×

Ika Bible 2018

2 Ihiẹn Mẹni 6

1
Solomọnụ nọ sị, “Osolobuẹ e kugụọ n'o k'e biri imẹ orukpu gitọnị;
2
a tụngụọnị m'ị nwan okẹn Ụlọ-nsọ nwọn ọghọ, ebe hụn i k'e bi jẹnrin-ejẹn.”
3
Eze nọ gbehutọ, bu ihun zinmẹ Izrẹlụ hụ ile wuzo ebahụn, gọzi wẹ.
4
Ọ nọ sị: “Ịja-mma ya rịnị Osolobuẹ wụ Chuku Izrẹlụ, makẹni o gigụọ nwan ẹka a mẹzu nkwa o gi ọnụ a kwe nẹdi m wụ Defidi. Makẹni, Osolobuẹ ku ẹ, sị,
5
‘Kete m'a ghalẹ Ijiptu wepụha ndị nke m, ahọrịtuni m obodo ọwụlẹ imẹ ebọn ọwụlẹ rị Izrẹlụ, nị wẹ tụn Ụlọ-nsọ Ẹfan m k'a rị mọbụ họrị onyẹ ọwụlẹ nị ya k'e du ndị nke m wụ Izrẹlụ.
6
Kanị, a họrịgụọ m nwan Jerusalẹm kẹni Ẹfan m hụn ụzọ rị ebẹhụ; a họrịgụọzị m Defidi n'ọ hụn ụzọ kị ndị nke m wụ Izrẹlụ.’
7
“Nẹdi m wụ Defidi te bu ẹ obi n'o k'a tụn Ụlọ-nsọ Ẹfan Osolobuẹ wụ Chuku Izrẹlụ k'a rị.
8
Kanị Osolobuẹ nọ sị nẹdi m wụ Defidi, ‘Ebe ọ rị ị obi nị tụn Ụlọ-nsọ Ẹfan m k'a rị, y'e mẹkẹ ihiẹnni gi rị ị obi.
9
Kanị, ẹlẹ ịyụ k'a tụn Ụlọ-nsọ ahụn; nwa ị hụn ị mụ ẹfọ, ịya k'a tụn ụlọ-nsọ Ẹfan m k'a rị.’
10
“Osolobuẹ e mẹzugụọ nkwa o kwe. A nọkingụọ m ẹnya nẹdi m wụ Defidi; mmẹ nọdị nwan ukpo eze Izrẹlụ nọkẹ kẹ Osolobuẹ dọn kwe nkwa; a tụngụọ m nwan ụlọ-nsọ nwẹn Ẹfan Osolobuẹ wụ Chuku Izrẹlụ k'a rị.
11
E bugụọ m Ẹkpẹti-nsọ, hụn nkwerigbama hụ Osolobuẹ tumẹ ẹgbata ịya lẹ ndị Izrẹlụ rị tọ ebẹhụ.”
12
Solomọnụ nọ wuzo ihun ukpo nchụn-ẹjan Osolobuẹ, ihun Izrẹlụ ile, shịapụ ẹka a ẹbụbụọ.
13
Solomọnụ rụntọ mgbankpo igwe-bronzu o k'e wuzo. Usue ẹ lẹ ụshịa a wụsọnmẹ ọb'ụkụ ẹsa lẹ mkpikpi, ojijẹn-elu ẹ ọb'ụkụ ẹnọ lẹ mkpikpi. Ahanmahan ezi-ọgwa k'o butọ a. Elu ẹ k'o wuzo nwan. O gbu osekpu idẹnya Izrẹlụ ile, ya lẹ ẹka ẹbụbụọ ọ shịapụ buzinmẹ elu-igwere.
14
Ọ nọ sị: “Euu Osolobuẹ, Chuku Izrẹlụ, onwọnni Chuku nọ kẹ yụ, kẹ imẹ elu-igwee kẹ elu-ụwa — ịyụ hụn e gi ihiẹn-ọsụsụọ i kwe nkwa a e sọn idibo i hụn gichanrịn obi wẹ e sọn ụzọ ị.
15
Y'e mẹzugụọ nkwa i kwe odibo i wụ Defidi nẹdi m. Ịyụ gi ọnụ ị ku n'i k'e mẹ ẹ, ị nọ gi ẹka ị mẹ ẹ, k'o dọn nwan rị tannị.
