×

現代台語譯本漢字版

歷代志下 9

1
示巴 的女王聽見 所羅門 的名聲,就來 耶路撒冷 欲用難題考驗 所羅門 。伊導真多跟隨來,閣有駱駝載香料、真多黃金及寶石。伊見 所羅門 的時,就將心內所有的難題給伊問。
2
所羅門 照伊所問的一一給伊回答,無一項困難甲 所羅門 𣍐曉應。
3
示巴 女王見識著 所羅門 的智慧,看著伊起的宮殿、
4
桌頂的食物、排列坐啲的人臣、跟隨服事的奴僕及𪜶的衣服,斟酒的奴僕及𪜶穿的衫,閣看著伊佇上主的聖殿所獻的燒化祭 ,就歸個人攏愣去。
5
示巴 女王就對王講:「我佇阮本國所聽著你的事蹟及你的智慧攏是真的!
6
本來我毋信𪜶的話,到我親目看著才相信。人給我講的猶無事實的一半;你的智慧及你的富足超過我所聽著的。
7
你的部屬真有福氣!你的人臣真有福氣!𪜶不時佇你的面前聽你智慧的話。
8
上主 — 你的上帝應該受稱讚!伊意愛你,互你佇上主 — 你的上帝面前坐位作王;因為你的上帝疼 以色列 ,愛伊永遠堅立,所以選立你做𪜶的王,互你通秉公行義。」
9
示巴 女王將大約四千公斤的金、真多香料,及寶石送互王;前到今毋曾有人親像 示巴 女王送赫多香料互 所羅門 王。
10
希蘭 的船員及 所羅門 的船員對 俄斐 運金來,閣帶檀香柴及寶石來。
11
王用諸個檀香柴為上主的殿及王宮做砛仔,嘛為唱歌的人做琴及瑟。佇 猶大 地,前到今毋曾有人看見按呢。
12
所羅門 王送互 示巴 女王的回禮,超過女王帶來的禮物,閣照伊所意愛、所要求的攏送互伊。女王及伊的人臣就倒去𪜶本國。
13
所羅門 逐年收著的金共兩萬三千公斤。
14
以外,伊有對生理人及貿易商收稅金;國內的省長及 阿拉伯 諸個王,攏進貢金銀互 所羅門 。
15
所羅門 王拍大盾牌兩百面,每一面用金七公斤;
16
閣拍小盾牌三百面,每一面用金三公斤。王將諸個盾牌下佇 黎巴嫩林宮 。
17
王閣用象牙做一個大寶座,用純金貼啲。
18
寶座前有六層崎仔,閣有金的腳砧,及寶座相連;雙旁有手按,手按的邊仔各有一座獅徛啲;
19
閣有十二座獅徛佇六層崎仔逐層的雙旁邊;別個王國攏毋曾按呢做。
20
所羅門 王所有飲的器具攏是金的; 黎巴嫩林宮 一切的器具嘛是純金的;佇 所羅門 的時代,銀無互人看做真有價值。
21
王的船隊及 希蘭 的船員做夥去 他施 ;諸個 他施 的船隊運金、銀、象牙、猴、孔雀,每三年倒來一遍。
22
所羅門 王的財富及智慧贏過天下諸王。
23
天下諸王攏想欲來見 所羅門 的面,聽上帝賜互伊的智慧。
24
𪜶逐個帶進貢的禮物,就是金器、銀器、衣服、軍器、香料、馬,及騾;逐年攏有一定的數量。
25
所羅門 有馬椆四千間,閣有馬兵一萬兩千名,閣安置戰車佇許個囤戰車的城,及 耶路撒冷 王遐。
26
所羅門 管轄所有的王,對 幼發拉底河 ,到 非利士 人的地,直到 埃及 邊界。
27
王統治的期間, 耶路撒冷 的銀親像石頭赫多,柏香柴親像山埔的桑材樹赫多。
28
有人對 埃及 ,對逐所在,進口馬互 所羅門 。
29
所羅門 其他的事蹟,對頭到尾攏記載佇 先知拿單史 , 示羅 人 亞希雅 的 預言書 ,及先見 易多 論 尼八 的子 耶羅波安 的 異象書 。
30
所羅門 佇 耶路撒冷 做 以色列 全國的王,共四十年。
31
所羅門 轉去伊的列祖遐了後,埋葬佇伊的老父 大闢 的城。伊的子 羅波安 續接伊作王。
Chinese TTVH 2021
The Bible Society in Taiwan, 2021
:
保存笔记