O ruzi ogẹn Atazẹzẹsi gi wụ eze Pẹshịa, Bish'lam, Mitrẹdatị, Tabilu lẹ ndị itu wẹ nọ dejẹnni eze wụ Atazẹzẹsi ẹkụkwọ, kpe wẹ. Asụsụ ndị Aram ịhịan ile a sụ ogẹn hụ kẹ wẹ gi de ẹ, nị wẹ d'e gi asụsụ ọzọ de ẹ. Lee kẹ wẹ dọn de ẹ asụsụ Aram:
“O furu nị eze marịn nị ndị Ju ahụn gha ebe ị rị lụaburuhẹ ẹnyi e shigụọ Jerusalẹm. Wẹ rị nwan a tụndọnzi obodo nnupụ-isi hụ e mẹgbu enwẹn ẹ eje-ihiẹn. Wẹ rị a tụndọnzi mgbọn ẹ, e dọnzi iyetọ a.
Ebe o mẹ nwan nị okpuru ịyụ wụ eze kẹ ẹnyi rị lẹni o furuni nị ẹnyi nị wẹ budan eze, ya kẹ ẹnyi gi rị e zihẹn'i ozini, nị ẹnyi gi ẹ mẹ eze a marịn ihiẹn rị e mẹni,
kẹni eze lele ebe wẹ detọsọnmẹ ihiẹn mẹ ogẹn ndị nẹdi ẹ. I k'a hụn a ebẹhụ nị obodoni wụ obodo nnupụ-isi, hụn e ye ndị-nze lẹ ndị a nọkin ẹnya wẹ Ẹgbẹrẹni nsọngbu; obodo nnupụ-isi k'ọ wụ ẹdẹi. Ya haịn wẹ gi tikpọ obodoni.
Ya eze nọ gi hụnnị za wẹ: Rehum hụn wụ onyẹ-isi lẹ Shimshaị hụn wụ akanwe lẹ itu wẹ ndị bi imẹ Sameria lẹ ụzọ ọzọ Ẹgbẹrẹ Nfetu Iyi-Yufretisi kẹ m rị e deni: E kele m ụnụ.
Ya m nọ sị wẹ chọ ihiẹn ụnụ sị m chọ, m nọ hụn a n'o tekẹ obodoni nupụma isi okpuru ndị-nze lẹ n'o tekẹ wẹ gi nnupụ-isi lẹ ihiẹn a kwadọn nnupụ-isi marịn wẹ.