16
“Osolobuẹ hụn wụ Chuku Izrẹlụ, dodo mẹzukwama nwan nkwa ndị hụ i kwe odibo i wụ Defidi nẹdi m ogẹn i gi sị ‘Y'e nwọnbehikọ onyẹ a nọ ihun m a kị elu ukpo-eze Izrẹlụ, o mẹkwọnị ụmụ ị a kpachanpụghọ ẹnya bi, e bi kẹ Iwu m dọn ku, nọkẹ kẹ i dọn mẹ.’
17
Euu, Osolobuẹ, Chuku Izrẹlụ, nị nwan oku-ọnụ ị hụn ị gi kwe odibo i wụ Defidi nkwa mẹzu.
18
“Kanị, nị Chuku sọndẹ ịhịan biri enu-ụwa nke-esi? Elu-igwere lẹ enwẹn ẹ, kẹ elu-igwere kachanrịndẹ elu e jẹn asakọ ẹka ru i, ọrịwụzị Ụlọ-nsọnị m tụn!
19
Ka gọnkwọ nwan ntịn ekpere odibo i lẹ omikẹn ọ rị a rịọ ị, dodo Osolobuẹ wụ Chuku m. Nụ ẹkwan odibo i lẹ ekpere ọ rị ihun i e mẹ.
20
Dodo, shịapụ ẹnya zinmẹ ụlọ-nsọnị kẹ uhinhin kẹ efinaị, ebeni ị sị i k'e buche Ẹfan ị. Dodo, nụkwọ ekpere odibo i hụn o bu ihun zinmẹ ebeni e mẹ.
21
Gọn ntịn arịrịọ odibo i lẹ ndị nke i wụ Izrẹlụ ogẹn ọwụlẹ wẹ bu ihun zinmẹ ebeni rịọ; gha elu-igwee, ebe obibi i, nụ a; ị nụ a, y'a gbagharị.
22
“Omẹni ịhịan mẹ ibe ẹ njọ, nị wẹ sị a kun ẹfan Osolobuẹ, n'ọ bịa, kun ẹfan Osolobuẹ ihun ukpo nchụn-ẹjan ị hụn rị imẹ ụnọ-nsọnị,
23
gha nwan elu-igwee nụ a, y'e mẹ ihiẹn banyen'ẹ. Hannị idibo i eṅẹn: kụ onyẹ ikpe ma ụgwọ ihiẹn o mẹ n'o gi isi ẹ buru; ku ẹ ni hụn ẹka a rị ọchan enwọnni ihiẹn o mẹ, n'i gi ghọsị nị ẹka a rị ọchan.
24
“Eṅẹnrẹn mẹri Izrẹlụ ndị nke i agha, makẹ njọ ndị Izrẹlụ mẹ i, nị e rohutọ wẹ, kweyezin'i, nọ ihun i mẹ ekpere, rịọ ị — imẹ Ụlọ-nsọnị,
25
dodo, gha elu-igwee nụ, y'a gbagharị ndị nke i wụ Izrẹlụ njọ, wekinhẹn wẹ imẹ alịnị i ye wẹ lẹ ndị nẹdi wẹ.
26
“Elu-igwere kpọkin zuebehi mirin, makẹni ndị nke i mẹ i njọ, nị e bu wẹ ihun zinmẹ ebeni mẹ ekpere, kweyezin'i, gi ufiri n'i ye wẹ afụnfụn gha imẹ njọ pụha,
27
dodo ghakwọ elu-igwee nụ olu wẹ, y'a gbagharị idibo i, ndị nke i, ndị Izrẹlụ. Kuzi wẹ ezigbo ụzọ hụ nkẹ wẹ a gha, y'e zi mirin zueye alịnị i ye ndị nke i weri.
