Ta kana getosarde sa o rado kai o Salomon bichalda te cheren ando cher e Devleko, o Salomon anda sa e ezgode sunakune ta rupune kai o David diaia e Devle, ta thoda len ando barvalipe katar o cher e Devleko.
Ondaka o Salomon ikharda e phuren katar o Israel, e gazden katar sa e viche, ta e mai preche llenen katar sa e familie katar o Israel, te anen e arka katar o Del o Gazda katar o foro e Davideko, kai gua si o Sion.
Andre ande arka samo sea e dui kotora barrustune kai o Moises thoda len ando Joreb. Gala sea e kotora barrustune kana o Del dia po alav e llenenge katar o Israel, kana likiste katar o Ejipto.
Sa e levitura kai llilabena, o Asaf, o Eman ta o Jedutun sea pe porrne pe chavenchar ta pe familiaia pe rig kai likel o kham katar o altar, sa sea furiade ando lino. Sea len sastrura kai basen, salteriura ta arpe. Lenchar sea stotina ta bis popura kai basalena ande tuturuge.
Kana basalena e tuturuge llilabena sargo iek lleno te blagosin ta te den fala e Devle, ta basalena ande tuturuge, ande sastrura kai basalen ta ande aver basalde, ta llilabena: Blagosisaren e Devle soke vou si lacho ta leko volipe si ostade. Ondaka iek oblako ucharda o cher e Devleko.