfan m k'a rịsọnmẹ Jerusalẹm.”
5
Ọ rụn ukpo wẹ nọ a chụnyeni okokisẹ lẹ ihiẹn ile rị igwere ẹjan ye imẹ ezi-ọgwa ẹbụbụọ rị Ụlọ-nsọ Osolobuẹ.
6
O mẹ ụmụ a ikẹnnyẹ gha imẹ ọkụn imẹ Ọdanmgbugbu Bẹn-Hinọm, e buche ẹka ihiẹn eje-mmọn, a gba ẹfa, e gi ikẹn ọzọ a rụn, e jẹn ẹfa, e buru ndị wẹ lẹ mmọn wị e ku; o mẹkẹmẹkẹ ihiẹn bu ọda rịlẹni mma ẹnya Osolobuẹ. Iwe nọ we Osolobuẹ.
7
O bu mmọn ọ tụ che imẹ Ụlọ-nsọ Chuku, ebe nwẹn Chuku ku oku ẹ, sị Defidi lẹ Solomọnụ nwa a, “Imẹ Ụlọ-nsọnị lẹ imẹ Jerusalẹm hụn m họrị imẹ ebọn Izrẹlụ ile kẹ m k'e buche Ẹfan m jẹnrin ejẹn.
8
Emẹkọzị m ụkụ ndị Izrẹlụ gha alị m ye ndị nẹdi ụnụ pụ, o mẹkwọ nị e dọnringhọ wẹ ẹnya mẹchanrịn ihiẹn ile m gwa wẹ, iwu ile lẹ uhi ile lẹ ọdịnalị ile hụn m gha ẹka Mozizi ye wẹ.”
9
Kanị Manasẹ e duhuhu nwan Juda lẹ ndị Jerusalẹm, nke wụnị e mẹ wẹ eje-ihiẹn karịdẹ ndị alị ndị hụ Osolobuẹ tikpọ buche ndị Izrẹlụ.
10
Osolobuẹ a gwa Manasẹ lẹ ndị nke ẹ oku, egọnni wẹ ntịn.
11
Ya Osolobuẹ nọ wẹhẹni wẹ ndị-isi agha eze Asiria lẹ ndị-agha wẹ d'e mẹ wẹ ihiẹn; wẹ nọ nwụnrụn Manasẹ, bu ukpo che ẹ imi, gi aba igwe-bronzu kpọdọn ẹ, we ẹ shi Babilọnụ.
12
Ọ nọ nwan nọ imẹ ụya ahụn ọ rị rịọma Osolobuẹ wụ Chuku ẹ, wetu enwẹn ẹ alị ọhụnma-ọhụnma ihun Chuku ndị nẹdi ẹ.
13
Ogẹn o gi mẹ ekpere jẹnni Osolobuẹ, arịrịọ a nọ mẹtụ Osolobuẹ, ọ nọ gọn ẹ ntịn; ya ọ nọ wekinhẹn ẹ Jerusalẹm, wezi alị-eze ẹ ye ẹ kịma. Ya kẹ Manasẹ nọ marịn nị Osolobuẹ wụ Chuku nke esi.
14
O mẹgụ, ọ nọ dọnzi mgbọn nke ẹbụọ wẹ tụnhunmẹ Obodo hụ Defidi tụn, gha ibẹka ọdịdan ẹnyanwụn Isi-mirin Gihọnụ hụn rị Ọdanmgbugbu d'e rukwọrị ebe wẹ gha a banye Ọnụ-mgbọn Azụn lẹ ebe mgbọn hụ nọ ghahunmẹ ugu Ofẹlụ; ọ tụnshizi ẹ elu ọda-ọda karị k'ọ han mbụ. Ọ nọ bu ndị-isi agha che obodo ọwụlẹ wẹ tụnhunmẹ mgbọn imẹ Juda.
15
O bupụchanrịn mmọn ndị hụ o te kọma, bupụ ihiẹn ahụn ọ tụ imẹ Ụlọ-nsọ Osolobuẹ, wepụzị ukpo nchụn-ẹjan mmọn ndị ọ rụnye ugu hụ wẹ tụnye Ụlọ-nsọ lẹ imẹ Jerusalẹm; ọ gha imẹ obodo kwapụ wẹ d'e tuhu.
16
Ya ọ nọ dọnzi ukpo nchụn-ẹjan Osolobuẹ, nọ elu ẹ chụn ẹjan-ekele lẹ ẹjan wẹ gi a kpanmịn Osolobuẹ, sị ndị Juda femẹ Osolobuẹ wụ Chuku Izrẹlụ.
17
Ndị Juda rịkwọ a chụn ẹjan ebe ichẹn-ichẹn jẹn elu ogẹnni, kanị Osolobuẹ wụ Chuku wẹ sụọ kẹ wẹ a chụnyeni ẹjan.
18
Ihiẹn ndị ọzọ mẹni ogẹn Manasẹ gi rị a kị, kẹ ekpere o gi rịọ Chuku ẹ kẹ oku ndị-amụma gisọnmẹ ẹfan Osolobuẹ wụ Chuku Izrẹlụ gwa a, wẹ ile rị ebe wẹ detọ ihiẹn mẹ ogẹn ndị-nze alị Izrẹlụ.
19
Ekpere ẹ lẹzi kẹ arịrịọ a dọn mẹtụ Chuku, lẹzi njọ a lẹ ihiẹn ile o gi latọ Osolobuẹ; ebe ile ọ rụntọ ụlọ-mmọn, zumẹsọnmẹ osisi onyẹnnyẹ-mmọn wụ Ashẹra lẹ mmọn-lẹ-iyi ndị hụ ọ kpụ n'o d'e welụa enwẹn ẹ alị, wẹ ile rị ebe ndị-amụma detọ ihiẹn mẹni.
20
Manasẹ a nwụnhụn, laburu ndị nẹdi ẹ, wẹ nọ li ẹ ye obi-eze ẹ, Amọnụ nwa a nọ rikin ẹ eze.
21
Amọnụ rị nwa ahụa ẹbụọ kwasị ọgụn k'ọ kịma Juda. Ahụa ẹbụọ k'ọ kị; imẹ Jerusalẹm k'ọ nọ kị.
22
O mẹ ihiẹn rịlẹni mma ẹnya Osolobuẹ kẹ Manasẹ nẹdi ẹ dọn mẹ. Amọnụ fechanrịn mmọn-lẹ-iyi ile Manasẹ kpụ, chụnyechanrịnnị wẹ ẹjan.
23
Kanị, o welụanị enwẹn ẹ alị ihun Osolobuẹ kẹ Manasẹ nẹdi ẹ dọn welụa enwẹn ẹ alị ikpanzụụn. Amọnụ emẹkẹnmẹkẹ ihiẹn ikpe gi ma a.
24
Ndị-ịhịamẹ Amọnụ zun'ẹ eje-umẹ, gbu ẹ tọ obi-eze ẹ.
25
Ya kẹ ndị alị nọ gbuchanrịn ndị ile zuni Eze wụ Amọnụ eje-umẹ, wẹ nọ kin Josaya nwa a eze gi nọkin ẹnya a.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes