Kä mëë ci kuäär Cɛba mi ciek kɛ̈k Thɔ-lo-mon liŋ, cuɛ ben kä Jɛ-ru-tha-lɛm bëë ben ɣɔ̱n kɛ thiecni ti buɔ̱m buɔ̱ɔ̱m. Cuɛ ben kɛ nɛy ti ŋuan jälɛ kɛ thɔ̱a̱rɔa̱a̱li ti ŋuan no̱o̱ŋɛ wal ti kɔap kɔaap, kɛ pääm ti di̱t kökdiɛn kɛ da̱a̱p mi di̱i̱t ɛlɔ̱ŋ. Kä mëë cɛ jëk kɛ Thɔ-lo-mon, cuɛ la̱t tin diaal tin te lɔɔcdɛ.
Ɛ liak tekɛ Kuoth Nhial ni Kuothdu, min ci ji̱ nhɔk kä ci ji̱ jak kä kuäär mi ruëc kɛ ciötdɛ. Kɛ ɣöö nhɔk Kuoth I-thɛ-rɛl, kɛnɛ ɣöö bɛ kɛ kap nhial amäni cäŋ kɛl, cɛ ji̱ jak kä kuääriɛn kɛ ɣöö bi kɛnɛ cuŋ la̱t.”
Kä cuɛ kuäär ni Thɔ-lo-mon ka̱m da̱a̱p mi lëny ki̱luni ti bathdɔɔri da̱ŋ ŋuaan, kɛ wal ti kɔap kɔaap ti ŋuan ɛlɔ̱ŋ, kɛ pääm ti di̱t kökdiɛn. Kä cuɛ thil wal ti kɔap kɔaap ti ce̱tkɛ ti ca ka̱m kuäär ni Thɔ-lo-mon ti ɛ kuäär ciek Cɛba.
Kä cu kuäär ni Thɔ-lo-mon jiath in tekɛ ŋuäny mi gɔaa lät ko̱o̱tni luaak Kuɔth kɛnɛ ko̱o̱tni duëël kua̱r, kä cuɛ lät ni thuɔmni ji̱ kët din bä. Kä cuɛ thil mi ce̱tkɛ nɔmɔ mi cua nɛn ni wal muun Juda.
Kä cu kuäär ni Thɔ-lo-mon kuäär ciek Cɛba ka̱m tin diaal tin go̱o̱rɛ kɛnɛ tin cɛ thiec, a /ci min ka̱m kɛ jɛ kɛ kui̱ mucä min cɛ ka̱m Thɔ-lo-mon te thi̱n. Kä cuɛ loc wi̱i̱dɛ kɛnɛ nɛɛkɛ.
Kä cuɛ kötni ti kur diɔ̱k ti nyin tiɛtni la̱t kɛ da̱a̱p mi ca tiac. Kä ca ko̱t kɛl la̱t kɛ da̱a̱p mi tekɛ ki̱luni da̱ŋ rɛw. Kä cu kuäär kɛ la̱th Duëël Ruɔ̱ɔ̱p Lɛ-ba-nɔn.
Kä ɛn kɔm tëë kɛ ko̱o̱tni da̱ŋ bäkɛl kɛ gua̱a̱th ciökni mi da̱a̱p mi te puɔ̱ɔ̱ny kɔam. Kä gëëknikɛ tëë kɛ gua̱a̱th mi la̱th kɛ tet thi̱n, kä te lony da̱ŋ rɛw cuŋä gëëkni tetni kɔam,
Kä kuak ma̱th kua̱r ni Thɔ-lo-mon diaal kɛ da̱a̱p, kä kuak Duëël Ruɔ̱ɔ̱p Lɛ-ba-nɔn kɛn diaal da̱a̱p mi lɛy lɛy. Kä /ca ciɛk in bo̱r cɔl ni duɔ̱ɔ̱r ni̱ni Thɔ-lo-mon.
Kä cu Thɔ-lo-mon tekɛ duël ti bathdɔɔri ŋuaan kɛ kui̱ jiöŋkööri kɛnɛ thurbiɛɛli, kɛ ji̱ jiöŋköör ti bathdɔɔri wäl rɛw, tin cɛ la̱th wi̱i̱ni thurbiɛɛli kɛnɛ wec kua̱r kä Jɛ-ru-tha-lɛm.