Shiiba naa ŋun daa nyɛ paɣa daa ti wum Sulemaana yuli ni du shɛm yɛla, ka ka Jɛrusalɛm na ni o ti bɔh’ o bɔhigu kpɛma n-zahim o nya. O daa zaŋ niriba pam pah’ omaŋ’ zuɣu kana, ka lan ʒi laakuma bɛn ʒiri tulaale mini salima pam ni kuɣ’ viɛla na. Ka o daa ka Sulemaana sanna ti yɛl’ o binshɛɣukam din daa be ŋun paɣ’ maa suhu ni.
ni o ni daa diri bindir’ shɛŋa ni o kpambaliba ni ʒiini shɛm ni nayili bihi ni jɛmd’ o shɛm ni situr’ shɛŋa bɛ ni daa ye ni bɛn daa zaŋdi binnyura na ti tir’ o ni situr’ shɛŋa bɛ ni daa ye ni sara maligu shɛŋa o ni daa maani n-zaŋdi nyɔri buɣim Yawɛ jɛmbu duu la, ka di daa gar’ o pam.
Amaa n daa bi niŋ n ni wum shɛm maa yɛda naɣila n ni kana ka mmaŋmaŋ’ nini ti dii nya li ŋɔ. Hal bɛ daa bi yɛli ma a yɛm din galisi pam ŋɔ yɛla pirigili gba; a biɛhigu maa gari n ni daa wum a yɛla shɛm maa.
Ka Yawɛ ŋun nyɛ a Naawuni ŋɔ simdi paɣibu. O nini n-tiɣ’ a ka o zaŋ a ʒili o nam ʒiishee ni a nyɛ ŋun’ Yawɛ ŋun nyɛ a Naawuni ŋɔ ni pii na’ so. A Naawuni maa ni yuri Izraɛlnim’ ka zali ba ni bɛ kul beni sahakam zuɣu n-chɛ ka o piig’ a leei bɛ naa maa, ni a doli yɛlimaŋli mini wuntitali soli su ba.”
Ka paɣ’ maa daa zaŋ salima din tibisim gari kilɔgiram tusaanahi mini tulaale zim pam ni kuɣ’ viɛla ti naa, ka tulaale zim shɛli daa kani n-viɛl’ paai Shiiba naa ŋun nyɛ paɣ’ maa ni daa zaŋ shɛli ti Naa Sulemaana maa.
Ka naa Sulemaana daa zaŋ aligum dari maa mali Yawɛ jɛmbu duu min’ o yiŋ’ dunɔdura. O daa lan zaŋ li mali mɔɣilɔnim’ mini goonjɛnima n-ti baansi, ka so daa na ʒi n-nya di tatabo Juda tiŋgbɔŋ maa ni.
Ka Naa Sulemaana daa ti Shiiba naa ŋun nyɛ paɣ’ maa o ni daa suh’ o bɔri binshɛŋa zaa. O daa ti o pina ka di gari ŋun’ paɣ’ maa ni daa ʒi pin’ shɛŋa na ti ti ŋun’ naa, di nyaaŋa ka o min’ o niriba maa daa lab’ kuli bɛ ya.
m-pahi daabihi mini kɔhigɔriba ni daa yɔr’ o farigu shɛli zuɣu. Ka Areebia nanim’ zaa mini tiŋgbɔŋ maa ni gomnanim’ zaa daa ʒiri salima mini anzinfa na ti tiri Sulemaana.
Ka Naa Sulemaana daa chɛ ka bɛ zaŋ salima mali nyɔtaɣirisi zaɣ’ yɛlima kɔbisiyi. Ka zaɣ’ yini kam daa di salima din tibisim nyɛ kaman kilɔgiram ayopɔin.
Ka o daa lan chɛ ka bɛ zaŋ salima mali nyɔtaɣirisi kɔbisita, ka zaɣ’ yini kam daa di salima din tibisim nyɛ kaman kilɔgiram ata, ka o daa zaŋ di zaa niŋ Lɛbanɔn dakuɣuri yil’ la ni.
Nam ʒiishee maa daa malila dura diba ayɔbu, ka napɔna tambu shee din daa tuɣi nam ʒiishee maa nyɛ salima. Nam ʒiishee maa yaɣili kam daa malila nuhi pabu shee, ka bɛ daa mali gbuɣima ayi kɔtomsi n-zali baɣili nuhi pabu shee maa,
Naa Sulemaana ni daa mali pipi’ shɛŋa nyuri binnyura zaa daa nyɛla salima pipihi ka binshɛɣukam din daa be o yili shɛli din be Lɛbanɔn dakuɣuri yil’ la ni zaa daa nyɛla salima alali. Dama Naa Sulemaana ʒiɛmani maa ni, so daa bi lihi anzinfa ka di nyɛ shɛli.
Dama Sulemaana ŋarima daa yi zaŋdila Hiram tumtumdiba n-chani Tarishish. Ŋarima maa daa yi yiri Tarishish labirina yim yuma ata puuni bɛ ʒirila salima mini anzinfa ni wɔbinyina ni kpara ni noon’ shɛb’ bɛn ŋmani tɔrotɔronim’ na.
Naa Sulemaana daa malila yuri mini chɛchɛbunsi duri tusaanahi. O daa malila yuri tuhi’ pinaayi, ka daa piripiri ba niŋ chɛchɛbunsi ni be tin’ shɛŋa ni, ka chɛ ka shɛb’ mi be ŋun’ naa sani Jɛrusalɛm.
Sulemaana yɛla din kpalim piligu zaŋ hal ni di bahigu ni, bɛ sab’ li niŋ anabi Neetan litaafi ni mini anabi Ahija ŋun daa nyɛ Shilo nir’ la daanabitali litaafi puuni ni anabi Iddo ni daa nya ʒii shɛŋa zaŋ chaŋ Jɛrɔbɔam ŋun daa nyɛ Nɛbat bia la polo la litaafi ni.