Ezipt dĩma wa n yiis-a-la Zerizalɛɛm, la a kɩtame tɩ tẽnga rãmb yao wanzurf sẽn ta neb koabg la pis-nu zɩɩbo la b yao sãnem sẽn ta neb piig la a nu zɩɩbo.
A Zoyakim sẽn waa n na n dʋ zaoor t'a tara yʋʋm pisi la a nu. A rɩɩ naam yʋʋm piig la a ye Zerizalɛɛm. A maana ka ta Naaba-Wẽnd, a Wẽnnaama, yam ba bilfu.
Yʋʋmd sẽn vẽke, dĩm a Nabikodonozor toolame tɩ b tɩ wa ne-a. A tall-a lame n kẽng Babilon ne wẽnd dooga teedo, n yaool n lebs a ba-biig a Sedesiyas a zaoorẽ, Zerizalɛɛm.
A zẽka a zug ne dĩm a Nabikodonozor; a yaool n da kãaba Naaba-Wẽnd taoore t'a na n tũu bãmba. A Sedesiyas naka a kãare, n kidb a sũuri, a ka lɛɛg n pʋg Naaba-Wẽnd a Israyɛl Wẽnnaam ye.
Sẽn paas wẽnema, ad-y maan-kʋʋdba taoor dãmba, ne kãsem dãmb a taabã ka vʋʋs ne b tʋʋm yooda ye, b maan bu-zẽmba wɩɩbda gilli, n dẽgem doog ninga sẽn da me Zerizalɛɛm Soaala-Wẽnd yĩngã.
Naaba-Wẽnd, b yaab rãmb Wẽnnaama, tʋma bãngdb ka tɛka, la naoor yaka, n yeel-b tɩ b maan gũusgu. La rẽ yaa b sẽn da zoet b buuda nimbãanega la b ra pa rat b rooga sãoongã.
Dẽ me la b kɩt yã tɩ Babilon dĩma kood b kom-bɩɩba, b wẽnd dooga pʋga, n ka kees bi-ribla, bi-pugla, bɩ nin-kẽem zug sẽn pelg ye. Soaala-Wẽnd bas-b-la fãa Babilon dĩma nugẽ.
Sʋʋga sẽn ka kʋ b rãmba, a Nabikodonozor wʋk-b lame n kẽng yembd Babilon. B paa be n tʋm dĩma ne a kamb yĩnga, n ta Pɛrs rãmb sẽn wa n vigl b rĩungu Babilon.
Woto taasa Soaala-Wẽnd sẽn da yeel ne bãngd a Zeremi noore: «Tẽnga na n yaoo vʋʋsga raar sama, a me na vʋʋs ne wombo, yella sẽn na n lʋɩ a zugu tɛka, tɩ yʋʋm wa pid pisopoe.»
Pɛrs dãmb dĩm, a Sirus, pipi yʋʋmde, sẽn na n yɩlẽ n pids koɛɛg ning b sẽn yiis ne a Zeremi noore, Naaba-Wẽnd kõ-la a Sirus yam sõngo, t'a kɩt tɩ b moon la b gʋls n yaglge, a soolma fãa pʋgẽ.
Ad-a Sirus, Pɛrs dãmb dĩma koɛɛga: «Naaba-Wẽnd, yĩngr Wẽnnaam dɩka dũni wã rĩunda fãa n sagl m nugẽ. Bãmb n yeel maam tɩ m me roog n kõ-b Zerizalɛɛm. Ned ning fãa sẽn yaa b buuda ned, bɩ Wẽnd zĩnd ne-a la a rɩk Zerizalɛɛm sore!»