×

Ika Bible 2018

2 Ihiẹn Mẹni 36

1
Josaya a nwụnhụngụ, ndị alị Juda nọ weri Jeho-ahazị nwa Josaya, kin ẹ eze imẹ Jerusalẹm, ọ nọ rikin nẹdi ẹ eze.
2
Jeho-ahazị rị nwa ahụa ẹtọ kwasị ọgụn k'o họnrin eze; ifọn ẹtọ k'ọ kị; imẹ Jerusalẹm k'ọ nọ kị.
3
Eze Ijiptu nọ napụ a eze ọ wụ imẹ Jerusalẹm, be ndị Juda ẹkpa-siliva uku ọgụn-isẹn lẹ ẹkpa goru uku ohu.
4
Eze Ijiptu nọ tumẹ Ẹliakim nwẹnẹ Jeho-ahazị eze Juda lẹ Jerusalẹm, gbehutọ ẹfan Ẹliakim shi Jehoyakim. Eze Ijiptu hụ wụ Nẹko e bu eze wụ Jeho-ahazị nwẹnẹ Ẹliakim la Ijiptu.
5
Jehoyakim rị nwa ahụa isẹn kwasị ọgụn k'o họnrin eze. Ahụa mmanaị k'ọ kị; imẹ Jerusalẹm k'ọ nọ kị. O mẹ ihiẹn rịlẹni mma ẹnya Osolobuẹ wụ Chuku ẹ.
6
Nebukadineza eze Babilọnụ nọ bịa d'a lụsọn ẹ agha, kpọma a ẹgan igwe-bronzu, we ẹ la Babilọnụ.
7
Nebukadineza a kwarịzịghọ ihiẹn ndị ọ kwarị imẹ Ụlọ-nsọ Osolobuẹ, bu wẹ che obi-eze ẹ rị Babilọnụ.
8
Ihiẹn ndị ọzọ mẹni ogẹn Jehoyakim gi kị, arụ ile o mẹ lẹ eje-ihiẹn ile wẹ hụn ẹka a rị imẹ ẹkụkwọ ndị-nze Izrẹlụ lẹ Juda. Jehoyakini nwa a nọ rikin ẹ eze.
9
Jehoyakini rị nwa ahụa mmẹsatọ k'o họnrin eze. Imẹ Jerusalẹm k'ọ nọ kị; ifọn ẹtọ lẹ akpọhịn iri k'ọ kị. O mẹ ihiẹn rịlẹni mma ẹnya Osolobuẹ.
10
Mbidọn ahụa e ru, eze Babilọnụ wụ Nebukadineza nọ zi wẹ d'e wẹhẹ ẹ Babilọnụ — ịya lẹ ihiẹn ndị rị mkpa rị imẹ Ụlọ-nsọ Osolobuẹ; Nebukadineza nọ kin Zẹdikaya nwẹnẹ-nẹdi Jehoyakini eze Juda lẹ Jerusalẹm.
11
Zẹdikaya rị nwa ahụa ohu kwasị ọgụn k'o họnrin eze. Ahụa mmanaị k'ọ kị; imẹ Jerusalẹm k'ọ nọ kị.
12
O mẹ ihiẹn rịlẹni mma ẹnya Osolobuẹ wụ Chuku ẹ, o welụanị enwẹn ẹ alị kweyeni Jerimaya onyẹ-amụma hụn gwa a ihiẹn Osolobuẹ ku.
13
Ọ pazịkwọ oku eze wụ Nebukadineza hụn mẹgụ a kunn'ẹ ẹfan Osolobuẹ n'o k'e humẹn'ẹ isi. O bumẹ isi-ikẹn, kpọkin obi, n'ọ rohutọkọ mẹ uche Osolobuẹ wụ Chuku Izrẹlụ.
14