28
“Omẹni ụnwụn mọbụ emu ọwụlẹ a lụma alịnị mọbụ emu ihiẹn-ugbo mọbụ igurube mọbụ kpamkpam mọbụ nị eṅẹnrẹn kehunmẹ wẹ ye imẹ obodo wẹ ọwụlẹ rị imẹ alịnị — ụdị nsọngbu mọbụ ọrịa ọwụlẹ bịanị,
29
omẹni onyẹ ọwụlẹ imẹ ndị nke i wụ Izrẹlụ a bịa d'e mẹ ekpere mọbụ rịọ ị, kị ẹka zinmẹ Ụlọ-nsọnị, makẹni onyẹ-onyẹ imẹ wẹ a marịnghọ njọ a rị e gbun'ẹ —
30
dodo, gha elu-igwee, ebe obibi i, nụ ekpere ẹ. Gbagharị; y'e mẹ ihiẹn banyen'ẹ, gi ihiẹn ile onyẹ-onyẹ mẹ sọn ẹ, ebe o mẹ ni y'a marịngụọ obi ẹ (makẹni ịyụ sụọ marịn obi ịhịan ile).
31
Mẹ ẹ kẹni wẹ hụn ụzọ a tụ egun i, e mẹ ihiẹn i ku e we wẹ bigụ imẹ alị hụn i ye ndị nẹdi ẹnyi.
32
“Kẹ abịamabịa, hụn wụlẹni onyẹ Izrẹlụ, ndị nke i, kanị o gi ufiri okẹn ẹfan ị lẹ ikẹn i lẹ ikẹn hụn ị kpa gha alị teni bịa, bu ihun zinmẹ ụlọ-nsọnị, mẹ ekpere,
33
dodo, gha elu-igwee, ebe obibi i nụ, y'e mẹni abịamabịa hụ ihiẹn ọwụlẹ ọ rịọ ị, kẹni ndị alị ile rị elu-ụwa marịn ẹfan ị, tụ egun i kẹ ndị nke i wụ Izrẹlụ dọn e mẹ, lẹni wẹ hụn ụzọ marịn nị Ẹfan ị kẹ wẹ gi tụn ụlọnị m tụn.
34
“Ndị nke i jẹn d'a lụsọn ndị-iṅẹnrẹn wẹ agha, ebe ọwụlẹ hụn i zijẹn wẹ, n'e bu wẹ ihun zinmẹ Jerusalẹm, obodoni ị họrị lẹ Ụlọ-nsọnị m tụn makẹ Ẹfan ị, mẹ ekpere,
35
dodo, gha elu-igwee nụ ekpere wẹ lẹ arịrịọ wẹ, y'a kwadọn wẹ.
36
“Ndị nke i mẹ i njọ (ebe o mẹ ni onwọnni onyẹ ghalẹni e mẹ njọ) nị y'e gi iwe ihiẹn wẹ mẹ bu wẹ che ẹka eṅẹnrẹn, e mẹri wẹ wẹ, kpụn wẹ shi alị wẹ, ọsụọn'a ebe teni ọsụọn'a ebe rị nsue;
37
a nọ wẹ alị ndị gini wẹ rohutọ, nọ alị ahụn wẹ nọ gi wẹ hutọ, rịọ ị, sị, ‘Ẹnyi e mẹọlẹ njọ; ẹnyi e mẹfiegụọ; ẹnyi e mẹọlẹ eje-ihiẹn’;
38
e gi wẹ obi wẹ ile lẹ umẹ-ndụn wẹ ile gbehutọ buruhẹ i ebẹhụ wẹ rị imẹ alị wẹ nwụnjẹn wẹ, bu ihun zinmẹ alị i ye ndị nẹdi wẹ lẹ obodoni ị họrị lẹ ụnọ-nsọ m tụn makẹ Ẹfan ị;
39
dodo, gha elu-igwee ebe i bi nụ ekpere wẹ lẹ arịrịọ wẹ, y'a tụnị wẹ ụya. Y'a gbagharị ndị nke i hụn mẹ i njọ.
40
“Chuku m, dodo nwan, shịapụ ẹnya ị lẹ ntịn ị zinmẹ ekpere wẹ e mẹ ebeni.
41
Dodo Osolobuẹ wụ Chuku, d'a nọdị nwan ebe ezumikẹn i — yụ lẹ Ẹkpẹti hụn a ghọsị ikẹn i. Osolobuẹ wụ Chuku m, ndị nchụn-ẹjan ị wẹ yiri nzụọpụha nọkẹ ẹwuru; ndị nsọ ị wẹ ghọghọ nị y'a rịka mma.
42
Dodo Osolobuẹ wụ Chuku m, ajụkwọlẹ onyẹ i tumẹ. Nyanhankwọ ihiẹn-ọsụsụọ hụn i kwe odibo i wụ Defidi nkwa a.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes