koriikta anyun ole mi Zerubabel ak kandoigap kooriigap kwanisyek, ak koleenji icheek, “Ongeteech tugul, amu kicheeng'e Kamuktaindeng'wong' ko uu okweek, ak keeng'jini ineendet tiseiywek kobooch peetuusyegap Esarhaddon laitoryatap Assyria ne ki imutwech kebwa olito.”
Ago ki leenji icheek `Zerubabel kobooto Jeshua ak kandoik tugul che po kooriigap kwanisyek che po Israel, “Ma kiting'egei yamdao ak okweek keteech tugul kootap Kamuktaindennyo. Ago kiteekyini acheegei `koot Kamuktaindet ne Toroor, Kamuktaindetap Israel, ko uu ye king'atech laitoryat Cyrus laitoryatap Persia.”
Ki igoochi `asoya kandoik che pcheu melekto, si kogirinda icheek kowal magennywa koek puch eng' peetuusyek tugul che po Cyrus laitoryatap Persia, agoi koit laitornatetap Darius laitoryatap Persia.
Ingonaak eng' laitoryat kole Yahudik chooto kobunu oldang'ung' ko kogoitwech ak kogoit Jerusalem ak koteechei kogeny nganasanooto ya ago ngelelyo. Teechei kogeny irimoik ak lumeiywot ne kiga kobutok.
si kobiit kecheeng' eng' bukuit ne po ng'aleegap peetuusyegap kwanisyeguk. Inyooru eng' bukuinooto po ng'aleegap peetuusyek ak inai ile ngelelyo nganasani ak koiimi laitorinik ak emotinwek, ak kigong'eet chaamset kobooch keny. Nooto anyun amu ne si keng'em nganasaniito.
Ki iyookyi anyun laitoryat waluunet Reum pounindetap kirwooget ak Simsai siriindet ak choronokwak tugul che ki menyei Samaria, ak emet tugul ne mi aineet pitoniin kole ingotep kaalyeet ko uu nooto.
Ki miitei kogeny laitorinik che ki kiimeen che ki pou Jerusalem che ki pou emet tugul ne mi aineet pitoniin ak ki kigoochin konunoik, kodi, ak aisuruutap tuguuk.