×

Ika Bible 2018

2 Ihiẹn Mẹni 35

1
Josaya nọ Jerusalẹm mẹni Osolobuẹ Mmẹmmẹ-nghafe. Nke akp'ọhịn mmẹnọ imẹ ifọn ibuzọ kẹ wẹ gi gbu nwa-ebulu hụ wẹ gi e mẹ Mmẹmmẹ-nghafe.
2
O bu ndị nchụn-ẹjan che ọrụn wẹ rị ichẹn-ichẹn, kasị wẹ obi rụn ọrụn Ụlọ-nsọ Osolobuẹ.
3
Ọ sị ndị Livaị hụn nwọn a kuzi ndị Izrẹlụ ile ihiẹn rị nsọ ẹnya Osolobuẹ lẹ ihiẹn ọ sọ, “Bu ni Ẹkpẹti-nsọ che imẹ Ụlọ-nsọ Solomọnụ nwa Defidi eze Izrẹlụ tụn. Ẹlẹ hụn ụnụ e gi bumẹzi ẹ uvun. Rụnma nị nị nwan Osolobuẹ wụ Chuku ụnụ lẹ ndị nke ẹ wụ Izrẹlụ ọrụn.
4
Kwademẹ ni enwẹn ụnụ ikp'ụlọ-ikp'ụlọ imẹ itu ụnụ rị ichẹn-ichẹn nọkẹ kẹ Defidi wụ eze Izrẹlụ lẹ Solomọnụ nwa a dọn de ẹ.
5
Nọdịsọnmẹ ni itu-itu ihun Ụlọ-nsọ, itu-itu ụnụ jẹnkọ d'a nọ gbuni ebọn ohu-ohu imẹ umunẹ ụnụ ndị Izrẹlụ ebulu Nghafe ndị wẹ k'e wẹhẹ, ụnụ e werisọnmẹ itu ohu-ohu imẹ ndị Livaị che itu ụnụ ohu-ohu.
6
Gbu ni nwan ụmụ-ebulu Nghafe ndị hụ; fepụ ni ẹhụ; ụnụ e mẹmẹni ndị alị ụnụ ụmụ-ebulu ndị hụ. Mẹchanrịnn'a kẹ Osolobuẹ dọn gwa ụnụ ghahanị Mozizi.”
7
Josaya ye ndị mmaka ile rị ebẹhụ atụnrụn lẹ ewu nnụ-uku iri-kwasị-ọgụn (30,000) kẹni wẹ gi ye oyiye Nghafe cheni efin nnụ-uku ẹtọ (3,000). Ẹka eze kẹ ihiẹn ndịnị ile gha pụha.
8
Ịhaịmẹ eze tụzịkwọ ihiẹn ghapụha wẹ obi ye ndị alị lẹ ndị nchụn-ẹjan lẹ ndị Livaị. Hil'kia, Zẹkaraya lẹ Jehiẹlụ, ndị hụn Ụlọ-nsọ Chuku rị ẹka ye ndị nchụn-ẹjan anụ ọgụn-iri kwasị nnụ-isin (2,600) lẹzi efin ọgụn-mmisẹn (300) w'e gi ye oyiye Nghafe.
9
Konania lẹ umunẹ ẹ wụ Shẹmaya lẹ Natanẹlụ lẹ ndị-ndu Livaị ibe wẹ wụ Hashabia lẹ Jẹyẹlụ lẹ Jozabadị nọzị ye ndị Livaị ewu lẹ atụnrụn nnụ-uku (5,000) lẹ efin ọgụn-isẹn kwasị nnụ (500) w'e gi ye oyiye Nghafe.
10
A kwademẹgụ wẹ mmẹmmẹ hụ, ndị nchụn-ẹjan nọ wuzosọnmẹ ọnọdị wẹ, uwẹ lẹ ndị Livaị nọdịyesọnmẹnini wẹ itu-itu nọkẹ kẹ eze dọn gwa wẹ.
11
E gbu wẹ ụmụ-ebulu Nghafe, ndị nchụn-ẹjan nọ fe ẹdeke wẹ buye wẹ kẹ wẹ dọn e fe ẹ, ndị Livaị nọ gba anụ ndị ahụn akpụkpọ.
12
E wepụ wẹ ẹjan w'a dụn ọkụn, nị wẹ hụn ụzọ bu wẹ yesọnmẹ ndị alị kẹ wẹ dọn dọnmẹsọnmẹ wẹ ikp'ụlọ-ikp'ụlọ, nị wẹ gi chụnyeni Osolobuẹ ẹjan, kẹ wẹ dọn de ẹ imẹ Ẹkụkwọ Mozizi. Ẹrịra kẹ wẹ mẹzi efin ndị hụ.
13
A hụnmagbu wẹ anụ mẹmẹ Nghafe kẹ wẹ dọn de ẹ imẹ Iwu, gi ite-uku, ite-nta lẹ ugbugbẹ shi oyiye-nsọ ndị hụ; ya wẹ nọ ke anụ hụ ozigbo ye ndị hụ ile.
14
Omẹgụ, wẹ wụ ndị Livaị nọ mẹmẹ nke wẹ lẹ nke ndị nchụn-ẹjan, makẹni ndị nchụn-ẹjan, ndị ẹbozo Ẹrọnụ, rịchanrịn ọrụn a dụn ẹjan ndị hụ w'a dụn ọkụn ọkụn, a dụnzị ụtọrọ anụ ọkụn ọhị e we gba. Ya haịn ndị Livaị gi mẹmẹ nke wẹ lẹ ndị nchụn-ẹjan, ndị ẹbozo Ẹrọnụ.
