Eka nowuoyo gi jo-Lawi mane owal ni tich Ruoth Nyasaye, mane puonjo jo-Israel duto, kowachonigi niya, “Keturu Sanduk Maler e Hekalu mane Solomon wuod Daudi, ruodh Israel, ogero. Ok onego uting’e e goku kendo. Omiyo koro tiuru ni Ruoth Nyasaye ma Nyasachu, kendo ni joge Israel.
Jodonge bende ne mor gi kelo chiwo ni ji gi jodolo kod jo-Lawi. Hilkia gi Zekaria kod Jehiel, jotelo madongo mag Od Ruoth Nyasaye, nochiwo ni jodolo nyirombe gi nyidiek alufu ariyo gi mia auchiel, kod ruedhi mia adek, mondo otimgo misango mar Pasaka.
Konania bende, kod Shemaya gi Nethanel ma owetene kod Hashabia gi Jeyel kod Jozabad, ma jodong jo-Lawi, nomiyo jo-Lawi nyirombe gi nyidiek alufu abich kod ruedhi mia abich mondo otimgo misango mar Pasaka.
Ne gipogo boche mag misengnii ni migepe mag dhoudi ma ok jo-Lawi, mondo owang’ ni Ruoth Nyasaye kaka ondiki e Kitap Musa. Kamano e kaka ne gitimo gi ruedhi bende.
Bang’e ne giloso maggi giwegi kod mag jodolo, nikech jodolo ma yawuot Harun nodich gi timo misengni miwang’o pep, kod tich wang’o bor, nyaka otieno. Mano emomiyo jo-Lawi noloso maggi giwegi kod mag jodolo ma yawuot Harun.
Jower ma yawuot Asaf ne ni keregi, kaluwore gi chik Daudi, gi mar Asaf, gi mar Heman, kod mar Jeduthun janen mar ruoth. Jorit dhorangeye bende ne rito dhorangeye duto. Onge ng’ama nonego a e tije mondo odhi olos chiemo, nikech owetegi ma jo-Lawi nosetedonigi.
Kamano tich Ruoth Nyasaye duto mar Pasaka kod mar timo misengni miwang’o pep e kendo-mar-misango mar Ruoth Nyasaye notim chieng’ono, kaka ruoth Josia nochiko.
Pasaka machal kamano ne pok otimie Israel chakre ndalo mag Samuel janabi. Onge ruodh Israel moro amora ma nosetimo Pasaka machal gi mano mane Josia kaachiel gi jodolo gi jo-Lawi gi jo-Jerusalem kod ji duto ma noa Juda gi Israel otimo.
To Neko noorone joote gi wach niya, “Walar ang’o kodi, ruodh Juda? In ok ema abiro monji kawuono, to abiro mana monjo dhoot ma an go gi lweny, kendo Nyasaye osechika mondo atim piyo. Kik ipiem gi Nyasaye man kora, nono to abiro tieki.”
Kata kamano Josia ne ok nyal weye, to noramo arama ni nyaka oked kode. Ne ok odewo wach mane Nyasaye omiyo Neko owacho, to nodhi adhiya mi girado e paw Megido.
Omiyo jotichne nogole e gache mi gitere Jerusalem ka giting’e e gache machielo. Notho kuno, mi ne giyike but kwerene, kendo jo-Juda gi jo-Jerusalem duto noywage.
Jeremia bende nochuogo wend ywak ni Josia, kendo jower duto, machwo gi mamon, pod wero wendno nyaka chil kawuono. Gino oselokore tim jo-Israel kendo wendno ondik e Kitap Wende Ywak.