Seba lalnuin Solomona hmingthanzia a hriat chuan thu har tak tak zâwta fiah tûrin Jerusalem-ah a kal a. Ṭhuihruai tam tak a nei a, mosola phur sanghâwngsei tam tak a hruai a, mosola te, lungmantam te, rangkachak te a keng ṭeuh bawk a. Solomona nên an inhmuh chuan zawh tûr a neih zawng zawng chu a zâwt ta vek a.
Solomona ei tûr an rawn hlui te, a chhiahhlawh awmna in te, lal ina thawktu hna insem dân te, an thawmhnaw hâk mawizia te; chawhlui kîlpuitute leh a viltute inchei mawizia te, Tempula hâlral thilhlan a hlan hnemzia te a han hmuh chuan mak a ti a, awm ngaihna rêng a hre ta lo va.
I Pathian, Lalpa chu fakin awm rawh se, ani chu i chungah a lâwm a, a aia rorêltu, lalah a ruat che a ni. I Pathian chuan Israel-te hi a hmangaih a, an chungah dik taka rorêltu lalah a dah che a nih hi,” a ti a.
Thilpêk tûr a rawn ken rangkachak kg. sângli chuang leh mosola tam tak, lungmantam ṭhahnem tâwk tak nên Solomona chu a pe a. Seba lalnuin Solomona a pêk mosola anga ṭha rêng rêng hi a awm lo.
Algum thing chuan Tempul pindan chung leh ama in kailâwn a siam a, thing chu perhkhuang leh ṭingṭang siam nân a hmang bawk a, Judai ramah hetiang thing hi an la hmu ngai rêng rêng lo.
Lal Solomona chuan Seba lalnu chu a duh leh a dîl apiang chu a pe a; chu bâkah thilpêk a rawn kensak lo do lêtna a pe tel bawk a; an ram lamah a ṭhuihruaite nên an haw leh ta a.
Sumdâwngte leh dâwrkaiten chhiah an pêk bâkah Arabia lalte leh Israel-te rama bial tin awptute chuan Solomona chu rangkachak leh tangka an rawn pe ṭhîn.
Lalṭhutthlêng lâwn chhohna tûr rangkachak rahka paruk, rah chhan tûr nên a siam a. Ṭhutthlêng chuan bân a nei a, a bân sîr tawnah sakeibaknei lem a dintîr a.
Solomona no chu rangkachak vek a ni, ‘Lebanon ngaw in’ an tih pindana an thil eina bungbêlte pawh chu rangkachak hlîr hlaka siam a ni. Solomona hun lai chuan tangkaruate hi chu engah mah an ngai lo.
Lawngrual a nei bawk a, lal Hirama lawng rualte nên an inkawp a, Tarsis-ah te kalin kum thum danah an lo haw a, rangkachak te, tangkarua te, saingho te, zâwng te, ârâwn te an rawn hâwn ṭhîn.
Tangkarua leh rangkachaka thil siam te, puan te, râlthuam te, mosola te, sakawr te, sakawr puakphur chi te an rawn pe zut zut a, kum tin hetianga rawn ti hi an awm zêl a ni.
Lal Solomona chuan sakawr vulhna hmun sângli a nei a, chûngah chuan a sakawr tawlailîr leh a sakawrte chu a dah a, indo sakawr pawh sîngkhat leh sânghnih a nei a, a ṭhen chu Jerusalem-ah a kawl a, a dang chu khaw hrang hrangah a dah a.
Solomona lal laiin Jerusalem khuaah chuan tangkarua chu lungtê ang lek a ni a, sidar thing lah tlâng bulṭhut khawthlang phaia theipui thing ang maiin a tam a ni.
A bul aṭanga a tâwp thlengin Solomona chanchin hi zâwlnei Nathana lehkhabu-ah te, Silo mi Ahiza thu sawi ziakna bu-ah te, Nebata fapa Israel lal Jeroboama chungchânga zâwlnei Idoa inlârna ziakna bu-ah te a chuang.