Ẹlẹdẹ ọhụn sụọ, ndị-isi nchụn-ẹjan ile lẹ ndị alị Juda ile hụ a latọ Osolobuẹ a latọwaye, e mẹ arụ ile alị ndị ọzọ e mẹ, e mẹrụ Ụlọ-nsọ Osolobuẹ, hụn Osolobuẹ dọngụ nsọ imẹ Jerusalẹm.
15
Osolobuẹ wụ Chuku ndị nẹdi wẹ hụ e zi ndị ozi d'a gwa wẹ oku, a gwa wẹ ọgụgwa-ọgụgwa, makẹni omikẹn ndị nke ẹ lẹ ebe obibi ẹ rị e mẹ ẹ.
16
Kanị wẹ hụ e gi ndị ozi Osolobuẹ a mụ ẹmụ, e legberi oku Osolobuẹ, a mụ ndị-amụma a ẹmụ — d'e ru ebe Osolobuẹ nọ gi olulu bunụmanị ndị nke ẹ, d'e runi nwanahịn arịzị a.
17
Osolobuẹ nọ zihẹni wẹ Nebukadineza, eze ndị Kal'di, ndị alị Babilọnụ. Nebukadineza nọ gi ọpịa-agha gbu ikorọbịa wẹ imẹ Ụlọ-nsọ kẹti-kẹti. Ọ latọnị okorọbịa, ọ latọnị nwagbọọ; ọ latọnị okẹnnyẹ-ọba, ọ latọnị ẹgẹdi. Osolobuẹ buchanrịn wẹ ile che Nebukadineza ẹka.
18
Nebukadineza a kwarịchanrịn ihiẹn ile rị imẹ Ụlọ-nsọ Chuku, kẹ ihiẹn-uku kẹ ihiẹn-nta, kwarịzịkwọ ihiẹn ndị rị mkpa wẹ dọnmẹ imẹ Ụlọ-nsọ Osolobuẹ lẹ ihiẹn ndị rị mkpa eze lẹ ịhaịmẹ ẹ dọnmẹ, kpọnla Babilọnụ.
19
Wẹ nọ yi Ụlọ-nsọ Chuku ọkụn, kụtu mgbọn Jerusalẹm, dụnpụ ụlọ ile rị mkpa rịn'a ọkụn, tikpọ ihiẹn ile rị mkpa rị ebẹhụ.
20
Ọ nọ kpọnrin ndị ile họdụ imẹ Jerusalẹm, ndị hụn wanahịn ọpịa-agha, kpụn wẹ shi Babilọnụ, wẹ nọ femẹ ya lẹ ụmụ a d'e ru mgbe alị-eze Pẹshịa gi kịma.
21
Alị nọ zu ikẹn ẹ — ọrọgbọ ile wẹ gizilẹni bi ẹ. O zu ikẹn, ahụa iri kwasị ọgụn-ẹtọ hụ e zu, nọkẹ kẹ Osolobuẹ dọn ku ghahanị onyẹ-amụma wụ Jerimaya.
22
O ru ahụa Saịrọsị wụ eze Pẹshịa kịma, Osolobuẹ nọ mẹtụ Saịrọsị eze Pẹshịa ẹka obi kẹni ihiẹn Osolobuẹ gi Jerimaya ku hụn ụzọ bụn. Saịrọsị nọ zi ozi ghagbarị ebe ile ọ rị a kị, dezikwọ a, sị,
23
“Ọnwan wụ ihiẹn Saịrọsị eze Pẹshịa ku: Ọ sị, ‘Osolobuẹ, Chuku rị elu-igwee, e yegụọ m alị-eze ile rị ụwa. O tumẹgụọ m nị m tụnn'a Ụlọ-nsọ imẹ Jerusalẹm hụn rị Juda. Onyẹ nke ẹ ọwụlẹ hụn rị imẹ ụnụ, Osolobuẹ wụ Chuku ẹ ya nọyen'ẹ; ya lashi nwan ebẹhụ.’ ”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes