×

WẼNNAAM SEBRE 2014

2 NA-ROT 36

1
Woto, tẽngã yãka a Zoziyaas biig a Zoakaaz n kɩt t'a led a ba wã zĩigẽ n lebg rĩma.
2
A Zoakaaz sẽn waa n na n lebg rĩma t'a tara yʋʋm pisi la a tãabo. La a rɩɩ naamã kiis a tãab Zeruzalɛm.
3
Ezɩpt rĩm a Faarõ Neko sika a Zoakaaz naamẽ, n yiis-a Zeruzalɛm. Ezɩpt rĩma yaoolga tẽngã yaoodo, n yeel tɩ b yao wanzuri kɩlo tus a tã la kobs-nu, ne sãnem kɩlo pis-tã la a nu.
4
Ezɩpt rĩmã kɩtame t'a Zoakaaz ba-biig Eliyakim lebg rĩm n dɩ Zʋʋda ne Zeruzalɛm naam. La yẽnda teka a Eliyakim yʋʋrã n pʋd-a t'a Yoyakim. La Ezɩpt rĩm a Neko talla a ba-biig a Zoakaaz n kẽng Ezɩpt tẽnga.
5
A Yoyakim sẽn wa n na n deeg naamã, rẽ t'a tar yʋʋm pisi la a nu. Yẽnda rɩɩ naam Zeruzalɛm n kaoos yʋʋm piig la a yembre. A Yoyakim maana sẽn yaa wẽng Sẽn-Ka-Saab nifẽ, wa yẽnda yaab-rãmbã sẽn dag n maan n beeg Sẽn-Ka-Saabã.
6
Babilond dĩm a Nebukatnedzaar wa n na n zab ne a Yoyakim, la a yõk-a lame n balg ne zũud sogl a yiib n tall-a n kẽng Babilonde.
7
Rĩm a Nebukatnedzaar wʋka Sẽn-Ka-Saab roogã teed buud fãa n tall n loog ne Babilonde, la a tɩ ning-b-la a na-yirã pʋga.
8
A Yoyakim tʋʋm a taabã ne yel-beed nins fãa a sẽn maanã, la bũmb ning fãa sẽn paamã wã gʋlsa Israyɛll ne Zʋʋda rĩm-dãmbã kibay sebr pʋga. La yẽnda bi-ribl a Zozakẽ leda yẽnda zĩigẽ n dɩ naamã.
9
A Zozakẽ sẽn wa n na n deeg a naama t'a tara yʋʋm a nii. A rɩɩ a naamã Zeruzalɛm kiis a tãab la rasem piiga. A Zozakẽ maana sẽn yaa wẽng Sẽn-Ka-Saab nifẽ.
10
Yʋʋmdã sẽn wa n na n baasã, a Nebukatnedzaar kɩtame tɩ b tall a Zozakẽ ne Sẽn-Ka-Saab roogã te-sõamy wã fãa n kẽng Babilonde. La a kɩt t'a Sedesiyaas lebg rĩm n soog Zʋʋda ne Zeruzalɛm.
11
A Sedesiyaas sẽn wa n na n lebg rĩmã t'a tara yʋʋm pisi la a yembre, la yẽnda rɩɩ naamã Zeruzalɛm yʋʋm piig la a yembre.
12
A Sedesiyaas maana sẽn yaa wẽng Sẽn-Ka-Saab sẽn yaa yẽnda Wẽnnaamã nifẽ. Yẽnda ka sik a meng n sak Sẽn-Ka-Saab sẽn dag n kɩt tɩ b no-rɛɛs a Zeremi gom ne yẽnda wã ye.
13
Yẽnda tol n yik n zẽka a zug ne a Nebukatnedzaar n kɩɩs wẽeneg ning a Nebukatnedzaar sẽn dag n kɩt t'a wẽen ne Wẽnnaam yʋʋrã. Yẽnda kenga a sũurã n ka sak Sẽn-Ka-Saabã ye.
14
La maan-kʋʋdbã taoor dãmbã ne tẽngã nebã fãa me maana sẽn ka zemse, bãmb maana yel-beed nins fãa buud a taabã sẽn maandã, n dẽgem Sẽn-Ka-Saab roogã b sẽn da welg toor Zeruzalɛmã.
15
La Sẽn-Ka-Saab sẽn yaa bãmb ba-rãmb Wẽnnaam tʋma b no-rɛɛsdb tɩ b wa keoog-ba, bãmb sẽn dag n zoet b nebã, la b roogã nimbãanegã yĩngã.
16
La bãmb dag n yaanda Wẽnnaam tʋmtʋmdbã n paoogd b goamã, la b yaand-b no-rɛɛsdbã, hal tɩ Sẽn-Ka-Saab sũurã wa puug ne b nebã tɩ tɩɩm ka ye.
17
Woto, Sẽn-Ka-Saab kɩtame tɩ Kalde naabã wa zab ne bãmba, n kʋ b kom-bɩɩsã ne zabr sʋʋs b Wẽnd doogẽ wã, bãmb ka bas bi-ribl bɩ bi-pugla, wall nin-kẽem bɩ ned sẽn tar zoob peend ye. A bas-b-la fãa a nugẽ.
18
Yẽnda wʋka Sẽn-Ka-Saab roogã teed fãa, te-bɛd la te-bãoonego. Yẽnda wʋka rĩmã ne a nanambsã laog fãa n tall n kẽng Babilonde.
19
La a yõoga Wẽnnaam doogã bugum, n wã Zeruzalɛm lalgã, la b yõog na-yiyã fãa, la b sãam te-sõamy wã fãa.
20
La a tall neb nins sẽn põs kũumã n loog yembdo. La bãmb kell n yɩɩ rĩma ne a kamb yembs hal n tãag Pɛrs soolem naabã sẽn wa n na n deeg naamã.
21
Yɩɩ woto la Sẽn-Ka-Saab sẽn dag n gom ne a Zeremi wã paam pidsgu. Ad bãmb sẽn dag n yeelã: «Tẽngã na n paa vɩʋʋg yʋʋm pis-yopoe, hal n tãag a vʋʋsg rayã sẽn na n wa pidi.»
22
La sẽn na n yɩlẽ tɩ Sẽn-Ka-Saab sẽn dag n gom ne a Zeremi wã paam pidsgu, Sẽn-Ka-Saab neka Pɛrs naab a Siruus yamã, a naamã pipi yʋʋmdã, t'a gʋls n wilg a soolmã neb fãa n yeele:
23
«Ade, Pɛrs rĩm a Siruus sẽn yetame: ‹Sẽn-Ka-Saab sẽn yaa saasẽ Wẽnnaamã kõo maam soolem-dãmb nins fãa sẽn be dũniyã zugã. La bãmb yeela maam tɩ m me roog Zeruzalɛm sẽn be Zʋʋda soolmã pʋgẽ wã. Woto, ned ning fãa sẽn yaa bãmb soolmã neda, bɩ a kẽnge, la bɩ Sẽn-Ka-Saab sẽn yaa yẽnda Wẽnnaamã zĩnd ne-a.»
Mossi MPBU 2014
Moore Bible Bible Society of Burkina Faso, 2014
:
Save Notes