Samtang si Esdras yara sa atubangan sang templo nga nagaduko sa pagpangamuyo, nagahibi kag nagatuad sini nga mga sala, ang isa ka daku nga grupo sang mga Israelinhon—mga lalaki, mga babayi kag mga kabataan—nagtipon sa palibot niya nga nagahilibion sing tudo.
Dayon si Secanias nga anak ni Jehiel, sang barangay ni Elam, nagsiling kay Esdras, “Naglapas kami sang amon pagtuo sa Dios paagi sa pagpangasawa sa dumoluong nga mga babayi, pero bisan amo ina ang natabo may paglaom pa gihapon sa Israel.
Karon nagasumpa kami sa amon Dios nga amon bulagan ini nga mga babayi kag ang ila mga kabataan. Himuon namon ini kon ano ang isiling mo kag sang iban nga nagatahod sa mando sang Dios. Himuon namon ang ginakinahanglan sang kasugoan sang Dios.
Gani si Esdras nagsugod sa pagpasumpa sang mga pangulo sang mga pari, sang mga Levita, kag sang nabilin nga mga tawo, nga sila magahimo sang ginpanugyan ni Secanias.
Dayon naglakat sia halin sa atubangan sang Templo pakadto sa ginaestaran ni Jehohanan nga anak ni Eliasib kag nagpabilin sia didto sa bug-os nga gab-i nga nagapangasubo tungod sang pagkadi-matutom sang mga nakabalik halin sa pagkabihag. Wala sia magkaon ukon mag-inom sang bisan ano.
paagi sa mando sang mga pangulo sang mga tawo. Ang bisan sin-o nga indi makaabot sa sulod sang tatlo ka adlaw, ang tanan niya nga mga pagkabutang pagakuhaon kag madula niya ang iya kinamatarong subong nga katapo sang katilingban.
Sa sulod sang tatlo ka adlaw, sa ika-20 nga adlaw sang ikasiyam nga bulan, ang tanan nga mga lalaki nga nagaestar sa mga kadutaan sang Juda kag Benjamin nagkadto sa Jerusalem kag nagtipon sa plasa sang Templo. Nag-ulan sing madamol, kag tungod sang panahon kag sa pagkaimportante sang pagtililipon ang tagsatagsa nagakurog.
Si Esdras nga pari nagtindog kag naghambal sa ila. Nagsiling sia, “Nakalapas kamo kag nagdala sang sala sa Israel paagi sa inyo pagpangasawa sang dumoluong nga mga babayi.
Karon, ituad ninyo ang inyo mga sala sa Ginoo, ang Dios sang inyo mga katigulangan, kag himua ninyo ang luyag niya. Paina ninyo ang inyo kaugalingon sa mga dumoluong nga nagaestar sa aton duta kag bulagi ang inyo dumoluong nga mga asawa.”
Pero nagsiling pa gid sila, “Ang mga tawo madamo kaayo, kag nagaulan sing madamol. Indi kami makapabilin diri sa gwa. Ini indi mahimo sa isa ukon duha ka adlaw, tungod kay madamo sa amon ang nakahimo sini nga sala.
Ibilin ang aton mga opisyales sa Jerusalem sa pag-atipan sini nga butang. Dayon sa napat-od nga tion pakadtua diri ang bisan sin-o nga may asawa nga dumoluong upod sa mga pangulo kag mga hukom sang iya siudad. Sa sini nga paagi ang Dios indi na maakig sa aton.”
Wala sing isa nga nagpamatok sini nga plano luas kay Jonatan nga anak ni Asael kag kay Jazias nga anak ni Tikva, nga ginbuligan ni Mesullam kag ni Sabetai nga Levita.
Ang mga bihag nga nagbalik nagbaton sang plano, gani si Esdras nga pari nagpili sang mga lalaki gikan sa pangulo sang mga kabarangayan kag ginsulat ang ila mga ngalan. Sa nahauna nga adlaw sang ika-10 nga bulan nagsugod sila sang ila pagpangusisa,
Amo ini ang lista sang mga lalaki nga may dumoluong nga mga asawa: Sa barangay ni Jesua kag sa iya mga utod nga lalaki, nga amo ang mga kaanakan ni Josadac: Maasias, Eliezer, Jarib, kag Gedalias.