Kamano Solomon notieko tich duto mag Ruoth Nyasaye, eka noomo gik moko duto mane Daudi wuon mare osechiwo ni Nyasaye, mi noketogi kuonde keno mag Od Nyasaye. Ne gin fedha gi dhahabu kod gik lemo moko.
Kane jodolo owuok oa Kama Ler, bor polo nopong’o Od Ruoth Nyasaye duto. Nonwang’o ka jodolo duto osepwodhore mondo oti tijgi, ma ok gidewo ndalo mochan-gie.
Jo-Lawi duto ma jower nochung’ yo wuok chieng’ mar kendo-mar-misango. Ne gin Asaf gi Heman gi Jeduthun kod yawuotgi gi jowetegi. Ne girwako lewni mag law katana maber, ka gigoyo ongeng’o gi thumbe mopogore opogore. Jodolo mia achiel gi piero ariyo bende ne goyo tung’.
Joma ne goyo tung’go kaachiel gi jower, ne wer ka pako Ruoth Nyasaye, kendo goyone erokamano. Ne gigoyo tung’ gi thumbe mopogore opogore ka gipako Ruoth Nyasaye gi wer niya, “Ruoth Nyasaye ber! Herane mosiko ochwere.”