Araakasi ngikaru a Manase ngitomon ka ngiarei na aliworor ngesi ekapolon a Yuda. Toliwor ngesi ekapolon alo Yerusalem a ngikaru a ngitomwon-kan ka ngikan.
Abu Manase torikok ngitunga a Yuda akisub ngasechesea naaronok noi na idwangito na asubete ngibukui lu etwarakini Ekapolon Akuj anakwap na alooso Ngisirael ngaren.
Sodi kimiek Ekapolon Akuj ngikarikok a ngasigerea a Asiria kitijikis Yuda. Kirumut kesi Manase, todupanakis ngimutuin nakwaan keng, toena a ngiriko, sodi torikosi Babilon.
Arumoret kanguna, abu Manase kiatak aoyau a awas ana alokinga, alowae alo alo kide ere a Daudi, napei anadipo ana eyei diyete elelea a Gion toten kwap lokidor a Ekolia ta ewae lo enyaritae Opel. Abu ngesi kiwaak ngikarikok a ngasigerea toweikis ngasigerea alorerea kadaang a Yuda alu adukitoe ngawasea.
Tolema ngesi alokai a Akuj ngakujo nagelayek ka ekisikwaane lokolong ewaakinit ngesi neni, ka ngikenoi lu ipeyonokinere ngakujo nagelayek, lusek adukitoe lomukura lo adukitoe akai a Akuj ta ngikenoi lu ayakasi lowaitin luche a Yerusalem. Kipudo ngesi ngiboro ngulu daang alore tachaka.
Abu ngesi tani tobongonok akiduk ekeno lo elipeenere Ekapolon Akuj, sodi kipeyo ngakipeyos a ekisil, ka nabuakinet Akuj alakara. Todungok ngesi ngitunga a Yuda daang atamar kilipa Ekapolon Akuj na erai Akuj a Ngisirael.
Ngakiro nache daang na asubi Manase, ka akilip na elipit ngesi Akuj keng ta ngakiro na esuruorete ngikadwarak ngesi alokiro a Ekapolon Akuj ana erai Akuj a Ngisirael, igiritae nakitab na enyaritae Ngakiro a ngikapolok a Isirael.
Akilip a ekapolon, ka eger lo atachunea Akuj, ka ekimar a ngasechesea ana kolong asubi ngesi eringa nyelunga akisech, ka ngakiro naaronok na asubi ngesi, ka ni elipeenere ngakujo nagelayek, ka ngakisikwaanet a akuj anaberu anabe Achera ana kolong asubi ngesi ta ngakujo nasubuna na elipit ngesi, igiritae daang nakitab na enyaritae Ngakiro a ngikadwarak.