×

Biblia Ande Chib Romani 2018

2 Chronicles 33

1
Kana o Manases thodape te charoil, sea leke desudui burs. Charoisarda ando Jerusalem pinda ta panch burs.
2
A o Manases saia bilacho angla o Del soke cherda e ezgode bilache kai cherdea e forura kai o Del chudia angla e israelitura.
3
Pale vazdia e thana dine e delenge kai o Ezekias peradaia. Vazdia thana te blagosin e Baale ta cherda e Asera sar cherdeale o Ajab o charo e Israeleko. Ta i blagosisarda e cheraien katar o miloso.
4
Vazdia altarura ando cher e Devleko, o cher kai o Del phendaia kai leko anav ka avel ostade ando Jerusalem.
5
Vazdia thana ande dui bar katar o cher e Devleko te sai blagosin e cheraien.
6
Ta ande bari umal katar o Ben Jinon dia kurbano pe chaven e delenge. Ta thodape te apogodil, cherdilo chirimatarko ta cherela chirimate. Gia bilacho saia kai o Del jolailo but.
7
Thoda ando cher e Devleko iek del kai vou cherda, o cher kai o Del phendaia e Davideke ta leke chaveke e Salomoneke: Me ka thovav ostade mo anav ande gava cher ando Jerusalem, kai esvirisardem maskar sa e viche e Israeleke,
8
ni ka tradav pale e israelen katar e phuv kai diem lenge daden, samo te cherena murni volia ta te cherena sa o sikadipe kai dia len mo sluga o Moises.
9
A von ni asunde. Ta o Manases cherda te aven e llene katar o Juda ta o Jerusalem mai bilache neko gola forura kai o Del zatrisarda angla e israelitura.
10
O Del dia orba e Manasea ta e foroia, a von ni thode sama.
11
Goleke o Del cherda te aven e boñikura katar o charo e Asiriako, ta phangle e Manasese, ta lanchonenchar inllarde le ande Babilonia.
12
Ta kana saia ande nuzda, molisailo e Devleke, ta keisailo sa pe liea angla pe dadengo Del.
13
Ta o Del asunda le ta cherda te irilpe ando Jerusalem ta te lel pale e charoina. Gia o Manases acharda kai o Gazda saia o Del.
14
Mapalal katar gala ezgode, o Manases vazdia o zido kai si avri katar o foro e Davideko. O zido saia katar e rig kai perel o kham ando Gijon, llik kai o udar kai ikhardol Macho. Vazdia iek baro zido truial katar o foro o Ofel, ta thoda boñikura ande sa e forura zidome katar o Juda.
15
Ikanda katar o cher e Devleko e delen, e slike, ta e altarura kai vazdiaia po burdo katar o cher e Devleko, ando Jerusalem ta chudia len avri katar o foro.
16
Mapalal lacharda o altar e Devleke, ta dia kurbanura ta so si dino pala e pas ta blagosipe. Phenda alav e Judaeke te radin e Gazdake, o Del e Israeleko.
17
A o foro pale lela te den kurbanura pe altarura kai cherdea e delenge, makar e kurbanura denalen te den liubao e Devleke.
18
Ogola ezgode kai cherda o Manases, leko molipe e Devleke, ta e alava kai die e poraukura ando anav e Gazdako, o Del e Israeleko, sa si ando lil katar e charura e Israeleke.
19
Leko molipe, sar asunda le o Del, sa o bilachipe kai cherda, e thana vazdine, e slike katar e Asera, ta e dela kai cherda mai anglal te keilpe, sa si pisime ando lil katar e poraukura.
20
Ta mulo o Manases ta prajosarde le leke dadenchar ando limori katar leko baro cher. Mapalal charoisarda o Amon, leko chavo.
21
Kana o Amon thodape te charoil sea leke bis ta dui burs, ta charoisarda ando Jerusalem dui burs.
22
A o Amon cherda o bilachipe angla o Del, isto gia sar cherda le leko dad, soke radisarda e delenge kai cherdaia leko dad o Manases.
23
Ta o Amon nikada ni keisailo angla o Del gia sar cherda le leko dad o Manases. Ta i barili but leki dos.
24
A leke sluge mislisaile te mundaren le, ta mundarde le ande leko baro cher.
25
Ondaka e llene katar o foro mundarde sa llenen kai mislisaile te mundaren e Amone, ta thode te charoil o Josias kai saia leko chavo.
Romani Ursari Bible 2018
Biblia ande chib Romani Sociedad Bíblica Chilena, 2018
:
Save Notes