15
Ndị ọkụ-ẹbụ, ebọn Asafụ, hụsọnmẹ ebe w'a nọdị nọkẹ kẹ Defidi lẹ Asafụ lẹ Hẹmanị lẹ Jedutunu hụn a hụnnị Defidi ọhụn ogẹn Defidi dọn gwa wẹ. Ẹlẹ hụn ndị nche rị ọnụ-mgbọn ichẹn-ichẹn e gi gha ọnụ-ọrụn wẹ pụ, ebe o mẹ ni ndị Livaị ibe wẹ hụ e mẹmẹni wẹ anụ wẹ.
16
Ẹrịra kẹ wẹ dọn mẹchanrịn ihiẹn ile Osolobuẹ sị wẹ e mẹ imẹ Mmẹmmẹ-nghafe lẹ ihiẹn ile gbashịarị ịchụn-ẹjan w'a dụn ọkụn elu ukpo nchụn-ẹjan Osolobuẹ; wẹ mẹchanrịn wẹ kẹ eze wụ Josaya dọn kụ.
17
Ẹrịra kẹ ndị Izrẹlụ hụ rị ebẹhụ dọn mẹ Mmẹmmẹ-nghafe hụ ogẹn ahụn, gizi ọrọgbọ akpọhịn ẹsa Iwu ku mẹ Mmẹmmẹ Brẹdi nwọnlẹni yisti o gi a fụ.
18
Emẹtuni wẹ Mmẹmmẹ-nghafe ẹnịna imẹ Izrẹlụ gha ogẹn onyẹ-amụma wụ Samuẹlụ d'e ru ogẹnni. Onwọnzini eze Izrẹlụ mẹtu Mmẹmmẹ-nghafe kẹ Josaya dọn mẹ ẹ, ya lẹ ndị nchụn-ẹjan, ndị Livaị lẹ ndị Juda ile lẹ ndị Izrẹlụ Ẹbamịn ugu ile hụn rị ebẹhụ lẹ ndị Jerusalẹm.
19
Nke ahụa mmẹsatọ Josaya kịma kẹ wẹ mẹ Mmẹmmẹ-nghafeni.
20
Ogẹn ihiẹn ndịnị ile gi mẹgụ, ogẹn Josaya gi dọnmẹgụ Ụlọ-nsọ ọhụnma, ogẹn ahụn kẹ Nẹko eze Ijiptu nkẹ gi jẹnmẹ n'o d'a lụ agha imẹ Kakẹmishi rị Iyi Yufretisi, Josaya nọ pụha n'o d'a lụsọn ẹ agha.
21
Kanị Nẹko nọ zi wẹ d'a jụ a, “Kị biri mmẹ lẹ ịyụ, Eze Juda? Ẹlẹ ịyụ kẹ m lala d'a lụsọn agha ogẹnni; alị-eze mmẹ lẹ wẹ rị a lụ kẹ m jẹnkọ d'e kunrun. Chuku gwa m mẹ ẹ ozigbo-ozigbo; egbọndọnkwọlẹ nwan Chuku hụn mmẹ lẹ ịya wị, makẹ ọ gha e tikpọ ị.”
22
Kanị Josaya alan'a tọ; kama, o kẹnhutọ nọkẹ sị ẹlẹ ya wụ eze, jẹnmẹ d'a lụsọn ẹ agha. O gọnni ntịn ihiẹn Osolobuẹ sị Nẹko gwa a, ọ nọ jẹn d'a lụsọn ẹ agha alị-aradan rị Mẹgido.
23
Ndị a gba ụta nọ gba Eze wụ Josaya ụta. Josaya nọ sị ndị-agha a, “Bupụ nị m, nị a rụọlẹ wẹ m eje-ẹhụ.”
24
Ya wẹ nọ gha ụgbọ-ẹshin ẹ bupụha a, bu ẹ che ụgbọ-ẹshin ẹ ọzọ, bu ẹ la Jerusalẹm; ọ nọ nwụntọ imẹ Jerusalẹm ebẹhụ. Wẹ nọ li ẹ ye ebe wẹ liye ndị nẹdi ẹ, Juda ile lẹ Jerusalẹm ile nọ kwan a.
25
O nwọn ẹbụ onyẹ-amụma wụ Jerimaya de gi kwan Josaya hụn ikẹnnyẹ lẹ ikpoho ile a bụ ẹbụ gi a nyanhan Josaya d'e rukwọ ụhụọhịn tannị; ẹbụ ndị hụ nọ họnrin ọdịnalị imẹ Izrẹlụ; wẹ rị nwan ebe wẹ detọ Ẹbụ-ẹkwan.
26
Ihiẹn ndị ọzọ mẹni ogẹn Josaya gi rị a kị lẹ k'o dọn fe Osolobuẹ ọhụnma-ọhụnma kẹ Iwu Osolobuẹ dọn ku,
27
wẹ ile, gha mbidọn d'e ru njẹndemẹ, rịchanrịn Ẹkụkwọ ndị-nze Juda lẹ Izrẹlụ Ẹbamịn ugu.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes